ភ្នំពេញ ៖ លោកស្រី ហ៊ុន ស៊ីណាត ប្អូនស្រីរបស់សម្តេចតេជោ នាយករដ្ឋមន្ត្រី បានមានប្រសាសន៍ដោយបានស្នើសុំដល់ក្រសួងមហាផ្ទៃ និងសភា ជាពិសេសសម្តេចតេជោ ហ៊ុន សែន ពិនិត្យនិងពិចារណាបន្ថែមទៀត នៅច្បាប់ចរាចរណ៍ថ្មី២០១៦នេះ ខណៈពេលប្រជាជនប្រតិកម្មខ្លាំងពេកក្នុងការអនុវត្តន៍ច្បាប់ចរាចរណ៍ជើងគោកថ្មីនេះ។
តាមរយៈហ្វេសប៊ុកផ្លូវការលោកស្រី ហ៊ុន ស៊ីណាត បានសរសេរលើផេកហ្វេសប៊ុកថា ដោយមើលឃើញពីភាពរំជើបរំជួល ពីសំណាក់ប្រជាពលរដ្ឋចំពោះច្បាប់ចរាចរណ៍ថ្មី ដែលបាននិងកំពុងអនុវត្តន៍ នាងខ្ញុំសូមបញ្ចេញមតិក្នុងនាមពលរដ្ឋមួយរូបនៅកម្ពុជា..តើច្បាប់បង្កើតឡើងដើម្បីជួយការពាររាស្ត្រ ឬធ្វើបាបរាស្ត្រ?? ប្រសិនបើចង់រិតបន្តឹងច្បាប់ ដើម្បីកាត់បន្ថយគ្រោះថ្នាក់ចរាចរ គឺគួរតែចាប់ផ្តើមចេញពីសណ្តាប់ធ្នាប់ នៃការបើកបរនិងការចតយានជំនិះគ្មានសណ្តាប់ធ្នាប់ នៅលើតាមដងវិថីនានា មិនមែនចែងច្បាប់ចេញមកយកការផាកពិន័យជាប្រាក់ច្រើនបែបនេះឡើយ ប្រជាជនកម្ពុជានៅមានកង្វះខាតផ្នែកចំណេះដឹង ហេតុដូច្នេះយើងគួរតែចូលរួមផ្សព្វផ្សាយចំណេះដឹង ឲ្យបានទូលំទូលាយជាមុនសិន មុននិងអនុវត្តន៍ច្បាប់បែបប្រទេសជឿនលឿនបែបនេះ..រឿងផ្ទេរឈ្មោះឡានក៏ជាដើមចមមួយដែរ សួរថាចុះអ្នកដែលទិញឡានពីមុន ហើយតើតម្រូវឲ្យគ្នាដើររកម្ចាស់ដើមដើម្បីផ្ទេរឈ្មោះមែនទេ? ឯប័ណ្ណសំគាល់រថយន្ត ដែលតម្រូវឲ្យយកតាមខ្លួននោះ ចុះបើចោរវាប្លន់ហើយយកទៅទាំងអស់ តើជនរងគ្រោះបានអ្វីសំអាង ជាមួយសមត្ថកិច្ចដើម្បីតាមរកឡានម៉ូតូដែលត្រូវចោរលួចនោះ??
ខ្ញុំសង្កេតឃើញថា មានមតិខ្លះឲ្យយកកាតគ្រីកូពីទៅបញ្ជាក់ពីសាលាខណ្ឌ តើវាជាសេវាកម្មហ្វ្រី (Free)ឬ?? ខ្ញុំស្ទើរតែមិនជឿថាមានសេវាកម្មបែបនោះ ព្រោះថាសូម្បីតែបណ្ណគ្រួសារ ការធ្វើអត្តសញ្ញណប័ណ្ណនានាក៏នៅមានអំពើសូកប៉ាន់នៅឡើយ ទោះបីជាមានប្រតិកម្មពីថ្នាក់ដឹកនាំជាន់ខ្ពស់ក៏ដោយ..ក្នុងនាមប្រជាពលរដ្ឋមួយរូប នាងខ្ញុំសូមសំណូមពរដល់ថ្នាក់ដឹកនាំ មេត្តាត្រួតពិនិត្យលើច្បាប់ថ្មីនេះ មុននិងដាក់អនុវត្តន៍ ព្រោះថាប្រជាជនកំពុងតែមានប្រតិកម្មខ្លាំងណាស់..សូមមេត្តាបង្កើនការពន្យល់អប់រំ និងពង្រឹកសណ្តាប់ធ្នាប់នានានៅលើចិញ្ចើមផ្លូវ ដែលហាងខ្លះយកជាកម្មសិទ្ធិចតយានយន្តប្រសើរជាងបង្កើតច្បាប់បែបនេះ…រឹតបន្តឹងលើការបើកបរនានាដែលមានពាក់ព័ន្ធនិងគ្រឿងស្រវឹង ហើយគួរតែដាក់ពិន័យឲ្យខ្លាំងចំពោះជនណា ដែលបើកបរលើសល្បឿនកំណត់ និងសេពគ្រឿងស្រវឹងក្នុងកំឡុងពេលបើកបរល្អជាង..រិតបន្តឹងឡានធំៗ ដែលបើកបរដោយបុគ្គលដែលគ្មានប័ណ្ណបើកបរ ឬដាក់បន្ទុកលើក្រុមហ៊ុនជួលឡានធំៗ ដែលមិនបានយកចិត្តទុកដាក់ចំពោះអាយុជីវិតអ្នកដទៃ នៅពេលដែលបុគ្គលិករបស់ខ្លួនបើកបរដោយមិនគោរពសិទ្ធិអ្នកដ៏ទៃ។ ដើរចង់ពេញពិភពលោក ហើយស្រុកគេក៏មិនដែលមានចែងច្បាប់ចឹងដែល ភាគច្រើនគេរឹតបន្តឹងទៅលើកការបើកបរលើសល្បឿននៃច្បាប់កំណត់ និង គ្រឿងស្រវឹង ដូចនៅប្រទេសលោកខាងលិច ប្រជាជនមានអាយុ២១ឆ្នាំ បានផឹកគ្រឿងស្រវឹងបានហើយនៅឆ្នាំកន្លងទៅ២០១៥ គេបន្ថែមដល់២៣ឆ្នាំបានផឹកស្រាបាន ព្រោះស្រានិងការបើកបរលើសល្បឿន បានវា បង្កគ្រោះថ្នាក់ជាង សង្ឃឹមថាក្រសួងមហាផ្ទៃនិងសភា ជាពិសេសសម្តេចតេជោ ហ៊ុន សែន ពិនិត្យនិងពិចារណាបន្ថែមទៀត នៅច្បាប់ចរាចរណ៍ថ្មី២០១៦នេះ ប្រជាជនប្រតិកម្មខ្លាំងពេក ខ្ញុំសម្រាកនៅពេទ្យចិត្តមិនស្ងប់ទេ សរសេរបានតែថ្ងៃនេះ ព្រោះពេទ្យហាមមិនឲ្យប្រើដៃចុចច្រើនទៀត ព្រោះជាប់សន្លាក់ឆ្អឹងករ នឹកបងប្អូន ក្មួយៗ ពូមីង និង កូនចៅណាស់ ឆ្នាំថ្មី២០១៦ សូមជូនពរបងប្អូនមិត្តFacebook ទាំងអស់សំណាងល្អ៕
