ខេត្តតាកែវ ៖ តាមប្រភពពីប្រជាពលរដ្ឋស្រុកអង្គរបូរីបានអោយដឹងថា ឈ្មួញបាននាំ ជ្រូកងាប់និងជ្រូកមានជំងឺចូលយ៉ាងអាណាធិបតេយ្យដោយមិនបានឆ្លងកាត់មន្ត្រីជំនាញត្រួតពិនិត្យត្រឹមត្រូវនោះឡើយ។ ប្រជាពលរដ្ឋបានបន្តទៀតថា ឈ្មួញទាំងនេះបានបញ្ជូនជ្រូកចូលទៅក្នុងទីផ្សារក្នុងខេត្តតាកែវនិងទីផ្សារតាមបណ្តារស្រុកមួយចំនួនទៀតក្នុងទឹកដីខេត្តតាកែវ។ប្រជាពលរដ្ឋបានត្អូញត្អែរថា បើការនាំ ចូលនូវជ្រូកងាប់ជ្រូកមានជំងឺគ្មានការពិនិត្យត្រឹមត្រូវពីមន្ត្រីជំនាញវាពិតជាធ្វើអោយប៉ះពាល់ដល់សុខភាពប្រជាពលខ្មែរយ៉ាងខ្លាំងនិងធ្វើអោយខាតបង់សេដ្ឋកិច្ចជាតិយ៉ាងធ្ងន់ធ្ងរទៀតផង។
លោក ប៉ោ លាងគង់ ប្រធានកាំកុងត្រូល ខេត្តតាកែវ បានមានប្រសាសន៍ថា ការនាំជ្រូកចូលតាមច្រករបៀងដោយមិនបានឆ្លងកាត់តាមច្រកអន្តរជាតិវាជាការខុសច្បាប់។ លោកបានបន្តទៀតថាក្នុងការពិនិត្យទំនិញទាំងនេះលោកពុំទាន់មានកំលាំងគ្រប់គ្រាន់ដើម្បីទប់ស្កាត់បទល្មើសតាមច្រករបៀងនៅឡើយទេ។
តាមប្រភពពីមន្ត្រីបសុសត្វខេត្តតាកែវដែលលោកបានស្នើសុំមិនបញ្ចេញឈ្មោះម្នាក់បាននិយាយថាការនាំជ្រូកចូលតាមទូកនៅក្នុងច្រកបូរីជលសារវាជារឿងយូរមកហើយ ហើយនេះជាការស្នើសុំរបស់អាជ្ញាធរខេត្តអោយមានការយោគយល់ទើបមន្ត្រីបសុសត្វខេត្តពុំមានវិធានការបង្កាប។លោកបានបន្តថា ឈ្មួញនាំជ្រូកបានបង់លុយទៅអោយអាជ្ញាធរខេត្តជាង៥០លានរៀល ក្នុងរយៈពេល១០ខែ ដូច្នេះហើយឈ្មួញមិនខ្លាចមន្ត្រីជំនាញពាក់ព័ន្ធឡើយ។
ចំណែកលុយចំនួនជាង៥០លានរៀលដែលបានមកពីឈ្មួញនាំជ្រូកចូលពុំឃើញ អាជ្ញាធរខេត្តយកទៅធ្វើការអភិវឌ្ឍន៍អ្វីឡើយ។
ទាក់ទិននឹងព័ត៌មានខាងលើ អ្នកសារព័ត៌មានយើងមិនអាចសុំការបំភ្លឺពីអាជ្ញាធរខេត្តបានទេ ៕