បន្ទាយមានជ័យ ៖ លោកឧកញ៉ា ហង្ស ស៊ីផា ចេញមុខបកស្រាយថា ក្រុមហ៊ុនរបស់លោកមិនបានស្នើដោះដូរ ឬពុះដីចំណតរថយន្តលក់ទេ គឺអាជ្ញាធរខេត្តឃុបឃិតគ្នាលក់បេនឡាន ក្រោមលេសអភិវឌ្ឍន៍ខេត្តបន្ទាយមានជ័យ។
ការចេញមុខបកស្រាយនេះធ្វើឡើងកាលពីព្រឹកថ្ងៃទី៣០ ខែធ្នូ ឆ្នាំ២០១៥ បន្ទាប់ពីរូបលោករងការរិះគន់ពីសារព័ត៌មាន និងពលរដ្ឋថា លោកជាអ្នកវិនិយោគដោះដូរចំណត់រថយន្តហើយយកដីលក់។
សូមបញ្ជាក់ថា ចំណតរថយន្តខេត្តបន្ទាយមានជ័យដែលមានទីតាំងធំទូលាយស្អាតសល់ពីសម័យសង្គមរាស្ត្រនិយម ត្រូវបាន ស ជ ណ នៃទីស្ដីការគណៈរដ្ឋមន្ត្រីសម្រេចធ្វើការផ្លាស់ប្ដូរចេញ ដោយយកទៅដាក់នៅវាលស្រែស្រុកផ្សេងជាប់នឹងក្រុងសិរីសោភ័ណពីតម្លៃដីមួយល្វែងជាង១០ម៉ឺនដុល្លារទៅមួយហិកតា២ទៅ៣ម៉ឺនដុល្លារ។
តាមរយៈការផ្លាស់ប្ដូរនេះប្រជាពលរដ្ឋដែលកំពុងអាស្រ័យផល ជាមួយនឹងបេននេះ បានសម្តែងការមិនពេញចិត្ត និងបានផ្តិតមេដៃប្រមាណជាង២.០០០នាក់ ដើម្បីសុំអន្តរាគមន៍ទៅសម្ដេចនាយករដ្ឋមន្ត្រី និងអង្គភាពប្រឆាំងអំពើពុករលួយឲ្យបញ្ឈប់ការដោះដូរ។
សូមបញ្ជាក់ថា ការដោះដូរបេនឡានខេត្តបន្ទាយមានជ័យនេះ ក្រោមលេសថា បេន បានធ្វើឲ្យប៉ះពាល់យ៉ាងធ្ងន់ធ្ងរនូវសណ្ដាប់ធ្នាប់សោភ័ណភាពក្រុង និងខេត្ត ជាមួយនឹងការដោះស្រាយជូនពលរដ្ឋដែលនៅលើដីរដ្ឋ។
ការវាយប្រហារលើលោកឧកញ៉ា ហង្ស ស៊ីផា ថា បានឃុបឃិតជាមួយអាជ្ញាធរខេត្តលក់បេនឡានខេត្តហើយដូរទីតាំងបេនយកទៅដាក់ក្រៅក្រុង ហើយរាល់ការសាងសង់ និងស្ថាបនា ដោយក្រុមហ៊ុនស៊ីផារតនះខនស្ត្រាក់សិនខូអិលធីឌី។
លោកឧកញ៉ា ហង្ស ស៊ីផា បានបកស្រាយនៅចំពោះមុខប្រជាពលរដ្ឋទៀតថា សូមកុំឲ្យបងប្អូនប្រជាពលរដ្ឋយោលច្រឡំថា ការដោះដូរនេះជារឿងថ្នាក់លើការពិតជារឿងថ្នាក់ក្រោមត្រូវរ៉ូវគ្នាបញ្ជូនទៅលើទាំងរាស្ត្រមិនសប្បាយចិត្ត។
ជាមួយគ្នានោះលោកបញ្ជក់ទៀតថា លោកមិនមានការពាក់ព័ន្ធដល់ក្រុមហ៊ុនរបស់លោកដែរ ហើយលោកមិនបានធ្វើការអភិវឌ្ឍន៍ក្រោមតំណក់ទឹកភ្នែកប្រជាពលរដ្ឋរាប់ពាន់នាក់នោះទេ មួយវិញទៀត ក្រុមហ៊ុនដែលទទួលសិទ្ធិសាងសង់គឺជាក្រុមហ៊ុន មនោរតនះខនស្ត្រាក់សិនខូអិលធីឌី ដូច្នេះសូមប្រជាពលរដ្ឋកុំមានការភ័ន្តច្រឡំ។
ជាមួយប្រជាពលរដ្ឋ លោកនឹងស្នើសុំទៅថ្នាក់លើដើម្បីសុំកុំឲ្យមានការដោះដូរចំណតរថយន្តនេះ ព្រោះចំណតរថយន្តនេះ គឺជាចំណតរថយន្តដែលមានវ័យចំណាស់ និងធំទូលាយស្អាតស្ទើរតែទូទាំងប្រទេសពុំមានដូច ត្រូវបានក្រុមហ៊ុនមនោរតនៈធ្វើការស្នើសុំតាមរយៈអាជ្ញាធរខេត្តទៅក្រសួងមហាផ្ទៃក្នុងការសម្រេចដោះដូរ ហើយក៏ត្រូវបានថ្នាក់លើសម្រេចឲ្យដោះដូរផងដែរ។ ប៉ុន្តែការសម្រេចដោះដូរនេះត្រូវបានប្រជាពលរដ្ឋក្នុងក្រុងសិរីសោភ័ណ ក៏ដូចអ្នករត់តាក់ស៊ីធ្វើការប្រឆាំងដាច់ខាតមិនឲ្យមានការដោះដូរឡើយ៕
