តាកែវ ៖ លោក មឹង វីរិយ៉ា ប្រធានមន្ទីរការងារ និងវិជ្ជាជីវៈខេត្ត បានច្រាលចោលការចោទប្រកាន់របស់មន្ត្រីក្រោមឱវាទ។ លោក មឹង វីរិយ៉ា បានបញ្ជាក់ថា ការចោទប្រកាន់ទាំងអស់ គឺជាការមិនពិតទេ។
លោក មឹង វីរីយ៉ា មិនបានបកស្រាយអោយបានច្បាស់នៅឡើយទេ ដោយលោក អះអាងថា រង់ចាំខាងក្រសួង ចុះមកពិនិត្យ នៅរសៀលថ្ងៃទី៥ ខែតុលា ឆ្នាំ២០១៥ នេះ។
គួរំលឹកថា កាលពីពេលថ្មីនេះ មានមន្ត្រីជាង ២០នាក់ ក្នុងចំណោមជាង ៣០នាក់ នៃមន្ទីរការងារ និងបណ្តុះបណ្តាលវិជ្ជាជីវៈ ខេត្តតាកែវ បាននាំគ្នាផ្តិតមេដៃ ស្នើសុំដកប្រធានមន្ទីរការងារ និងបណ្តុបណ្តាលវិជ្ជាជីវៈ លោក មឹង វីរិយ៉ា។ ញត្តិនោះ ដាក់ជូនទៅរដ្ឋមន្ត្រីក្រសួងការងារ និងបណ្តុបណ្តាលវិជ្ជាជីវៈ ដោយចោទប្រកាន់ថា ប្រធានមន្ទីររូបនោះ ប្រើអំណាចគំរាម បំបែកបាក់សាមគ្គី និងញុះញុងឱ្យមន្ត្រីថ្នាក់ក្រោមឈ្លោះគ្នា រហូតមានការប្តឹងផ្តល់ដល់តុលាការទៀតផង។
ក្នុងលិខិតរបស់មន្ត្រីមន្ទីរការងារ និងបណ្តុះបណ្តាលវិជ្ជាជីវៈ ខេត្តតាកែវ ដែលផ្ញើជូនលោក អ៊ិត សំហេង រដ្ឋមន្ត្រីក្រសួងការងារ បានរៀបរាប់ ១០ចំណុច ពីការដឹកនាំដោយប្រើអំណាច គំរាមកំហែង ប្រមាណមន្ត្រីថ្នាក់ក្រោម របស់ លោក មឹង វីរិយ៉ា ប្រធានមន្ទីរការងារ និងបណ្តុះបណ្តាលវិជ្ជាជីវៈ ដូចជា៖
១- ការញុះញុងមន្ត្រីថ្នាក់ក្រោមឲ្យឈ្លោះគ្នា មិនទុកចិត្តគ្នា បំបែកបំបាក់សាមគ្គីរបស់មន្ត្រី រហូត ដល់មានមន្ត្រីខ្លះបានប្តឹងផ្តល់គ្នា ទៅតុលាការ ហើយលោក មឹង វីរិយ៉ា ប្រធានមន្ទីរ បានតាំងខ្លួនធ្វើជា សាក្សីឲ្យមន្ត្រីដើមបណ្តឹង។
២- បានគំរាមមន្ត្រីក្នុងអង្គប្រជុំថា គាត់មានលុយចំនួន ៥.០០០ $ (ប្រាំពាន់ដុល្លារអាមេរិក) សម្រាប់ប្តឹងមន្ត្រីណាម្នាក់ ហ៊ាននិយាយរឿងប៉ះពាល់ដល់កិត្តិយសរបស់គាត់ គាត់នឹងប្តឹងឲ្យជាប់គុករយៈពេល ០២ខែ ទៅ ០៣ ខែ មិនតែប៉ុណ្ណោះ ថែមទាំងនិយាយគំរាមថា គាត់ មានបងប្អូនជាអ្នកធ្វើការធំ និងជាតុលាការ សម្រាប់ជួយគាត់ផង។
៣- បានហៅមន្ត្រីថ្នាក់ក្រោមទៅគំរាមថា ក្នុងមន្ទីរការងារមានបីបក្ស បក្សដែលមានអំណាចគឺ បក្សពួករបស់គាត់ ដូច្នេះបើមន្ត្រីណាចង់រស់បានយូរ ឬចង់មានលុយចាយ ត្រូវចូលជាបក្សពួកគាត់ បើមន្ត្រីណាមានបក្សផ្សេងៗពីគាត់ គាតឲ្យាងាប់គឺត្រូវតែងាប់។
៤- គាត់បានប្រកាសក្នុងអង្គប្រជុំថា គាត់បានជ្រើសរើសមនុស្សជំនិតរបស់គាត់ ដែលហៅថា សេនាដៃស្តាំ និងសេនាដៃឆ្វេង និងមានគិញដាក់គ្រប់ការិយាល័យទាំងអស់ ដូច្នេះបើមន្ត្រីម្នាក់ណាធ្វើអ្វីក៏គាត់ដឹងដែរ សូម្បីតែចាប់មួយក្បាលហើរចូលក៏គាត់ដឹងដែរ។
៥- បានគម្រាមដល់មន្ត្រីថ្នាក់ក្រោមទាំងអស់ថា បើអ្នកណាម្នាក់ ហ៊ានប៉ះពាល់មនុស្សរបស់គាត់ គឺគាត់មិនឲ្យអ្នកនោះមានសេចក្តីសុខឡើយ តែបើហ៊ានត្រូវឆ្លងកាត់គាត់សិន។
៦- ការងារបក្សពួកនិយម មន្ត្រីដែលមិនមែនជាបក្សពួករបស់ពួកគាត់ គាត់ចង់ដក ឬដាក់ តាមអំពើចិត្ត ហើយធ្វើអ្វីតែងតែត្រូវបានស្តីបន្ទោស និងមិនត្រូវបានយកចិត្តទុកដាក់ឡើយ។
៧- បានប្រាប់ទៅមន្ត្រីសរុបរបាយការណ៍ថា បើចង់បានរបាយការណ៍ពីបក្សពួកគាត់ ចាំគាត់សរសេរជំនួសឲ្យ។
៨- គាត់នឹងយកមនុស្សពីក្រៅ ឬពីក្រសួងមកធ្វើជាអនុប្រធានមន្ទីរ ឬប្រធានការិយាល័យ ៕
