ភ្នំពេញ៖ នៅព្រឹកថ្ងៃទី៣១ ខែកក្កដា ឆ្នាំ២០១៥នេះលោក ប៉ា សុជាតិវង្ស អភិបាលរាជធានីភ្នំពេញបានចុះទៅកាន់ផ្សារដើមគរដោយផ្ទាល់ក្នុងបំណងសាកសួរមតិយោបល់ពីក្រុមអាជីវករលើគម្រោងអភិវឌ្ឍផ្សារដើមគរឲ្យទៅជាផ្សារទំនើបមួយមានសោភណភាពក្នុងរាជធានីភ្នំពេញ។
លោក ប៉ា សុជាតិវង្ស បានអះអាងប្រាប់ទៅក្រុមអាជីវករថា គម្រោងសាងសង់ ផ្សារដើមគរ រាល់ការចំណាយទាំងអស់ជាបន្ទុករបស់រដ្ឋ ហើយក្រោយពេលសាងសង់បញ្ចប់ជាស្ថាពរ គ្រប់អា ជីវករ ដែលមានតូបលក់នាពេលបច្ចុប្បន្ន គឺនឹងប្រគល់តូបឲ្យដូចបច្ចុប្បន្នដដែល។
លោក ប៉ា សុជាតិវង្ស បានបញ្ជាក់ពីមូលហេតុនៃការចង់សង់ផ្សារថាជាថ្មីទៀតថា គម្រោងសាងសង់ផ្សារដើមគរ គឺចង់ប្រែក្លាយផ្សារនេះឲ្យមានសោភ័ណភាពនិងចង់រៀបចំសណ្តាប់ធ្នាប់របៀបរៀបរយក្នុងការលក់ឲ្យ បានប្រសើរជាងពេលបច្ចុប្បន្ន ។
ផ្សារដើមគរ គឺកន្លែងចែកចាយទំនិញបន្លែផ្លែឈើ ត្រីសាច់ ដ៏ធំមួយក្នុងរាជធានីភ្នំពេញ ទៅតាមបណ្តាផ្សារនានា ទាំងក្នុងរាជធានីភ្នំពេញ និងតាមបណ្តាខេត្តផងដែរ។
សូមបញ្ជាក់ថា ក្រុមអាជីវករផ្សារដើមគរកាលពីពេលថ្មីៗបាននាំគ្នាបិទតូបឡើងទៅតវ៉ាដល់មុខសាលារាជធានីភ្នំពេញ បន្ទាប់ពីទទួលបានដំណឹងពីការអភិវឌ្ឍន៍ផ្សារមួយនេះ។ លើកនេះ ក៏ដូចជាលើកមុនពេលជួបអាជីវករនៅសាលារាជធានីដែរ លោក ប៉ា សុជាតិវង្ស បានប្រាប់ក្រុមអាជីវករថា គម្រោងអភិវឌ្ឍន៍ផ្សារដើមគរ នឹងធ្វើទៅតាមការសម្រេចចិត្តរបស់ក្រុមអាជីវករ ពោលប្រសិនបើការស្ទង់មតិរកឃើញថា អាជីវករភាគច្រើនចង់បានផ្សារថ្មី នោះរដ្ឋនឹងធ្វើការសាងសង់តែបើអាជីវករមិនចង់ឲ្យសាងសង់ទេ នោះរដ្ឋក៏ធ្វើទៅតាមហ្នឹងផងដែរ ៕
