រាជធានីភ្នំពេញ ៖ អ្នកគាំទ្រគណបក្សសង្គ្រោះជាតិ ក្នុងខេត្តកំពង់ស្ពឺ ព្រមាននឹងងាកចេញលែងគាំទ្រពីបក្សមួយនេះ ក្នុងអាណត្តិនៃការបោះឆ្នោត ខាងមុខៗទៀត ប្រសិនគណបក្សជំទាស់ដែលទទួលបានការគាំទ្រក្នុងនីតិកាលទីប្រាំនេះ ព្រមព្រៀងណាមួយជាមួយ គណបក្ស ប្រជាជនកម្ពុជា ដើម្បីបង្កើតរដ្ឋាភិបាលចម្រុះ ដោយពុំបានរកយុត្តិធម៌ជាមុនទេ។
ស្របពេលជាមួយគ្នានេះ អ្នកគាំទ្រគណបក្សប្រឆាំង ព្រមានមេដឹកនាំរបស់ខ្លួនថា បើថ្នាក់ដឹកនាំរបស់គណបក្សសង្គ្រោះជាតិ ហ៊ានបង្កើតរដ្ឋាភិបាលចម្រុះជាមួយគណបក្សកាន់អំណាចមុនការបង្កើត គណៈកម្មការស្រាវជ្រាវអំពីភាពមិនប្រក្រតីនោះ គណបក្សនេះនឹងលែងមានអ្នកគាំទ្រតទៅទៀតហើយ។
ពលរដ្ឋនៅឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ លោកស្រី សួស ម៉ាលី មានប្រសាសន៍នៅថ្ងៃទី២ ខែវិច្ឆិកា ថា គណបក្សសង្គ្រោះជាតិ នឹងបាត់បង់ជំនឿចិត្តពីអ្នកគាំទ្ររបស់ខ្លួនក្នុងអាណត្តិ បន្តបន្ទាប់ទៀត ប្រសិនបើបក្សនេះសម្រេចចូលរួមបង្កើតរដ្ឋាភិបាលជាមួយគណបក្ស គ្រប់គ្រងអំណាច ដោយពុំបានរកយុត្តិធម៌ឲ្យឃើញសខ្មៅជាមុនទេនោះ ។ លោកស្រីបន្តថា អ្វីដែលពលរដ្ឋលះបង់ទាំងពេលវេលា និងថវិកាផ្ទាល់ខ្លួន ចូលរួមបាតុកម្មម្ដងជាពីរដង ប្រឆាំងលទ្ធផលបោះឆ្នោតនេះ គឺបំណងទាមទារឲ្យមានការផ្លាស់ប្ដូរ ។
គិតមកដល់ពេលនេះ គណបក្សប្រជាជនកម្ពុជា និងគណបក្សសង្គ្រោះជាតិ បន្តស្វះស្វែងរកច្រកចេញ ដើម្បីទម្លាយភាពជាប់គាំងផ្នែកនយោបាយនេះ តែមិនបានសម្រេចជាច្រើនលើករួចមកហើយ ក្រោយថ្ងៃបោះឆ្នោតកាលពីថ្ងៃទី២៨ ខែកក្កដា មកនោះ។
ទន្ទឹមនឹងនេះ ប្រជាពលរដ្ឋនៅឃុំត្រែងត្រយឹង ព្រមានថា នឹងកៀរគរអ្នកផ្សេងទៀត មិនឲ្យគាំទ្រគណបក្សសង្គ្រោះជាតិ បន្តទៀតឡើយ បើជំហររបស់មេដឹកនាំរបស់គណបក្សជំទាស់នៅពេលនេះ មានភាពទន់ជ្រាយនោះ។ លើសពីនេះ ពួកគេអំពាវនាវឲ្យមេដឹកនាំសហជីព សមាគម និងមន្ត្រីរាជការ ស៊ីវិល បន្តធ្វើបាតុកម្មអហិង្សាបន្តទៀត។
បើទោះជាបែបណា លោក យឹម សុវណ្ណ អ្នកនាំពាក្យគណបក្សសង្គ្រោះជាតិ បញ្ជាក់ថា ជំហរក្នុងការទាមទាររកយុត្តិធម៌ជូនម្ចាស់ឆ្នោត គឺនៅដូចដើម ដូចការសន្យារបស់ខ្លួនជាមួយប្រជាពលរដ្ឋ ។ ចំណែកការបង្កើតរដ្ឋាភិបាលចម្រុះជាមួយគណបក្សកាន់អំណាច នឹងពុំមានសោះឡើយ។
លោក ហង្ស ពុទ្ធា នាយកអង្គការ និចហ្វិក (NICFEC) យល់ឃើញថា គណបក្សប្រឆាំងនៅពេលនេះបានក្លាយជាបង្គោលឈរក្នុងចន្លោះកណ្ដាលនៃ បញ្ហា គឺទីមួយ សម្ពាធពីម្ចាស់ឆ្នោត និងទីពីរ ត្រូវដោះស្រាយជាមួយរដ្ឋាភិបាល។ លោកគិតថា គណបក្សប្រឆាំងនៅពេលនេះពិតជាមានភាពផុយស្រួយនៃការបាក់ទឹកចិត្ត ពីម្ចាស់ឆ្នោត បើជំហរមិនរឹងមាំទេនោះ ។ ការចរចាដើម្បីទម្លាយភាពជាប់គាំងផ្នែកនយោបាយក្នុងសប្ដាហ៍ មុខនេះ ទំនងមិនអាចខិតជិតគ្នាបានទេ។ អ្វីដែលភាគីទាំងពីរនៅមិនអាចទម្លាយវិបត្តិនយោបាយនៅពេលនេះបាន គឺកម្មវត្ថុនៃការចរចា មានកម្មវិធីដាច់ដោយឡែកពីគ្នា។ នេះជាមូលហេតុដែលកិច្ចសន្ទនាមិនអាចចុះសម្រុងនឹងគ្នាបាន៕