ខេត្ដកំពង់ចាម ៖ យ៉ាងតិចមានមនុស្សចំនួន៦នាក់បានរងរបួសធ្ងន់និងស្រាល ដោយសារឧបទ្ទវហេតុគ្រោះថ្នាក់ចរា ចរណ៍បង្កឡើង ដោយរថយន្ដបែនដឹកដី បើកចូលក្បួនព្រះទីនាំងសម្ដេចក្រុមព្រះ បណ្ដាលឱ្យបុក និងកៀបព្រះទីនាំងព្រះអង្គ កាល ពីវេលាម៉ោង១២ និង១៥នាទីរសៀល ថ្ងៃទី២៥ ខែមេសា ឆ្នាំ២០១៥ នៅលើកំណាត់ផ្លូវជាតិលេខ៧ ស្ថិតក្នុងភូមិ អំពិលធំ ឃុំខ្វិតធំ ស្រុកព្រៃឈរ ខេត្ដ កំពង់ចាម ។
លោកកែវ សៀងហ៊ន អធិការនគរ បាលស្រុកព្រៃឈរបានឱ្យដឹងថា មុនពេល កើតហេតុសម្ដេចក្រុមព្រះនរោត្ដម រណឫទ្ធិ ,អ្នកម្នាង និងសហការីបានយាង និងអញ្ជើញទៅជួបសំណេះសំណាលជាមួយសកម្មជននិងប្រជាពលរដ្ឋចំនួន១០ ស្រុក ដែលមានអ្នកចូលរួមចំនួន២.៧២៤នាក់ នៅក្នុងវត្ដគរ ស្ថិតក្នុងភូមិ-ឃុំគរ ស្រុក ព្រៃឈរ ខេត្ដកំពង់ចាម ។ លុះចប់កម្ម វិធីសម្ដេចក្រុមព្រះនិងអ្នកម្នាងព្រម ទាំងមន្ដ្រីជាន់ខ្ពស់របស់គណបក្សហ្វ៊ុន ស៊ិនប៉ិចបានធ្វើដំណើរតាមព្រះទីនាំង រថយន្ដយាងនិងអញ្ជើញត្រឡប់ពី កន្លែងជួបសំណេះសំណាលឆ្ពោះមកកាន់រាជធានីភ្នំពេញវិញដោយមានរថយន្ដ ស៊ីរ៉ែននាំមុខ ។ ពេលមកដល់ចំណុចភូមិ អំពិលធំ ឃុំខ្វិតធំ ស្រុកព្រៃឈរ ស្រាប់ តែមានរថយន្ដបែនដឹកដីមួយគ្រឿង ពាក់ស្លាក លេខភ្នំពេញ3B-4495 បើក បញ្ច្រាសទិសគ្នាបានរេចង្កូតចូលទៅក្នុង ក្បួនហើយបុកព្រះទីនាំងសម្ដេចក្រុមព្រះតែម្ដង ។
លោកអធិការបន្ដថា រថយន្ដបែន ដឹកដីបើកចូលក្នុងក្បួនផុតពីរថយន្ដស៊ីរ៉ែននាំមុខក៏ជ្រុលទៅ ប៉ះនឹងព្រះទីនាំងសម្ដេចក្រុមព្រះកៀបជាប់ហើយរថយន្ដបង្ក ហេតុបានជ្រុលទៅបុកដើមឈើ និង ប៉ះរថយន្ដ១គ្រឿងទៀតម៉ាកតាកូម៉ាមួយបាំងកន្លះពណ៌ខៀវពាក់ស្លាក លេខភ្នំពេញ 2Y-2915 បើកបរដោយឈ្មោះ ប៉ូ សុភ័ណ ភេទប្រុសអាយុ៣០ឆ្នាំ មានទីលំនៅ រាជធានីភ្នំពេញ ។ ភ្លាមៗនោះមានអ្នក រងរបួសធ្ងន់និងស្រាលចំនួន៦នាក់ ក្នុង នោះមានស្រីម្នាក់ដែលគេអះអាងថា អ្នកម្នាងអ៊ុក ផល្លា បានរងរបួសធ្ងន់ត្រូវ បានសមត្ថកិច្ចនិងក្រុមការងាររបស់ សម្ដេចក្រុមព្រះជួយធ្វើអន្ដរាគមន៍ ដើម្បី សង្គ្រោះបន្ទាន់ហើយព្រះទីនាំងរបស់ សម្ដេចក្រុមព្រះម៉ាកBMW ពាក់ស្លាក លេខភ្នំពេញ2AC-1611 តម្លៃជាង១០ម៉ឺន ដុល្លារ ដែលបើកបរដោយឈ្មោះ ផឹង ផេន ភេទប្រុស អាយុ៤១ឆ្នាំបានរងការ ខូចខាតផ្នែកទ្វារទាំងសងខាងមុខក្រោយ យ៉ាងដំណំ ។ ក្នុងចំណោមអ្នករងគ្រោះទាំង នោះមាន៣នាក់រងរបួសធ្ងន់ ក្នុងនោះ មានអ្នកម្នាង អ៊ុក ផល្លាផង និងបុរស ៣នាក់ទៀតរងរបួសស្រាល ។
លោក ញឹក ប៊ុនឆៃ អនុប្រធានទី២ គណបក្សហ្វ៊ុនស៊ិនប៉ិច មិនបានផ្ដល់ព័ត៌ មានលម្អិតឡើយ ទាក់ទងនឹងគ្រោះថ្នាក់ ចរាចរណ៍នេះ ។ លោកបញ្ជាក់ថា ព្រះ អង្គម្ចាស់នរោត្ដម រណឫទ្ធិ និងអ្នកម្នាង ផល្លារងរបួសក្នុងហេតុការណ៍នេះ ហើយ ត្រូវបានបញ្ជូនទៅព្យាបាលនៅមន្ទីរពេទ្យ រ៉ូយ៉ាល់ រតនៈនៅភ្នំពេញ ។ ក្រៅពីព្រះ អង្គ និងអ្នកម្នាង ផល្លា មានមនុស្ស៤ នាក់ទៀត ក៏រងរបួសក្នុងហេតុការណ៍ នេះដែរ តែមិនមានអ្នកស្លាប់ទេ ។ នេះ ជាការបញ្ជាក់របស់លោក ញឹក ប៊ុនឆៃ ។
សូមបញ្ជាក់ផងដែរ នៅព្រឹកថ្ងៃទី២៥ ខែមេសានេះ សម្ដេចក្រុមព្រះនរោត្ដម រណឫទ្ធិ ប្រធានគណបក្សហ្វ៊ុនស៊ិនប៉ិច រួមជាមួយលោក ញឹក ប៊ុនឆៃ លោក កែវ ពុទ្ធរស្មី នឹងថ្នាក់ដឹកនាំដទៃទៀត បានចូលរួមក្នុងពិធីសំណេះសំណាលជាមួយថ្នាក់ដឹកនាំក្រោមជាតិ និងពលរដ្ឋ ដែលគាំទ្រគណបក្សនៅក្នុងមូលដ្ឋាន ស្រុកព្រៃឈរ ខេត្ដកំពង់ចាម ។
លោក បែន រ័ត្ន ស្នងការស្នងការ នគរបាលខេត្ដកំពង់ចាម ក៏បានអះអាង ផងដែរថា សម្ដេចក្រុមព្រះ នរោត្ដម រណឫទ្ធិ និងអ្នកម្នាងស្ថិតក្នុងចំណោមជន រងគ្រោះ ហើយលោកកំពុងធ្វើការលើករណីនេះ ៕
