ខេត្តត្បូងឃ្មុំ៖ទោះបីជាមានការរឹតបន្តឹងនៅតាមច្រកទ្វារទ្វេភាគីកម្ពុជា -វៀត ណាម ដើម្បីទប់ស្កាត់នូវការនាំទំនិញ គេចពន្ធចេញចូលយ៉ាងណា ក៏នៅតែមានការដឹកជញ្ជូនចេញតាមច្រករបៀងនិងច្រកទ្វេភាគីជារឿយៗ មិនដែលខានឡើយ ។ ជាក់ស្ដែងនៅច្រកដូនរ័ត្ន ស្រុកមេមត់ ខេត្តត្បូងឃ្មុំ គេសង្កេត ឃើញនៅតាមដងផ្លូវក្រាលកៅស៊ូ ត ភ្ជាប់ពីលេខ ៧ មកដល់ព្រំដែនវៀតណាម គឺមានរថយន្តខ្នាតយក្សធំៗសម្រុកដឹកជញ្ជូន ជ័រកៅស៊ូស្អុយចេញទៅលក់នៅប្រទេស វៀតណាមយ៉ាងរំភើយ ឆ្លងកាត់ច្រកទ្វេភាគីដូនរ័ត្នយ៉ាងស្រួលៗ មិនរំខានដល់សមត្ថកិច្ចដែលប្រចាំច្រកនោះទេ។
បើតាមប្រភពបានបង្ហើបអោយដឹងថា គយច្រកដូនរ័ត្នលោក គង់ សារឿន គឺជាអ្នកចាត់ចែងធំបំផុតក្នុងផលប្រយោជន៍ អំពីបញ្ហាជ័រកៅស៊ូស្អុយនិងផលិត ផលទំនិញផ្សេងៗចេញ-ចូលតាមច្រកដូនរ័ត្ននេះអ្នកដែលអស់លោកមន្ត្រីគយទទួលបានផលប្រយោជន៍ គឺគេអនុញ្ញាតឲ្យឆ្លងដែនដោយស្រួល ដោយឡែកអ្នកដែលមិនបានផលប្រយោជន៍មិនត្រូវអនុញ្ញាតនោះទេត្រូវអោយត្រឡប់ថយក្រោយ យកជ័រស្អុយទៅលក់ឲ្យរោងចក្រមួយកន្លែងនៅឯស្រុកតំបែរមិនខានឡើយគេតែងតែឃើញទិដ្ឋភាពយ៉ាងដូច្នេះកើតមាននៅច្រកទ្វេភាគីដូនរ័ត្នជារៀងរាល់ថ្ងៃ។
ប្រជាពលរដ្ឋនៅតំបន់នោះបានបន្តឲ្យដឹងថា តាមផ្លូវក្រាលកៅស៊ូក្នុងឃុំរូង ស្រុកមេមត់ ខេត្តត្បូងឃ្មុំកន្លងទៅគេសង្កេត ឃើញឈ្មួញធំៗដឹកជ័រកៅស៊ូស្អុយដែលមើលទៅជាលក្ខណៈគ្រួសារ យកទៅលក់នៅប្រទេសវៀតណាមចេញតាមច្រកទ្វេភាគីដូនរ័ត្ន ដោយមិនមានការរារាំងណាមួយពីកម្លាំងមន្ត្រីសមត្ថកិច្ចក៏ដូចជាកម្លាំងគយប្រចាំច្រកនោះទេ? ដោយគេលើកហេតុផលថា លក្ខណៈតូចតាចគ្រួសារតែ ប៉ុណ្ណោះដែលពលរដ្ឋលក់គ្រាន់បានលុយដោះស្រាយជីវភាពគ្រួសារ។
ប្រភពបានទម្លាយឲ្យដឹងទៀតថា ជាក់ស្ដែងមានរថយន្តវេរអងខ្នាតយក្សចំនួន២គ្រឿងដឹកជ័រកៅស៊ូស្អុយ រាប់ រយតោនចេញពីប្រទេសកម្ពុជា ដោយ បើកតាមផ្លូវក្រាលកៅស៊ូកាលពីថ្មីៗនេះ ដោយចេញទៅបន្ត បន្ទាប់គ្នា។ នៅតាម ដងផ្លូវគេឃើញមានកម្លាំងសមត្ថកិច្ចបានឲ្យរថយន្តដឹកជ័រកៅស៊ូនេះឈប់ ហើយថតរូបបន្ទាប់ មកអនុញ្ញាតឱ្យរថយន្តនេះបន្ត ដំណើរទៅមុខទៀត ។ គេឃើញមានកម្លាំងសមត្ថកិច្ចក៏ដូចជាគយប្រចាំច្រកដូនរត័្ន បានបើកបារ៉ាស់ចំហយ៉ាងធំដោយឱ្យរថយន្តដឹក ជ័រកៅស៊ូដែលមិនទាន់កែច្នៃនេះ ចូលទៅក្នុងប្រទេសវៀតណាមយ៉ាងរំភើយតែម្ដង គឺមិនមានការទប់ស្កាត់នោះទេ។
សូមបញ្ជាក់ថា កន្លងមកមានរថយន្តដឹក ជ័រកៅស៊ូធុនតូចជាងនេះចំនួនពីរថយន្តបម្រុងនឹងឆ្លងដែនចូលទៅកាន់ប្រទេស វៀតណាមតាមច្រកក្នុងស្រុកមេមត់ តែត្រូវបានកម្លាំងជំនាញគយ បានឃាត់រថយន្តទាំងពីរគ្រឿងមិនឲ្យចេញទៅ វៀតណាមនោះទេ ហើយបានឲ្យម្ចាស់ជ័រ កៅស៊ូនាំយកមកលក់នៅសិប្បកម្មកែច្នៃកៅស៊ូក្រែបមួយកន្លែងក្នុងស្រុកតំបែរ ដោយតម្រូវឲ្យចេញជាកៅស៊ូក្រែបសិនទើបអនុញ្ញាតឲ្យចេញទៅវៀតណាម៕