ភ្នំពេញ ៖ ទោះបីជាក្រសួងរ៉ែ និងថាមពល ប្រកាសឲ្យក្រុមអាជីវកបូមខ្សាច់ទាំងអស់នៅទូទាំងប្រទេសឲ្យផ្អាក សកម្មភាពបូមខ្សាច់នៅតាមដងទន្លេ បឹង បួរ ទាំងលើគោក និងផ្ទៃទឹកមួយរយះសិន ដោយតម្រូវឲ្យក្រុមអាជីករទាំងនោះមកដាក់ពាក្យស្នើសុំអាជ្ញាប័ណ្ណ សាជាថ្មី។ យ៉ាងណាក៏ដោយ ក៏សកម្មភាពបូមខ្សាច់សំណង់ខ្សាច់ចាក់លុបបានធ្វើឡើងជារាល់យប់ ថ្ងៃនៅតែមានគ្រប់ទីកន្លែងនៅទូទាំងប្រទេសកម្ពុជា ទាំងមានច្បាប់ និងគ្មានច្បាប់យ៉ាងអនាធិបតេយ្យបំផុត។
ការប្រកាសឲ្យផ្អាកសកម្មភាពមួយរយះកន្លងមកខ្សាច់សំណង់ខ្សាច់ចាក់ លុបមិនឡើងថ្លៃនិងស្ទះចំពោះតម្រូវការរបស់អតិថិជនឡើយ ព្រោះថាសកម្មភាពបូមខ្សាច់យ៉ាងអនាធិបតេយ្យនៅតែបន្តកើតមានយ៉ាង គគ្រឹកគគ្រេងដដែល ទាំងក្នុងទឹកនិងលើគោក មានតាំងពីយូរយារណាស់មកហើយ ក្រុមឈ្មួញមិនដែលឈប់ធ្វើសកម្មភាពនោះទេ គ្រាន់តែផ្លាស់ប្ដូររូបភាពខ្លះតែប៉ុណ្ណោះ។ នេះបើយោងតាមការលើកឡើងរបស់ក្រុមអ្នករកស៊ីបូមខ្សាច់លក់។
សកម្មភាពបូមខ្សាច់បានធ្វើឡើងទាំងថ្ងៃទាំងយប់ ហើយទីតាំងទាំងនោះត្រូវបានគេរាយការណ៍មកថាទីតាំងទាំងនោះមិនមាន ច្បាប់ ឬអាជ្ញាប័ណ្ណចេញដោយក្រសួងរ៉ែ និងថាមពលនោះទេ។ ជាក់ស្តែងនៅរាជធានីភ្នំពេញ ព្រំប្រទល់រាជធានីភ្នំពេញ និងខេត្តកណ្តាល មានសាឡង់បូមខ្សាច់ធំៗកំពុងធ្វើសកម្មភាពទាំងយប់ទាំងថ្ងៃ។ នៅខេត្តកំពង់ស្ពឺ ម្ចាស់ការដ្ឋានបូមខ្សាច់ ឈ្មោះ តាន់ ស៊ីម៉ន ហៅតា មុយ នៅភូមិព្រៃកោះ ឃុំវល្លិ៍ស ស្រុកសំរោងទង ខេត្តកំពង់ស្ពឺបានកំពុងធ្វើសកម្មភាពបូម និងដឹកជញ្ជូនយ៉ាងអនាធិបតេយ្យ ដឹកដាក់តាមដេប៉ូ និងការដ្ឋានសំណង់នានាយ៉ាងព្រោងព្រាត ដោយគ្មានច្បាប់ និងអាជ្ញាប័ណ្ណពីក្រសួងរ៉ែ និងថាមពលនោះទេ។
នៅក្រុងពោធិ៍សាត់ សកម្មភាពបូមខ្សាច់នៅតែបន្តបូមដដែល បើទោះបីជាក្រសួងរ៉ែ និងថាមពលប្រកាសឲ្យផ្អាកសកម្មភាពបូមខ្សាច់នៅតាមដងទន្លេ បឹង បួរ ទាំងលើគោក និងផ្ទៃទឹកមួយរយះសិនដើម្បីស្នើសុំអាជ្ញាប័ណ្ណសាជាថ្មីក៏ដោយ។
អាជីវកម្មបូមខ្សាច់អនាធិបតេយ្យចំនួន៣កន្លែងនៅស្រុកមង្គលបុរី ត្រូវគេមើលឃើញថា នៅតែបន្តសកម្មភាពបូមខ្សាច់ធ្វើអាជីវកម្មយ៉ាងគគ្រឹកគគ្រេងដដែល។ សកម្មភាពទាំងនោះឈ្មួញធ្វើឡើងនៅចំណុចភូមិគោកទម្លាប់ ភូមិពោធិ៍រៀង ឃុំបន្ទាយនាង និង ភូមិអូរអណ្ដូង ឃុំអូរប្រាសាទ។ អាជីវកម្មនោះមិនមានច្បាប់ទំលាប់អ្វីទេ នេះបើយោងតាមសម្ដីលោក ឡុង ពុន អភិបាលស្រុកមង្គលបុរីបានឱ្យមន្ត្រីក្រោមឱវាទចុះត្រួតពិនិត្យ គឺគ្មានច្បាប់ធ្វើអាជីវកម្មនោះទេ កន្លងមកលោកបានចុះទៅណែនាំឱ្យបញ្ឈប់អាជីវកម្មចំនួន៣លើក និងឱ្យពួកគាត់ជាឈ្មួញនាំគ្នាទៅធ្វើច្បាប់អាជីវកម្មនោះដែរ ប៉ុន្តែឈ្មួញទាំងនោះមិនបានស្តាប់នោះទេ។
ចំណែកការដ្ឋានយកខ្សាច់បក ឬហៅថាខ្សាច់លើគោកនៅក្នុងស្រុកកណ្ដាលស្ទឹង ខេត្តកណ្ដាលនៅតែមានសកម្មភាពជីកកាយដីដើម្បីយកខ្សាច់ដដែល ដោយមិនខ្វល់ខ្វាយថាមិនមានអាជ្ញាប័ណ្ណ និងមានអាជ្ញាប័ណ្ណហួសសុពលភាពអ្វីឡើយ ។
ចំណែកអ្នកវិធានឯករាជ្យនៅតាមតុកាហ្វេខ្លះបានលើកឡើងថា សកម្មភាពបូមខ្សាច់អនាធិបតេយ្យនេះបានកើតឡើងជាយូរយារណាស់មកហើយ មិនដែលឈប់ម្តងណាទេ ចំណែកឯកាប្រកាសរបស់ក្រសួងរ៉ែ និងថាមពលថាឲ្យផ្អាកមួយរយះដើម្បីឲ្យដាក់ពាក្យស្នើសុំនោះមិនអាច ឲ្យពួកគេខ្លាច និងបញ្ឈប់សកម្មភាពនោះទេ ដូច្នេះក៏គ្មានហេតុផលណាថាកាផ្អាកបូមខ្សាច់មួយរយះកន្លងមក ធ្វើឲ្យខ្សាច់សំណង់ស្ទះ និងឡើងថ្លៃ នោះដែរ។
សូមរំលឹកថា សម្ដេចនាយករដ្ឋមន្ត្រីបានចេញសេចក្តីសម្រេចលេខ២០ស.ស.រ ចុះថ្ងៃទី២០ ខែមីនា ឆ្នាំ២០១៥ ដោយបានផ្តល់សិទ្ធិទៅក្រសួងរ៉ែនិងថាមពល ទាំងការចេញអាជ្ញាប័ណ្ណ ទាំងការទទួលខុសត្រូវ ត្រួតពិនិត្យតាមដានផលប៉ះពាល់ សេដ្ឋកិច្ច បរិស្ថាន និងសង្គម។
កាលពីថ្ងៃទី២៤ ខែមីនា ឆ្នាំ២០១៥ រដ្ឋមន្ត្រីក្រសួងរ៉ែ និងថាមពល រដ្ឋមន្ត្រីក្រសួងបរិស្ថាន និងមេបញ្ជាការកងរាជអាវុធហត្ថលើផ្ទៃប្រទេសបានប្រកាសក្នុង សន្និសីទសារព័ត៌មានដើម្បីពង្រឹងសេចក្តីសម្រេចលេខ២០ស.ស.រ ចុះថ្ងៃទី២០ ខែមីនា ឆ្នាំ២០១៥ សុំផ្អាកបណ្ដោះអាសន្នការធ្វើអាជីវកម្មខ្សាច់ និងមិនទាន់ផ្តល់អាជ្ញាប័ណ្ណថ្មី ដោយរង់ចាំការសិក្សាផលប៉ះពាល់សេដ្ឋកិច្ច បរិស្ថាន សង្គម និងជលវិទ្យាពីក្រសួងបរិស្ថានសិន ប៉ុន្តែស្នើសុំឲ្យក្រុមហ៊ុនមានអាជ្ញាប័ណ្ណចាស់ទៅដាក់ពាក្យសុំ ពន្យារអាជ្ញាប័ណ្ណ ឯក្រុមហ៊ុន ឬអាជីវករចង់បានអាជ្ញាប័ណ្ណថ្មី ឬចង់ប្ដូរទីតាំងអាជីវកម្ម ត្រូវទៅដាក់ពាក្យស្នើសុំ ប៉ុន្តែការប្រកាសឲ្យផ្អាករបស់លោករដ្ឋមន្ត្រីហាក់មិនត្រូវបាន ក្រុមឈ្មួញមួយចំនួនស្តាប់តាមឡើយគឺ សកម្មភាពកាន់តែខ្លាំងក្លាជាងមុនទៀត។
លោក ស៊ុយ សែម រដ្ឋមន្ត្រីក្រសួងរ៉ែ និងថាមពលបានឲ្យដឹងថា មានក្រុមហ៊ុន១៤២ បានស្នើសុំធ្វើអាជីវកម្ម ក្នុងនោះមានអាជ្ញាប័ណ្ណខ្សាច់បក ឬខ្សាច់លើគោក៣៧ក្រុមហ៊ុន ឯខ្សាច់ក្នុងទឹកមាន៨៦អាជ្ញាប័ណ្ណ។
លោក ស៊ុយ សែម រដ្ឋមន្ត្រីក្រសួងរ៉ែ និងថាមពលអះអាងថា រាល់ការចេញអាជ្ញាប័ណ្ណឲ្យធ្វើអាជីវកម្មបាន«ទាល់តែបរិស្ថានសិក្សា ផលប៉ះពាល់សង្គមឲ្យបានច្បាស់លាស់ ទាំងសង្គម ទាំងសេដ្ឋកិច្ច ថាផលប៉ះពាល់ស្អីខ្លះត្រូវបញ្ចៀស អាហ្នឹងសិក្សា ហើយបានឲ្យធ្វើអាជីវកម្មឲ្យបូមបាន៕
