ខេត្តកោះកុង ៖ សេចក្តីរាយការណ៏ពីមន្ត្រីនគរបាលច្រកចាំយាម បានឲ្យដឹងថា ក្នុងនាមជាមេកើយលោក កៅ សារ៉ាណា មិនសូវមានមុខនៅប៉ុស្តិ៍ប្រចាំការទេ ហើយភាគច្រើននៅរាជធានីភ្នំពេញ ដើរលេង ជិតដាច់ខែទើបទៅប្រមូលលុយ។ លោក កៅ សារ៉ាណា បានកំណត់ឲ្យកូនចៅរកលុយឲ្យខ្លួនក្នុងមួយខែជាង១ម៉ឺនដុល្លារ បើមិនដូច្នេះទេអាចប្រឈមនឹងការដកចេញពីប៉ុស្តិ៍ ។ ដោយមានការគាបសង្កត់បែបនេះហើយទើបកូនចៅលោក កៅ សារ៉ាណា តម្រូវឲ្យរថយន្តដឹកទំនិញចូលពីប្រទេសសៀម បង់លុយក្នុង១គ្រឿង៥ម៉ឺនរៀល ដោយមានការបែងចែកជាបីគោលដៅ។ សូម្បីតែលុយប្រថាប់ត្រាក៏លោក កៅ សារ៉ាណា កំណត់ឲ្យកូនចៅរកឲ្យបាន៤៣ម៉ឺនរៀលក្នុងមួយថ្ងៃ ។
រឿងអាស្រូវពុករលួយរបស់លោក កៅ សារ៉ាណា មេប៉ុស្តិ៍ច្រកអន្តរជាតិចាំយាម ត្រូវបានកូនចៅក្រោមឱវាទលាតត្រដាងជាយូរមកហើយ។ ប៉ុន្តែមិនទាន់ឃើញលោកសុខផលដែលជាមេកើយចាត់វិធានការលើមន្ត្រីនគរបាលពុករលួយរូបនេះនៅឡើយទេ។ បញ្ហានេះបានធ្វើឲ្យលោក កៅ សារ៉ាណា បន្តប្រព្រឹត្តអំពើពុករលួយកាន់តែខ្លាំងឡើងៗ ហើយស៊ីដាច់លុយកូនចៅក្រោមឱវាទស្រេចតែអំពើចិត្តរបស់ខ្លួន។ លោក កៅ សារ៉ាណា បានប្រើប្រាស់តួនាទីជាមេប៉ុស្តិ៍ច្រកអន្តរជាតិចាំយាម ប្រមូលលុយធ្វើមានធ្វើបានផ្ទាល់ខ្លួនស៊ីចាយហ៊ឺហា មិនខ្វល់ពីទុក្ខលំបាករបស់មន្ត្រីក្រោមឱវាទទេ។
ប្រភពពីមន្ត្រីនគរបាលប៉ុស្តិ៍ច្រកអន្តរជាតិចាំយាម បានឲ្យដឹងថា ក្រៅពីបង្ខំឲ្យកូនចៅរកចំណូលឲ្យខ្លួនក្នុងមួយខែជាង១ម៉ឺនដុល្លារ គឺលោក កៅ សារ៉ាណា បានទទួលបានផលប្រយោជន៍ ពីឈ្មួញ និងក្រុមហ៊ុនដែលនាំចូលទំនិញគេចពន្ធ ទំនិញខុសច្បាប់ផងដែរ។ អំពើពុករលួយរបស់លោក កៅ សារ៉ាណា ក្នុងការទទួលសំណូកពីក្រុមហ៊ុន និងឈ្មួញនាំចូលទំនិញគេចពន្ធ ទំនិញខុសច្បាប់ បានធ្វើឲ្យរដ្ឋខាតបង់ចំណូលពន្ធយ៉ាងច្រើនសន្ធឹកសន្ធាប់ក្នុងមួយខែៗ។ បញ្ហានេះលោកសុខផលដែលជាមេត្រូវចាត់វិធានការលើបុគ្គល កៅ សារ៉ាណា ជាបន្ទាន់ ។យ៉ាងណាក៏ដោយសារពត៌មានយើង មិនទាន់ទំនាក់ទំនងពីមន្ត្រីពុករលួយលោក កៅ សារ៉ាណាបានទេ៕