ត្បូងឃ្មុំ៖ ប្រភពពីប្រជាពលរដ្ឋស្រុកមេមត់បានអោយដឹងថាសង្វៀនជល់មាន់និងអា ប៉ោងខុសច្បាប់កំពុងបើកលេងយ៉ាងគគ្រឹក គគ្រេងពពាក់ពពូនដែលស្ថិតនៅក្នុងចំការកៅស៊ូ ភូមិទំព័រ ឃុំមេមត់ ស្រុកមេមត់ខេត្តត្បូងឃ្មុំ រីឯអាជ្ញាធរនិងសមត្ថកិច្ចមូលដ្ឋាន ហាក់ដូចរក្សាភាពស្ងៀមស្ងាត់! មិនចាត់ វិធានការបង្ក្រាបអោយស្រប តាមគោលនយោបាយភូមិឃុំសង្កាត់មានសុវត្ថិភាព៧ ចំណុចដែលរាជរដ្ឋាភិបាលដាក់ចេញដោយក្រសួងមហាផ្ទៃនោះទេ។
ប្រភពបានបន្តថា ម្ចាស់សង្វៀនមាន់ជល់និងអាប៉ោងមួយកន្លែងនេះបានគៀងគរបក្សពួកប្រមូលផ្ដុំក្រុមអ្នកញៀនល្បែងមកជួបជុំគ្នា បើកលេងបានយ៉ាងរលូន មិនឃើញអាជ្ញាធរនិងសមត្ថកិច្ចមូលដ្ឋាន ឃុំ ស្រុក ចុះមកធ្វើ ការទប់ស្កាត់ឬមួយបង្ក្រាបម្តងណាឡើយ?ឬ មួយអាជ្ញាធរនិង សមត្ថកិច្ចមូលដ្ឋាន បានទទួលផលប្រយោជន៍ពីម្ចាស់សង្វៀនទេដឹង?បានមិនហ៊ានបង្រ្កាប។ប្រភពបន្ថែមថា ម្ចាស់សង្វៀនបានអួតអាងថា ទីតាំងមួយកន្លែងនេះ គេបានរត់ការបង់សួយសារជូនអាជ្ញាធរនិងសមត្ថកិច្ចថ្នាក់ក្រោមរហូតដល់លើទើបអាចឈរជើងបើកមកដល់សព្វថ្ងៃបានដូច្នេះមិនខ្វល់អ្វីទាំងអស់។
ប្រជាពលរដ្ឋរស់នៅក្នុងមូលដ្ឋានបានរិះគន់ អាជ្ញាធរនិងសមត្ថកិច្ចមូលដ្ឋានថាល្បែងសុី សងបើកលេងគគ្រឹកគគ្រេងមិនបង្រ្កាបធ្វើឲ្យប្ដីឬកូនៗពួកគាត់បោះបង់ការងារគិតតែល្បែងចាញ់អស់ម៉ូតូ.ឡាន សូម្បីទ្រព្យសម្បត្តិនៅក្នុងផ្ទះមានបន្តិចបន្តួចក៍យកទៅលេងអស់គ្មានសល់សព្វថ្ងៃនេះពួកគាត់នាំគ្នាព្រួយបារម្ភអំពីបញ្ហាអសន្តិសុខនិងបទល្មើសផ្សេង ៗ ដូចជា លួច ឆក់ ប្លន់ គាស់ផ្ទះគ្រឿញៀននិងអំពើហិង្សាក្នុងគ្រួសារដើមចមកើតចេញ ពីល្បែងសុីសងនេះឯង។
ប្រជាពលរដ្ឋរស់នៅមូលដ្ឋានសូមអំពាវនាវដល់លោក ជាម ច័ន្ទសោភ័ណ្ឌ អភិបាលខេត្តត្បូងឃ្មុំនិងលោក ម៉ុន មាគ៌ា ស្នងការនគរខេត្តត្បូងឃ្មុំសូមមេត្តាចាត់កំកម្លាំងជំនាញក្រោមឱវាទចុះបង្រ្កាបសង្វៀនជល់មាន់ និងអាប៉ោងខុសច្បាប់កំពុងដំណើរការបើកលេងនៅក្នុងមូលដ្ឋានខាងលើនេះឲ្យស្របតាម គោលនយោបាយ ភូមិ ឃុំ សង្កាត់មានសុវត្ថិ ភាពទាំង៧ចំណុចដែលរាជរដ្ឋាភិបាលបានដាក់ចេញដោយក្រសួងមហាផ្ទៃផង៕
