រាជធានីភ្នំពេញ ៖ លោកវរសេនីយ៍ទោអេង សោភា នាយការិយាល័យនគរបាលព្រហ្មទណ្ឌកម្រិតធ្ងន់រាជធានីភ្នំពេញ កាលពីព្រឹកថ្ងៃទី១៦ មីនា បានបង្ហាញមុខក្រុមជនក្លែងបន្លំធ្វើជាប៉ូលិសខ្លាហោះ ដែលបានធ្វើសកម្មភាពស្ទាក់ប្លន់អ្នកដំណើរក្នុងរាជធានីភ្នំពេញពេលយប់ចំនួន៥នាក់ ។
ជនទី១-ឈ្មោះ សេង វិមល ហៅ ជា ភេទប្រុស អាយុ៣៩ឆ្នាំ ស្នាក់នៅផ្ទះលេខ ២២២ ផ្លូវលេខ១០៧ សង្កាត់អូរឫស្សី៤ ខណ្ឌ៧មករា ។
២-ឈ្មោះ ឃួន ថាវរិទ្ធ ហៅធី ភេទប្រុស អាយុ២៣ឆ្នាំ ស្នាក់ផ្ទះលេខ៩៩ ផ្លូវលំ ភូមិក្បាលទំនប់ សង្កាត់បឹងទំពុន ខណ្ឌមានជ័យ មុខរបរជាសន្តិសុខយាមក្លឹបខារ៉ាអូខេ ។ ៣-ឈ្មោះ រិទ្ធ រដ្ឋា ហៅ (ទីទុយ០៩ព្រះនាមតាមអាយឌី) ស្នាក់នៅផ្ទះលេខ៥ ផ្លូវ១៨៧ សង្កាត់ទំនប់ទឹក ខណ្ឌចំការមន មុខរបរជាសន្តិសុខយាមឃ្លាំង ។
៤-ឈ្មោះ ប៉ែន ល័ក្ខវុឌ្ឍីនា ហៅ ម៉ាប់ ភេទប្រុស អាយុ២៣ឆ្នាំ ស្នាក់នៅផ្ទះគ្មានលេខ ផ្លូវលំ សង្កាត់បឹងទំពុន ខណ្ឌមានជ័យ មុខរបរមិនពិតប្រាកដ ។
៥-ឈ្មោះ ខាត់ រិទ្ធ (ព្រះនាម៣៤) ភេទប្រុស អាយុ៤០ឆ្នាំ ស្នាក់នៅភូមិត្រពាំងអង្គ ឃុំព្រៃស្លឹក ស្រុកទ្រាំង ខេត្តតាកែវ មុខរបរមិនពិតប្រាកដ ។
ប៉ូលិសខ្លាឃ្លោកទាំង៥នាក់នេះ មានម្នាក់ជាអតីតប៉ូលិសក្រសួងមហាផ្ទៃ និង ២ នាក់ ជាអតីតទាហានឆត្រយោង ត្រូវបានអង្គភាពបណ្តេញចេញយូរហើយ ។ សម្ភារដកហូតមានអាវុធខ្លីម៉ាករូឡុ ពណ៌ស១ដើម គ្រាប់១២គ្រាប់ វិទ្យុទាក់ទងអាយឌី២គ្រឿង ខ្នោះដៃ១គូ ដំបង ឆក់១ដើម ម៉ូតូម៉ាកស្គូពី ពណ៌ស១គ្រឿង ពាក់ស្លាកលេខភ្នំពេញ1AU-1222 ។
លោកវរសេនីយ៍ទោ អេង សោភា បានថ្លែងឲ្យដឹងថា ក្នុងនោះមានពាក្យបណ្តឹងរបស់ជនរងគ្រោះចំនួន២នាក់ម្នាក់ឈ្មោះហេង រ៉ាវី ភេទប្រុស អាយុ៣៤ឆ្នាំ និងម្នាក់ឈ្មោះនួន ធួន ភេទប្រុស អាយុ១៦ឆ្នាំ ដែលត្រូវក្រុមជនបន្លំធ្វើជាសមត្ថកិច្ចដែលហៅថា សមត្ថកិច្ចខ្លាឃ្លោកស្ទាក់ប្លន់ទ្រព្យសម្បត្តិពេលយប់ ខណៈដែលពួកគាត់ចេញពីធ្វើការ ។
លោក អេង សោភា បន្តថា ជនសង្ស័យ១ក្រុមនេះហើយដែលពាក់ឯកសណ្ឋានជានគរបាលផង និងជាកងរាជអាវុធហត្ថផង ធ្វើសកម្មភាពប្លន់អ្នកដំណើរពេលយប់ ហើយភាគច្រើនប្លន់នៅម្តុំអង់តែនទួលគោក ខណ្ឌទួលគោក និងម្តុំត្រឡោកបែក ឬស្ពានអាកាស៧មករា ។ ជាក់ស្តែងក្រុមនេះបានគ្រងឯកសណ្ឋានជាសមត្ថកិច្ចហើយចាប់យុវជនម្នាក់ធ្វើដូចសមត្ថកិច្ចឆែកឆេរអាវុធ រួចប្លន់យកទូរស័ព្ទដៃ១គ្រឿង ដែលករណីខាងលើនេះបានធ្វើឲ្យនគរបាល និងកងរាជអាវុធហត្ថរងនូវការចោទប្រកាន់ពីសំណាក់មជ្ឈដ្ឋាននានា ដោយសារអ្នករងគ្រោះចោទ ព្រោះពួកគេឃើញក្រុមជនខិលខូចស្លៀកពាក់ឯកសណ្ឋានប៉ូលិស ឬកងរាជអាវុធហត្ថរហូតមានការបកស្រាយនិងបំភ្លឺ ពីសមត្ថកិច្ចជុំវិញការចោទប្រកាន់នោះដែរ ។ ក្រោយពីក្រុមជនក្លែងបន្លំជាក្រុមប្រដាប់អាវុធគ្រងឯកសណ្ឋានចេញធ្វើសកម្មភាពប្លន់បង្កឱ្យមានការយល់ច្រឡំនោះហើយ លោកឧត្តមសេនីយ៍ឯក ជួន សុវណ្ណ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ពិសេសលោកឧត្តមសេនីយ៍ត្រី ជួន ណារិន្ទ ស្នងការរង និងជាប្រធានការិយាល័យកណ្តាលនគរបាលព្រហ្មទណ្ឌរាជធានីភ្នំពេញ បានដាក់បទបញ្ជាឲ្យកម្លាំងនគរបាលជំនាញព្រហ្មទណ្ឌបើកការស៊ើបអង្កេត និងស្រាវជ្រាវស្វែងរកចាប់ខ្លួនក្រុមជនប្រដាប់អាវុធនោះឲ្យខាងតែបានដើម្បី ទី១-កុំឲ្យសមត្ថកិច្ចទាំងពីរគឺនគរបាលជាតិ និងកងរាជអាវុធហត្ថ រងនូវការចោទប្រកាន់ និងកុំឲ្យមហាជនដាក់កំហុសថា ក្រុមចោរកើតចេញពីសមត្ថកិច្ច ។
បន្ទាប់ពីមានបទបញ្ជាខាងលើនេះ កម្លាំងសមត្ថកិច្ចនគរបាលព្រហ្មទណ្ឌរាជធានីភ្នំពេញ បានសហការជាមួយនគរបាលនាយកដ្ឋានព្រហ្មទណ្ឌក្រសួងមហាផ្ទៃ ឃាត់ខ្លួនដំបូងជនសង្ស័យម្នាក់ឈ្មោះ ខាត់ រិទ្ធ ដែលសម្ងំលាក់ខ្លួនព្យាបាលរបួសដោយគ្រោះថ្នាក់ចរាចរណ៍នៅមន្ទីរពេទ្យមួយក្នុងខេត្តកែវ នឹងបន្ទាប់មកស្រាវជ្រាវឃាត់ខ្លួនបាន៤នាក់ទៀត ព្រមទាំងដកហូតបានអាវុធដែលធ្វើសកម្មភាពផងដែរ ៕
