ភ្នំពេញ ៖ នៅព្រឹកថ្ងៃទី០៦ ខែមករា ឆ្នាំ២០១៥នេះ គណៈបញ្ជាការឯកភាពខណ្ឌ ច្បារអំពៅ ដឹកនាំដោយ លោក អ៊ាង ស៊ីផាន បានបើកកិច្ចប្រជុំប្រចាំខែ ស្តីពីបញ្ហារឹតបន្តឹងសន្តិសុខ សុវត្ថិភាពបន្ថែមទៀត នៅសាលាខណ្ឌ ដោយមានការចូលរួមពី លោក គិត សុផល មេបញ្ជា ការកងរាជអាវុធហត្ថខណ្ឌ ចៅសង្កាត់ទាំង៨ និងមន្ត្រីចំណុះសាលាខណ្ឌ ជាច្រើនរូបទៀត ។
ក្នុងនាមប្រធាន គណ:បញ្ជាការឯកភាពខណ្ឌ លោក អ៊ាង ស៊ីផាន បានលើកឡើងថា ចៅសង្កាត់ និងមេប៉ុស្តិ៍ អនុប៉ុស្តិ៍ ត្រូវសហការគ្នាឲ្យ បានល្អ ត្រូវមានឆន្ទះធ្វើការ ទាំងអស់គ្នា ទើបក្នុងមូលដ្ឋាន មានសន្តិសុខសុវត្ថិភាពល្អ ។ លើសពីនេះទៀត បើខាងសង្កាត់ត្រូវការកម្លាំងនគរបាលរដ្ឋបាល ឬអាវុធហត្ថ ត្រូវសហការចូលរួមបង្ក្រាបបទល្មើសជាមួយគ្នា និងត្រូវធ្វើរបាយការណ៍ មកសាលាខណ្ឌផងដែរ។ លោកបានបន្តទៀតថា ថ្ងៃនេះបើក កិច្ចប្រជុំប្រចាំខែ លើការងារសន្តិសុខ សណ្តាប់ធ្នាប់សាធារណៈ និងត្រូវអនុវត្តន៍គោលនយោបាយភូមិ ឃុំ មានសុវត្ថិភាពឲ្យមានតម្លាភាព ពិសេសការបង្ក្រាប ល្បែងស៊ីសង និងការទប់ស្កាត់បទល្មើស តាមទីតាំងដាក់បញ្ចាំនានាក្នុងមូលដ្ឋាន ។
ពាក់ព័ន្ឋការចុះពិនិត្យ តាមទីតាំងអាជីវកម្មដាក់បញ្ចាំនេះ លោកអភិបាលខណ្ឌ បានស្នើដល់គ្រប់ គណ:បញ្ជាការឯកភាពសង្កាត់នីមួយៗ ត្រូវចុះស្រង់ស្ថិតិទីតាំងអាជីវកម្មទាំងឡាយ តាមសង្កាត់នីមួយៗ និងស្នើដល់ម្ចាស់អាជីវកម្ម ចូលរួមសហការផ្តល់ព័ត៌មានពីវត្ថុ ឬទ្រព្យ របស់អ្នកដែល យកទៅដាក់បញ្ចាំទាំងនោះ ដោយប្រែក្លាយឲ្យទៅជាភ្នាក់ងាររបស់យើង រាយការណ៍ជូនមកខណ្ឌ ដើម្បីកំណត់អត្តសញ្ញាណ របស់ទ្រព្យដែលដាក់បញ្ចាំ ងាយស្រួលក្នុងការស្រាវជ្រាវបទល្មើសផ្សេងៗ ។
ក្នុងកិច្ចប្រជុំនេះ លោកអភិខណ្ឌ អ៊ាង ស៊ីផាន បានមានប្រសាសន៍ ដោយសង្កត់ ធ្ងន់ ជំរុញដល់កម្លាំងសមត្ថកិច្ច ទាំងអស់ ពិសេសលោក អភិបាលរងខណ្ឌ ទទួលប្រចាំវេន ក្នុងការដឹកនាំកម្លាំងចុះត្រួតពិនិត្យអាវុធជាតិផ្ទុះ តាមដងផ្លូវក្នុងសង្កាត់ ទាំង៨ លៃលកយ៉ាងណា ធ្វើការត្រួតពិនិត្យ សកម្មភាព ដែលជនសង្គមងងឹត ឆ្លងកាត់ភូមិសាស្ត្រខណ្ឌ ដើម្បីធ្វើសកម្មភាព ។
ជាមួយលោក អភិបាលខណ្ឌ បានស្នើដល់ចៅសង្កាត់ទាំង៨ ត្រូវកសាងកម្លាំងពិតនៅមូលដ្ឋាន ពីប្រជាជន មហាជន ដែលជួយយើង ប៉ុន្តែត្រង់ថា យើង តើយើងប្តេជ្ញាធ្វើ ឬមិនធ្វើប៉ុណ្ណោះ ក្នុងលុបបំបាត់សកម្មភាព បទល្មើសលួចឆក់ប្លន់ និងជួញដូរគ្រឿងញៀន ល្បែងស៊ីសង ។
ប្រធានគណ:បញ្ជាការឯកភាព បានស្នើដល់អធិការ នគរបាល មេបញ្ជាការអាវុធ ហត្ថខណ្ឌ បែងចែកកម្លាំង ជាក្រុម ជាវេន ហើយត្រូវនាំគ្នាចុះល្បាតជារៀងរាល់ថ្ងៃ ដើម្បីកាត់បន្ថយបទល្មើសមួយចំនួន ព្រោះថា បើសន្តិសុខត្រូវបានរឹតបន្តឹងកាន់តែខ្លាំង ជនសង្ស័យមួយចំនួន ដែលធ្លាប់ធ្វើសកម្មភាពបទល្មើសផ្សេងៗ ខុសច្បាប់ ក៏វាញញើតនឹងសមត្ថកិច្ចខ្លះដែរ ។
លោកអភិបាលខណ្ឌ បានបន្ថែមថា ក្នុងនាមលោកជា ប្រធានគណៈបញ្ជាការឯកភាពខណ្ឌ លោកក៏បានស្នើឲ្យ អាជ្ញាធរសង្កាត់ និងប៉ុស្តិ៍ បង្កើនសកម្មភាពល្បាតក្នុង តំបន់ស្មុគ្រស្មាញ និងត្រួត ពិនិត្យរដ្ឋបាលតាមទីតាំង ដីឡូត៍ដែលម្ចាស់ទុកចោល បង្កើតជាព្រៃស៊ុបទ្រុប បង្កលក្ខណ:ងាយស្រួលដល់ ក្រុមជនល្មើសលាក់ខ្លួនពួន អាត្មា រង់ចាំប្រព្រឹត្តបទល្មើសផ្សេងដើម្បីកុំឲ្យមានការរិះគន់ពីមហាជន ។ ដូច្នេះគ្រប់មន្ត្រីដែលពាក់ព័ន្ធទាំងអស់ ត្រូវចេះសហការគ្នាឲ្យបានល្អ ។
លោកអភិបាលបានបន្តថា ការបង្ក្រាបបទល្មើសផ្សេងៗ មិនមែនជាការងារងាយស្រួលពេកនោះទេ គឺទាមទារឲ្យ សមត្ថកិច្ចត្រូវមានកម្លាំងបង្កប់ ជាពិសេសកម្លាំង សមត្ថកិច្ចតែម្តងមិនត្រូវពាក់ព័ន្ធ និងការទទួលសំណូក ពីក្រុមរកស៊ីខុសច្បាប់នោះឡើយ។ បើមានការពាក់ព័ន្ធហើយ មិនអាចបង្ក្រាបបាននោះទេ ដូច្នេះសូមជៀសវាងឲ្យឆ្ងាយពីបទល្មើស។ ចំណុចពិសេស ដែលឈានទៅបង្ក្រាបបទល្មើសបាននោះ គឺគណៈបញ្ជាការឯកភាពសង្កាត់ សហការជាមួយសមត្ថកិច្ចក្នុងកាគ្រប់គ្រង ប្រជាពលរដ្ឋនៅមូលដ្ឋាន គ្រប់គ្រងសមាសភាពចេញ-ចូលក្នុងមូលដ្ឋាន និងគ្រប់ គ្រងមុខសញ្ញាចេញពីពន្ធនាគារ ឲ្យបាន ច្បាស់ លាស់ ។ ត្រូវចាត់ទុកប្រជាពលរដ្ឋ ជាកម្លាំងចលករដ៏សំខាន់ក្នុងការគ្រប់គ្រងសន្តិសុខ ។
ដោយឡែកបញ្ហា សណ្តាប់ធ្នាប់សាធារណៈ ត្រូវបានប្រជាពលរដ្ឋរិះគន់ផងដែរ ដូចជានៅផ្សារព្រែកឯង យកចិញ្ចើមផ្លូវជាតិលេខ១ ដាក់តាំងលក់ទំនិញ ផ្សារច្បារអំពៅ យកផ្លូវជុំវិញផ្សារដាក់លក់ទំនិញ ធ្វើឲ្យអ្នកដំណើរឆ្លងកាត់រិះគន់រៀងរាល់ ។ ដូច្នេះការងារ សូមឲ្យមន្ត្រីទទួលបន្ទុក ត្រូវរិះរកវិធីដោះស្រាយបន្ទាន់ ។
បន្ទាប់ពីទទួលផែនការ ពីគណ:បញ្ជាការឯកភាពខណ្ឌរួចមក លោកមេបញ្ជាការអាវុធហត្ថ និងចៅសង្កាត់ទាំងអស់ បានប្តេជ្ញាយកទៅ អនុវត្តឲ្យមានប្រសិទ្ធភាព តាមការណែនាំផងដែរ ៕
