ភ្នំពេញ ៖ នៅព្រឹកថ្ងៃទី៣០ ខែតុលា ឆ្នាំ២០១៥នេះ រដ្ឋសភាបានបន្តសម័យប្រជុំរដ្ឋសភាលើកទី៥ នីតិកាលទី៥ ក្រោមអធិបតីភាពសម្ដេចអគ្គមហាពញាចក្រីហេង សំរិន ប្រធានរដ្ឋសភានៃព្រះរាជាណាចក្រកម្ពុជា និងដោយមានការចូលរួមពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃរាជរដ្ឋាភិបាលកម្ពុជា ក្នុងនាមតំណាងរាស្ត្រមណ្ឌលខេត្តកណ្តាល។
សម័យប្រជុំនេះក៏មានការចូលរួមពីតំណាងរាស្ត្រមកពីគណបក្សប្រជាជនកម្ពុជាចំនួន ៦៨រូប។ ដោយឡែកតំណាងរាស្ត្រគណបក្សសង្គ្រោះជាតិបានធ្វើពហិការមិនចូលរួមប្រជុំទេ។
អង្គសភាបានធ្វើការបោះឆ្នោតដកតំណែងលោកកឹម សុខា អនុប្រធានទី១រដ្ឋសភាដោយសំឡេង៦៨លើ៦៨។
លោកបណ្ឌិតរដ្ឋ ជាម យៀប ប្រធានគណៈកម្មការសេដ្ឋកិច្ច ហិរញ្ញវត្ថុ និងសវនកម្មនៃរដ្ឋសភាបានមានប្រសាសន៍ថា មូលហេតុដកដំណែងលោកកឹម សុខា ធ្វើឡើងតាមសំណើរបស់តំណាងរាស្ត្រ៣រូប តំណាងឲ្យតំណាងឲ្យតំណាងរាស្ត្រ៦៣រូបមកពីគណបក្សប្រជាជនកម្ពុជា។
លោកបណ្ឌិតរដ្ឋបន្តថា ការដកនេះក៏យោងតាមកំហុស៤គឺទី១. មិនគោរពរដ្ឋធម្មនុញ្ញនៃព្រះរាជាណាចក្រកម្ពុជា។ ទី២. ធ្វើឲ្យមានអសន្តិសុខសង្គម ទី៣.មិនគោរពកិច្ចព្រមព្រៀងថ្ងៃទី២២ ខែកក្កដា ឆ្នាំ២០១៤រវាងគណបក្សឈ្នះឆ្នោតទាំពីរ និងទី៤ យោងតាមសំណើរបស់ប្រជាពលរដ្ឋធ្វើបាតុកម្មនៅមុខរដ្ឋសភាកាលពីថ្ងៃទី២៦ ខែតុលា និងយោងទៅតាមស្នាមមេដៃរបស់ប្រជាពលរដ្ឋចំនួន៣សែននាក់ដាក់ញត្តិមករដ្ឋសភាពិចារណាសុំដកតំណែងលោកកឹម សុខា ចេញពី អនុប្រធានទី១រដ្ឋសភា៕
