សាលារាជធានីភ្នំពេញ បានជំរុញឲ្យមន្ត្រីជំនាញពន្លឿនការស្ថាបនាសួនរង្វង់មូលជ្រោយចង្វាទាំងនៅត្រើយខាងលិច និងខាងកើត ដើម្បីឲ្យទាន់ការដាក់សម្ពោធស្ពានជ្រោយ ចង្វាទីពីរនៅ ដើមខែតុលាខាងមុខនេះ។
មន្ត្រីជំនាញសាលារាជធានីភ្នំពេញបានឲ្យដឹងថា សួនច្បាររង្វង់មូលគល់ស្ពាន ជ្រោយចង្វារ ត្រើយខាងលិចស្ថាបនាបាន៩៨ភាគរយហើយ ហើយគ្រោងបព្ចាប់នៅពាក់កណ្តាលខែកក្កដាខាងមុខនេះ ខណៈដែលសួនរង្វង់មូលជ្រោយចង្វារត្រើខាងកើត ទើបតែស្ថាបនារួចបានត្រឹមតែ៥៥ភាគរយ ហើយដោយគ្រោយឲ្យចប់រួចរាល់នៅមុនខែតុលាខាងមុខ។
លោក សាំ ពិសិដ្ឋ ប្រធានមន្ទីរសារធារណៈការ និងដឹកជញ្ជូនរាជធានីភ្នំពេញបានបញ្ជាក់ថា ការស្ថាបនាសួនត្រើយខាងកើត ប្រើរយៈពេលយូរដូច្នេះ ដោយសារសួននេះត្រូវបានលម្អ ដោយរូបសំណាក់ ព្រហ្មបាយ័ន ឬព្រហ្មមុខបួន ដែលមានកំពស់៩.១៨ម៉ែត្រ ទទឹង ៥.៤០ម៉ែត្រ និងក្បាលនាគចំនួន៦បន្ថែមទៀត។ លោកបញ្ជាក់ថា មកដល់ពេលនេះ ក្រុមអ្នកជំនាញកំពុងធ្វើសកម្មភាពមមាញឹកដាប់ថ្មភ្នំឆ្លាក់រូប និងការស្ទូច តម្លើង បន្តុបលើគ្នា រួមជាមួយនឹងការត្រៀមលក្ខណៈ ការរចនាសួនច្បារនិងការដាំកូនផ្ការនិងកូនឈើតូចៗឲ្យមានលក្ខណៈលើកស្ទួយស្រស់ស្អាតបន្ថែម ។ ដោយឡែកសំរាប់ សួនរង្វង់មូលត្រើយខាងលិចវិញ កម្មករជំនាញកំពុងតម្លើងបង្គោលភ្លើងបំភ្លឺការរៀបចំក្រាលថ្មម៉ាប ។
លោកបានបញ្ជាក់ថា ការកែលម្អ និងការស្ថាបនាសួនច្បារទាំងពីរនេះ មានសារៈសំខាន់ដោយ មិនត្រឹមតែជួយសម្រួលការកក់ស្ទះចរារណ៍នៅចំនុចប្រសពទាំងពីរនេះ ឲ្យកាន់តែមានភាពងាយស្រួលក្នុងការធ្វើដំណើរប៉ុណ្ណោះទេ ប៉ុន្តែវាថែមទាំងជួយលើកកម្ពស់សោភណ្ឌភាពបរិស្ថាន ក្នុងរាជធានីភ្នំពេញបន្ថែមទៀត ដើម្បីទាក់ទាញភ្ញៀវទេសចរណ៍បានកាន់តែច្រើន។ មួយវិញទៀត ចំនែកនៅ សួនច្បាររង្វង់មូលត្រើយខាងកើត គឺបង្ហាញពីប្រវត្តិសាស្ត្ររបស់ខ្មែរដ៏ល្អផូផង់ តាមរយៈរូបសំណាក់ព្រះព្រហ្ម ដែលបានឆ្លាក់យ៉ាងល្អប្រណិតស្របទៅនឹងរចនាបថខ្មែរ។
សូមបញ្ជាក់ថា៖ តាមផែនការសួនច្បាររង្វង់មូលជ្រោយចង្វារទាំងពីរនេះនឹងបើកសម្ពោធជាផ្លូវការនៅក្នុងរង្វង់ខែតុលាខាងមុខ ជាមួយនឹងស្ពានជ្រោយចង្វារទីពីរដែលបានស្ថាបនាដោយក្រុមហ៊ុនចិន ហើយសម្តេចតេជោហ៊ុនសែននាយករដ្ឋមន្ត្រីនៃព្រះរាជាណាចក្រកម្ពុជានឹងមានវត្តមានជាគណៈអធិបតីភាពដ៏ខ្ពង់ខ្ពស់បើកសម្ពោធជាផ្លូវការក្នុងពិធីនោះ៕
ដោយ អុង សាវុធ
