ភ្នំពេញ: មន្ត្រីរាជរដ្ឋាភិបាលមួយរូប និយាយថា ការប៉ុនប៉ងរារាំងគម្រោងបូមស្តារដីដុះ នៅចុងជ្រោយចង្វាម្តងហើយម្តងទៀត ដោយមន្ត្រីក្រសួងរ៉ែនិងថាមពលនោះ គឺដូចជា បានប្រឆាំងទៅនឹងការសម្រេចរបស់សម្តេចនាយករដ្ឋមន្ត្រីហើយ ហើយបើគេនៅតែបន្តធ្វើឲ្យរាំងស្ទះទៀត នឹងត្រូវធ្វើរបាយការណ៍ដាក់ជូនសម្តេចនាយករដ្ឋមន្ត្រីហើយ។
ម្រោងជីកបូមស្តារដីល្បាប់ដុះនៅចុងជ្រោយចង្វារ និងកោះគ្របបាយ ដែលសម្តេចនាយករដ្ឋមន្ត្រី បានប្រគល់សិទ្ធិឲ្យសាលារាជធានី ជា អ្នកអនុវត្ត ដោយគ្មានខ្ទង់ថវិកាសម្រាប់ចំណាយ បានចាប់ផ្តើមបន្ទាប់ពីមានការកំណត់បទដ្ឋានបច្ចេកទេសពីក្រសួងជំនាញ តែសកម្មភាពការងារ ត្រូវបានគេមើលឃើញថា ប្រព្រឹត្តទៅមិនទាន់រលូននៅឡើយទេ ដោយសារក្រសួងរ៉ែនិងថាមពល ដែលគ្មានភារកិច្ចនៅក្នុងគម្រោងនេះ បានចេញមករារាំង។
សកម្មភាពបូមស្តារដីល្បាប់ដុះនៅចុងជ្រោយចង្វារ និងកោះគ្របបាយ នៅក្នុងទន្លេចតុមុខ ដោយក្រុមហ៊ុនឯនជនពីរផ្សេងគ្នា បានចាប់ផ្តើមហើយ បន្ទាប់ពីមានការអនុញ្ញាតពីសាលារាជធានីភ្នំពេញ ក្រោយពេលទទួលបានការកំណត់បទដ្ឋានបច្ចេកទេសពីក្រសួងធនធានទឹក និង ចំណាររបស់សម្តេចនាយករដ្ឋមន្ត្រី ឲ្យបូមស្តារសម្អាតដីចុងជ្រោយចង្វារជាបន្ទាន់រួចមក។
លោកចាន់ យុត្ថា អ្នកនាំពាក្យនិងជានាយកខុទ្ទកាល័យក្រសួងធនធានទឹកនិងឧតុនិយម ឲ្យដឹងនៅថ្ងៃទី៥ខែមិថុនាឆ្នាំ២០១៥ថា ក្រសួងធនធានទឹកបានចេញបទដ្ឋានបច្ចេកទេស សម្រាប់ការបូមស្តារដីល្បាប់ដុះ នៅចុងជ្រោយចង្វា តាមការស្នើសុំសាលារាជធានីរួចហើយ។ ដីល្បាប់ដុះនៅចុងជ្រោយចង្វា និងកោះគ្របបាយ ដែលរុលចូលកាន់តែជ្រៅ ទៅក្នុងទន្លេចតុមុខ ហើយក្លាយជាឧបសគ្គដល់ផ្លូវនាវាចរណ៍ចរន្តទឹក និងចរាចររបស់មច្ចាជាតិជាច្រើនឆ្នាំមកហើយនោះ ត្រូវបានសម្តេចនាយករដ្ឋមន្ត្រី ប្រគល់ភារកិច្ចឲ្យសាលារាជធានីភ្នំពេញ បូមស្តារចេញឲ្យអស់ ដោយសហការ (បច្ចេកទេស) ជាមួយក្រសួងធនធានទឹក។
មន្ត្រីមួយរូប ដែលធ្វើការពាក់ព័ន្ធនឹងការងារបូមស្តារដីល្បាប់ដុះ នៅចុងជ្រោយចង្វា និងកោះគ្របបាយ បាននិយាយឲ្យដឹងនៅថ្ងៃទី៥ខែមិថុនាថា សកម្មភាពបូមដីល្បាប់ដុះនៅចុងជ្រោយចង្វានិកោះគ្របបាយ កំពុងត្រូវបានរំខានពីមន្ត្រីក្រសួងរ៉ែនិងថាមពល ដែលប៉ុនប៉ងយកថ្លៃសួយសារ និងតម្លៃអត្ថប្រយោជន៍បន្ថែម ពីដីល្បាប់និងល្បាប់លាយខ្សាច់ ដែលបានដឹកចេញពីចុងជ្រោយចង្វា ទៅចាក់នៅទីតាំងដែលមិនមែនជាកម្មសិទ្ធិរបស់សាលារាជធានី។
ប្រភពខាងលើ បាននិយាយឲ្យដឹងទៀតថា ក្រសួងរ៉ែនិងថាមពល បានប្រាប់សាលារាជធានីភ្នំពេញថា ប្រសិនបើដីល្បាប់និងល្បាប់លាយខ្សាច់ ដែលបូមចេញពីចុងជ្រោយចង្វា និងកោះគ្របបាយ យកទៅបម្រើផលប្រយោជន៍របស់សាលារាជធានីនោះ ក្រសួងមិនយកតម្លៃសួយសារនិងតម្លៃអត្ថប្រយោជន៍បន្ថែមទេ តែបើយកទៅលក់ត្រូវបង់សួយសារ និងតម្លៃអត្ថប្រយោជន៍បន្ថែមហើយ។
ក្រុមអ្នកទទួលបានសិទ្ធិពីសាលារាជធានីភ្នំពេញ ក្នុងការធ្វើការបូមស្តារដីល្បាប់ដុះនៅចុងជ្រោយចង្វា និងកោះគ្របបាយ និយាយឲ្យដឹង នៅថ្ងៃទី៥ខែមិថុនាថា ការបូមស្តារដីដុះនៅចុងជ្រោយចង្វានេះ រដ្ឋមិនបានចេញចំណាយទៅលើពលកម្មប្រេង និងគ្រឿងចក្រសម្រាប់បូមស្តារនេះទេ។ ក្រុមអ្នកទទួលបានសិទ្ធិបូមស្តារបានដីល្បាប់និងល្បាប់ខ្សាច់ ពីការបូមស្តារនេះ ជាថ្នូរនឹងការចំណាយរបស់សាលារាជធានី។ ដីល្បាប់និងល្បាប់ខ្សាច់ ដែលបានដឹកចេញទៅស្តុកនៅប្រាំពីរគោលដៅផ្សេងគ្នា តាមដងទន្លេសាប ទន្លេមេគង្គក្រោម និងទន្លេបាសាក់ ដោយពុំទាន់ហ៊ានចាត់ចែងបែបណានៅឡើយទេ ព្រោះខាងក្រសួងរ៉ែនិងថាមពល ប្រាប់ថា ដីល្បាប់និង ល្បាប់ខ្សាច់នេះ ត្រូវបង់តម្លៃសួយសារនិងតម្លៃអត្ថប្រយោជន៍បន្ថែម ដោយមិនដឹងថាត្រូវបង់កម្រិតណា។
ប្រភពព័ត៌មានពីសាលារាជធានីភ្នំពេញ បានឧ្យដឹងថា តម្លៃសួយសារនិងតម្លៃអត្ថប្រយោជន៍បន្ថែម ដែលក្រសួងរ៉ែនិងថាមពល គ្រោងយកទៅលើដីល្បាប់និងល្បាប់ខ្សាច់ ដែលបូមចេញពីចុងជ្រោយចង្វានោះ សាលារាជធានី កំពុងតែធ្វើការសម្របសម្រួល ព្រោះការបូមស្តារនេះ រដ្ឋគ្មានលុយសម្រាប់ចំណាយទេ គឺមានតែធ្វើតាមរបៀបយកស្លឹកត្នោតខ្ចប់ស្ករត្នោត។
លោកឡុង ឌីម៉ង់ អ្នកនាំពាក្យសាលារាជធានីភ្នំពេញ និយាយឲ្យដឹងនៅថ្ងៃទី៥ខែមិថុនាឆ្នាំ២០១៥ថា ការជីកស្តារនិងបូមដីល្បាប់នៅចុងជ្រោយចង្វា ដែលធ្វើដោយក្រុមហ៊ុនឯកជន មានការអនុញ្ញាតពីសាលារាជធានីភ្នំពេញ និងសាលារាជធានី បានជូនដំណឹងរួចហើយ អំពីសកម្មភាពជីកបូមស្តារដីល្បាប់នៅចុងជ្រោយចង្វានិងកោះគ្របបាយនោះ។ ការបូមស្តារនេះ សាលារាជធានីពុំមានលុយសម្រាប់ចំណាយទេ គឺប្រគល់ឲ្យក្រុមហ៊ុនឯកជនធ្វើទៅតាមបច្ចេកទេស ៕