ខេត្ដកណ្ដាល ៖ បឹងមួយកន្លែងនៅក្នុង ឃុំពោធិ៍បាន ស្រុកកោះធំ ខេត្ដកណ្ដាល ដែលរាជរដ្ឋាភិបាលបានកាត់ចេញពីឡូត៍ នេសាទរបស់រដ្ឋហើយប្រគល់ឱ្យពលរដ្ឋនេសាទនោះឥឡូវនេះកំពុងរត់ការលក់ ។
ប្រជាពលរដ្ឋច្រើនភូមិដែលបាន ទទួលប្រាក់ពីឈ្មួញគួកជេដីចូលរួមដាក់ពាក្យប្ដឹងជំទាស់ ព្រោះការទទួលលុយនោះ ឈ្មួញដីប្រាប់ថា ជាអំណោយដោយមិន ដឹងថាគេយកឈ្មោះប្រជាពលរដ្ឋថាជា អ្នកលក់ដីបឹងធំនោះទេ ។ បញ្ហាលក់ដីបឹង ធំនេះអភិបាលខេត្ដកណ្ដាលសន្យាស្វែង រកការពិតនិងដកហូតដីទុកជាសម្បត្ដិរដ្ឋវិញ ។
ពលរដ្ឋនិងក្រុមប្រឹក្សាឃុំពោធិ៍ បានស្រុកកោះធំ ខេត្ដកណ្ដាលដាក់ពាក្យ បណ្ដឹងទៅអាជ្ញាធរខេត្ដឱ្យដកហូតដីបឹងធំទំហំជាង៥០០ហិកតាមកទុកជារបស់ រដ្ឋវិញ ។
ការដាក់ពាក្យបណ្ដឹងនេះបានធ្វើឡើងក្រោយពីអ្នកគួកជេដីបឹងធំបានហៅប្រជា ពលរដ្ឋតាមភូមិចំនួន៩ភូមិនៅឃុំពោធិ៍បានឱ្យទៅយកប្រាក់ក្នុង១គ្រួសារចន្លោះពី៥ម៉ឺនទៅ១៤ម៉ឺនរៀលជាថ្នូរឱ្យអ្នកភូមិព្រមលក់ដីបឹងធំ ។
ពលរដ្ឋរស់នៅភូមិថ្មីមិនបញ្ចេញ ឈ្មោះឱ្យដឹងថា ឈ្មួញកណ្ដាលឬអ្នកគួក ជេឈ្មោះនៅ ហាក់ បានហៅអ្នកភូមិ ឱ្យយកអត្ដសញ្ញាណប័ណ្ណនិងផ្ដិតមេដៃ ទទួលប្រាក់អំណោយ៥ម៉ឺនរៀលដែល ប្រជាពលរដ្ឋមិនដឹងថា ជាប្រាក់លក់ដី បឹងធំទេ ។ ប្រជាពលរដ្ឋបានទទួលប្រាក់ ហើយទើបដឹងថា ជាប្រាក់លក់ដីបឹងធំ ។ ក្រោយពីដឹងថាជាប្រាក់លក់ដីបឹងធំពួក គាត់នាំគ្នាដាក់ពាក្យប្ដឹងជំទាស់វិញនិងឱ្យអ្នកកួកជេមកយកប្រាក់ពីពួកគាត់វិញ ប៉ុន្ដែរកមិនឃើញអ្នកគួកជេនោះទេ ។
អភិបាលខេត្ដកណ្ដាលលោក ម៉ៅ ភិរុណ ពន្យល់ថា ដីបឹងធំទើបបានកាត់ មកឱ្យពលរដ្ឋរកនេសាទលក្ខណៈគ្រួសារនៅស្រុកកោះធំ ស្រុកស្អាង ស្រុកលើក ដែក ។ លោកថា ពលរដ្ឋសាមញ្ញគ្មាន សិទ្ធិលក់ដូរដីបឹងធំទេគឺមានតែសិទ្ធិប្រើ ប្រាស់អាស្រ័យផលប៉ុណ្ណោះ ព្រោះជាដី សាធារណៈរបស់រដ្ឋ ។ លោកនឹងដក ហូតដីមកវិញប្រសិនបើរកឃើញថា មានពាក់ព័ន្ធមេឃុំ មេភូមិលក់ដីបឹង នោះ ។ លោកអភិបាលខេត្ដបានមាន ប្រសាសន៍ថា “ប្រហែលជាមេឃុំអ្នក លក់ទេតាមមើលប្រហែលជាប្រជាជនគាត់អ្នកទៅធ្វើអីលើដីហ្នឹង ហើយគាត់ ផ្ទេរចុះផ្ទេរឡើង ឯមេឃុំអាចបញ្ជាក់ ទទួលស្គាល់ថាផ្ទេរការគ្រប់គ្រងពីម្ចាស់មួយទៅមួយវាមានអ៊ីមចឹង ។ ប៉ុន្ដែរឿង ការស៊ីញ៉េលក់-ទិញគឺអត់មានទេហើយ បើសិនជាមានជារឿងមួយមិនស្របទៅតាមការផ្ដល់សេវាទេលើបញ្ហារឿងដីធ្លីសាធារណៈ ។ ដូច្នេះការលក់-ទិញដីនៅ ក្នុងដែនសាធារណៈរបស់រដ្ឋវាមិនស្របទៅតាមច្បាប់ទេ” ។
ជំទប់ទី១ឃុំពោធិ៍បានលោក ឌួង រ៉ន ថ្លែងថា អ្នកគួកជេបានដើរយកប្រាក់ឱ្យ អ្នកភូមិពីភូមិមួយទៅភូមិមួយទៀត ទើបមានការភ្ញាក់ផ្អើលដឹងថា ជាលុយ លក់ដីបឹងធំ ។ លោកបានដាក់ពាក្យស្នើ សុំការពន្យល់ពីមេឃុំពោធិ៍បានកាលពី ថ្ងៃ១៣ ខែឧសភា ឆ្នាំ២០១៥ ។ លោក សាន ម៉េងហួរ ជាមេឃុំបានពន្យល់ក្នុង ការប្រជុំឃុំកាលពីថ្ងៃ១៥ ខែឧសភា ឆ្នាំ ២០១៥កន្លងទៅថា ដីបឹងធំគាត់បាន បែងចែកកាលពីឆ្នាំ២០១២ឱ្យមេភូមិ ចំនួន៩ភូមិគ្រប់គ្រងក្នុង១ភូមិចែកដី ទំហំ៤០ហិកតា ។ លោកថា គាត់ជា មន្ដ្រីឃុំដែរមិនបានដឹងរឿងបែងចែកដីបឹងធំទើបប្ដឹងទាស់សុំឱ្យអាជ្ញាធរខេត្ដនិងរាជរដ្ឋាភិបាលពន្យល់បន្ថែម ។
អ្នកស្រី មឿន ថា មេភូមិថ្មីឱ្យដឹងថា មេឃុំបានប្រគល់ដី៤០ហិកតានៅក្នុង បឹងធំឱ្យគ្រប់គ្រងមែន ប៉ុន្ដែការលក់ដី នោះគឺពលរដ្ឋក្នុងឃុំស្ម័គ្រចិត្ដលក់ដីទៅឱ្យឈ្មួញទិញដីទើបអ្នកភូមិទៅយកលុយពីឈ្មួញដី ។
ចំណែកមេភូមិព្រែកតារដ្ឋលោក ឡាច ម៉ៅ ឱ្យដឹងថា ដីបឹងក្នុងភូមិនោះ លោកទប់ស្កាត់មិនឱ្យពលរដ្ឋទៅទទួល យកលុយពីអ្នកកួកជេដីទេ ។ ក្នុងចំណោម ៩ភូមិនៅសល់តែភូមិព្រែកតារដ្ឋនិង ភូមិព្រែកតាឌុលទេដែលអ្នកភូមិមិន ទាន់ទទួលលុយពីឈ្មួញទិញដី ។
ប្រជាពលរដ្ឋនិងអាជ្ញាធរស្រុកកោះធំ ឱ្យដឹងថាបឹងធំបានផ្ដល់ប្រយោជន៍ដល់ អ្នកស្រុកចំនួន៣ស្រុក គឺស្រុកលើកដែក ស្រុកស្អាង និងស្រុកកោះធំឱ្យប្រកបរបរ នេសាទផង ការដាំដុះក្នុងបឹង និងយកទឹក បឹងស្រោចស្រពនិងទឹកប្រើប្រាស់សម្រាប់ មនុស្សនិងសត្វ ។ ការលក់ដីបឹងនិង ឈូសលុបបឹងធ្វើឱ្យប៉ះពាល់ជីវភាពរស់ នៅប្រចាំថ្ងៃនិងខ្វះទឹកប្រើប្រាស់ ៕
