ភ្នំពេញ ៖ លោកឧកញ៉ា ទ្រី ភាព ឈ្មួញល្បីឈ្មោះខាងរកស៊ីឈើនៅក្នុងប្រទេសកម្ពុជា បានធ្វើពិធីសែនព្រេនជាមួយនារីវ័យក្មេងម្នាក់កាលពីថ្ងៃទី ១៨ ខែឧសភា នៅក្នុងគេហដ្ឋានផ្ទាល់ខ្លួន ស្ថិតនៅក្នុងសង្កាត់បឹងកេងកង ១ ខណ្ឌចំការមន បន្ទាប់ពីគូស្វាមីភរិយានេះបានរស់នៅជាមួយគ្នាអស់រយៈពេលជាង ៤ ឆ្នាំមកហើយ។ នេះបើយោងតាមប្រភពដែលសុំមិនបញ្ចេញឈ្មោះបានថ្លែងឲ្យដឹងថា លោកឧកញ៉ា ទ្រី ភាព បានធ្វើពិធីសែនព្រេនបង្គ្រប់កិច្ចទៅតាមប្រពៃណីខ្មែរនៅឯគេហដ្ឋានរបស់ លោកនៅក្នុងសង្កាត់បឹងកេងកង ១ ខណ្ឌចំការមន រាជធានីភ្នំពេញ ជាមួយនឹងកូនស្រីឈ្មោះ គៀន ស្រីនាង។
នៅក្នុងពិធីសែនព្រេននោះគឺមានការចូលរួមពីរដ្ឋមន្ត្រីក្រសួង បរិស្ថាន និងមន្ត្រីមួយចំនួនមកពីក្រសួងកសិកម្ម រុក្ខាប្រមាញ់ និងនេសាទ មន្ត្រីរដ្ឋបាលព្រៃឈើ និងបុគ្គលិកមួយចំនួនរបស់ក្រុមហ៊ុនលោកឧកញ៉ា ទ្រី ភាព ផងដែរ។
លោកបាន ថ្លែងថា៖ «គាត់បានរស់នៅជាមួយស្ត្រីម្នាក់នោះបានកូនស្រីមួយអាយុ ៤ ឆ្នាំហើយ ទើបគាត់សម្រេចចិត្តសែនព្រេនឲ្យត្រូវតាមប្រពៃណីខ្មែរ»។
ប្រភពដដែលបានថ្លែងឲ្យដឹងថា ចំពោះពិធីសែនព្រេនបង្គ្រប់កិច្ចទៅតាមប្រពៃណីខ្មែរនោះគឺពុំមានបញ្ហាជាមួយនឹងភរិយារបស់លោកឧកញ៉ានោះទេ ដោយសារលោកឧកញ៉ា បានលែងលះជាមួយនឹងភរិយាដើមរបស់គាត់យូរណាស់មកហើយ ដូច្នេះពិធីសែនបង្គ្រប់កិច្ចនេះគឺអាចចាត់ទុកថាជាពិធីផ្លូវការដែលទទួលយកខាងស្រីជាភរិយាស្របច្បាប់។
ប្រភពដដែលថា៖ «បើតាមផ្លូវច្បាប់គឺលោកឧកញ៉ាបានចុះអេតាស៊ីវិលជាប្តីប្រពន្ធរួចហើយ ប៉ុន្តែពិធីនេះគឺគ្រាន់តែឲ្យសាច់ញាតិទាំងសងខាងដឹងឮ និងបុគ្គលិករបស់ក្រុមហ៊ុនដឹងឮតែប៉ុណ្ណោះ»៕
