ប្រមុខរដ្ឋាភិបាលកម្ពុជាសម្ដេចធិបតី ហ៊ុន ម៉ាណែត បានបង្ហាញការប្ដេជ្ញាចិត្តនៅចំពោះព្រះភក្ត្រ ព្រះមហាក្សត្រ និងមហាជនទាំង ឡាយថា នឹងប្ដេជ្ញាយកអស់កម្លាំងកាយចិត្ត ថែរក្សា ការពារ ឯករាជ្យភាព អធិបតេយ្យ សន្តិភាពនិងការអភិវឌ្ឍជាតិខ្មែរជានិរន្តរ៍។
សម្ដេចធិបតី ហ៊ុន ម៉ាណែត បានថ្លែងថាឯករាជ្យនិងសន្តិភាពពុំមែនកើតឡើងដោយ ឯងៗនោះទេឯករាជ្យនិងសន្តិភាពសុទ្ធតែកើតឡើងចេញពីការខិតខំប្រឹងប្រែងនិងផ្ដួចផ្ដើមដោយខ្មែរខ្លួនឯង។ក្នុងន័យនេះក្នុងនាមជាកុលបុត្រខ្មែរអ្នកដឹកនាំជំនាន់ក្រោយនិងប្រជាជនខ្មែរទាំងមូលសម្ដេចធិបតី បានសច្ចាថា នឹងដង្ហែតាមស្នាព្រះហស្ដជាប្រវត្តិសាស្ត្រនិងគំរូវីរភាពរបស់ព្រះមហាវីរក្សត្រ ព្រះវររាជបិតាជាតិខ្មែរព្រះបរមរតនកោដ្ឋនិងរួមគ្នាជាធ្លុងមួយក្រោមព្រះរាជបូជ នីយកិច្ចដឹកនាំរបស់ព្រះករុណា ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បន្តពូនជ្រំ ថែរក្សា និងការពារឱ្យបានស្ថិតស្ថេរចិរកាល នូវឯករាជ្យភាព អធិបតេយ្យ សន្តិភាព និងការអភិវឌ្ឍជានិរន្តរ៍នៃជាតិខ្មែរ។
សម្តេចហ៊ុន ម៉ាណែត បានមានប្រសាសន៍ ថា ដំណើរនៃការវិវត្តជាតិខ្មែរបានឈានដល់ដំណាក់កាលថ្មីមួយដែលយើងទាំងអស់គ្នាមានទំនុកចិត្តរឹងមាំនិងមានមហិច្ចតាខ្ពស់ក្នុងការលើកស្ទួយ មោទនភាពជាតិខ្មែរឱ្យដូចសម័យអង្គរតាមរយៈការកសាងជាតិមួយរឹងមាំ រស់រវើករុងរឿងនិងមានវិបុលភាពក្លាយជាប្រទេសមួយមានចំណូលខ្ពស់នៅឆ្នាំ២០៥០។ការថ្លែងរបស់សម្ដេចធិបតីហ៊ុនម៉ាណែតក្នុងពិធីប្រារព្ធខួបអនុស្សាវរីយ៍លើក ទី៧០ នៃទិវាបុណ្យឯករាជ្យជាតិ ៩ វិច្ឆិកា (៩ វិច្ឆិកា ១៩៥៣-៩ វិច្ឆិកា ២០២៣) និង ខួប ៧០ឆ្នាំ នៃការបង្កើតកងយោធពលខេមរភូមិន្ទ នាថ្ងៃព្រហស្បតិ៍ ត្រូវនឹងថ្ងៃទី៩ ខែ វិច្ឆិកា ឆ្នាំ២០២៣នេះ៕
