ក្រចេះ ៖ ឈើអារលេខ១ ប្រភេទសុក្រំ ត្រូវបានក្រុមឈ្មួញ នាំគ្នាសម្រុកដឹកជញ្ជូនចេញ ពីក្រុមហ៊ុនដីព្រៃសម្បទាន នៅចំណុចឃុំ២ធ្នូ ស្រុកស្នួល ខេត្តក្រចេះ តាមត្រាក់ទ័រ រថយន្ត ឬម៉ូតូកែច្នៃ ក្នុងមួយថ្ងៃៗមានរាប់រយម៉ែត្រគូប នាំយកទៅលក់ក្នុងប្រទេសវៀតណាម យ៉ាងអនាធិបតេយ្យដោយពុំមានស្ថាប័នជំនាញ និងសមត្ថកិច្ចពាក់ព័ន្ធនៅតាមច្រកទ្វារព្រំដែនមានវិធានការទប់ស្កាត់ និងបង្ក្រាបឡើយ ប៉ុន្តែបែរជាឃុបឃិតគ្នាជាលក្ខណៈប្រព័ន្ធ បង្កើតឱ្យមានបទល្មើសដឹកជញ្ជូនឈើឆ្លងដែនដោយរលូនទៅវិញ។
ប្រភពពីប្រជាពលរដ្ឋ ក៏ដូចជាប្រជាសហគមន៍ការពារព្រៃឈើនៅតំបន់នោះ ធ្លាប់បានរាយ ការណ៍ថា ការកាប់អារ និងដឹកឈើរបស់ក្រុមឈ្មួញនៅតំបន់នោះគឺ បានកើតមានជាយូរយារមកហើយ ដោយគេដឹងថា មានឈើលេខ១ ចំនួនរាប់រយម៉ែត្រគូប បាននាំទៅប្រទេសវៀតណាម បានដោយសុវត្ថិភាព ហើយក្រុមឈ្មួញទាំងនោះគឺមានសមាសភាព សុទ្ធសឹងជាកងកម្លាំងប្រដាប់អាវុធ ដែលក្នុងមេឈ្មួញម្នាក់គេដឹងថា ជាមន្ត្រីយោធា ឈ្មោះ ហ៊ួត ប៊ុនគីម និងមួយចំនួនទៀត គឺជាជនជាតិវៀតណាម ។
ពួកគេបានធ្វើសកម្មភាពដឹកជញ្ជូនឈើតាមច្រករបៀងចំនួន៥ច្រក គឺច្រករបៀង D16 / D10 / ប៊ិនឌាំង / 06 /07/ ដោយគេដឹងថា ច្រកនីមួយៗ គឺគ្រប់គ្រងដោយលោក ធីម ធឿន ប្រធាន នគរបាលវរៈព្រំដែន៦១៩ ដែលទើបមកកាន់តំណែងថ្មីនៅតំបន់នោះ។នេះយើងមិននិយាយមេឈ្មួញធំៗដូចជាធីបាញ់ អាគ្រឹងជាដើមដែលសមត្ថកិច្ចមើលរំលងនោះ។
ប្រភពដដែលបានឱ្យដឹងទៀតថា ក្នុងមួយថ្ងៃៗពួកគាត់សង្កេតឃើញមានមន្ត្រីជំនាញ និងសមត្ថកិច្ច ពាក់ព័ន្ធជាច្រើនបាននាំគ្នាទៅអង្គុយសំកុកចាំរាប់ក្បាលឡានបទល្មើសព្រៃឈើ នៅត្រង់ចំណុចមួយនេះ ដែលក្នុងនោះគេឃើញមានមន្ត្រីនគរបាលវរៈព្រំដែន៦១៩ ដែលគ្រប់គ្រងដោយលោក ធីម ធឿន និងមន្ត្រីកងរាជអាវុធហត្ថស្នាក់ការសន្តិសុខ ៧០៩ ប៉ូលិសសេដ្ឋកិច្ច មេព្រៃផងដែរ។
ពួកគាត់បានបន្តថា ទីតាំងខាងលើនេះ គឺមានរថយន្តកែច្នៃធំៗ និងត្រាក់ទ័រវៀតណាម ម៉ូតូចូលដឹកឈើគ្រប់ប្រភេទរាប់សិបគ្រឿង នាំទៅលក់នៅប្រទេសវៀតណាម ហើយសកម្មភាពទាំងនេះបានធ្វើឱ្យមជ្ឈដ្ឋានទូទៅ និងប្រជាពលរដ្ឋនាំគ្នានិយាយតៗគ្នាថា ឃើញបទល្មើស ហើយតែមិនបង្ក្រាប បែរជានាំគ្នាឃុបឃិតជាលក្ខណៈប្រព័ន្ធបង្កើតឱ្យមានបទល្មើស ក្នុង ដែនសមត្ថកិច្ចខ្លួនទៅវិញ។
ទាក់ទងនឹងការចោទប្រកាន់របស់ប្រជាពលរដ្ឋខាងលើ សារពត៏មានយើង មិនអាចទំនាក់ទំនងសុំការបំភ្លឺពីលោក ធីម ធឿន ប្រធានប៉ុស្ដិ៍នគរបាលការពារព្រំដែន ដែលគ្រប់គ្រងច្រករបៀងទាំង៥ ក្នុងឃុំ២ធ្នូ ស្រុកស្នួលនោះបានទេ កាលពីម្សិលមិញ ដោយទូរសព្ទ័និយាយបន្តិចក៏ដាច់ទៅវិញ៕