ខេត្តតាកែវ ៖ ប្រជាពលរដ្ឋ ស្រុកបូរីជលសារ ស្រុកកោះអណ្តែត និងស្រុកអង្គរបូរីខេត្តតាកែវបានព្រួយបារម្មណ៍ពីការអនុញ្ញាតិអោយជនជាតិវៀតណាមចូលធ្វើស្រែក្នុងទឹកដីប្រទេសកម្ពុជាដែលមានការពារសុវត្តិភាពយ៉ាងល្អប្រសើរពីសំណាក់អាជ្ញាធរដែនដីខេត្តតាកែវ។
ប្រជាពលរដ្ឋបាននិយាយថា ជនជាតិវៀតណាមរាប់រយគ្រួសារបានចូលមកធ្វើស្រែយ៉ាងអាណាធិបតេយ្យនៅក្នុងទឹកដីស្រុក បូរីជលសារ ស្រុកកោះអណ្តែត និងស្រុកអង្គរបូរីក្នុងខេត្តតាកែវដែល មានដីស្រែប្រាំងរាប់ម៉ឺនហិកតាត្រូវបានប្រជាពលវៀតណាមចូលមកធ្វើ ហើយដីស្រែទាំងនោះត្រូវបានរៀបចំយ៉ាងយកចិត្តទុកនៅប្រព័ន្ធធារាសាសន៍មានទឹកគ្រប់គ្រាន់និងពួកគេធ្វើស្រែបានបីដងក្នុងមួយឆ្នាំ ។
ពលរដ្ឋនៅក្នុងស្រុកបូរីជលសារបាននិយាយថា ជនជាតិវៀតណាមបានចូលមកធ្វើស្រែ នៅក្នុងភូមិក្រគរ ឃុំបូរីជលសារ ស្រុកបូរីជលសារ ចាប់ពីខែទឹកស្រកគឺចាប់ពីខែ ១១រហូតដល់ខែទឹកឡើង ក្នុងខែ៨។ក្នុងអំឡុងពេលជនជាតិវៀតណាមចូលមកធ្វើស្រែពួកគេបាននាំ មកនូវថ្នាំពលសំរាប់សំលាប់សត្វល្អិតដែលគ្មានការត្រួតពិនិត្យត្រឹមត្រូវពីមន្ត្រីជំនាញ គ្រឿងយន្តសំរាប់ដំណើរការកសិកម្ម និងបង្កអោយមានផលប៉ះពាល់បរិស្ថានដីនិងទឹកនិងជាពិសេសធ្វើអោយខាតបង់នូវចំណូលពន្ធចូលរដ្ឋយ៉ាងច្រើនសន្ធឹកសន្ទាប់ទៀតផង។
ប្រជាពលរដ្ឋបានសំណួមពរដល់ ថ្នាក់ដឹកនាំខេត្តតាកែវអោយធ្វើការពន្យល់ដល់ពួកគាត់ពីមូលហេតុដែលនាំអោយជនអន្តប្រវេសន៍វៀតណាមទាំងនេះចូលមកធ្វើស្រែលើដីខ្មែរក្នុងអំឡុងពេលដែលប្រជាពលខេត្តតាកែវខ្វះទឹកនិងគ្រួសារមួយចំនួនគ្មានដីស្រែធ្វើ និងពួកគាត់បានចំណាកស្រុកទៅធ្វើការនៅក្រៅប្រទេសដែលប្រឈមនិងគ្រោះថ្នាក់ជាយថាហេតុ៕