ក្នុងរយៈកាលចុងក្រោយនេះកំដៅនៃបទល្មើសព្រៃឈើ និងការកាប់រុករានដីរដ្ឋធ្វើជាកម្មសិទ្ធិឯកជនកំពុងតែកើនឡើង យ៉ាងខ្លាំង ដែលធ្វើឲ្យប្រជាពលរដ្ឋនិងស្ថាប័ននានាដែលស្រឡាញ់នូវធនធានធម្មជាតិ មានប្រតិកម្មគ្រប់ទិសទី ជាពិសេសនៅស្រុកសណ្តាន់ ខេត្ត កំពង់ធំ ដែលគ្រប់គ្នាស្គាល់តំបន់នោះថាជាផ្នែកមួយនៃតំបន់ព្រៃឡង់។
បច្ចុប្បន្នតំបន់ព្រៃឡង់ កំពុងត្រូវបានការពារដោយរាជរដ្ឋាភិបាល បណ្តាញសហគមន៍ព្រៃឡង់ រួមទាំងអង្គការនានាដែលមានទិសដៅការពារព្រៃឈើ និងធនធានធម្មជាតិ ក៏ប៉ុន្តែបទល្មើសកាប់បំផ្លាញព្រៃឈើនិងការរុករានទន្ទ្រានដីព្រៃ ធ្វើជាកម្មសិទ្ធិបុគ្គលនៅតែបន្តកើតមានយ៉ាងក្តៅគគុក នៅក្នុងស្រុកសណ្តាន់នេះ ដែលជាហេតុធ្វើអោយមហាជនមានការសង្ស័យយ៉ាងខ្លាំងថា តើអ្នកដែលបំផ្លាញព្រៃឈើនោះជានរណា ហើយមានអំណាចប៉ុណ្ណា ទើបហ៊ានប្រព្រឹត្តទង្វើនេះទាំង ដឹងថាតំបន់ព្រៃឡង់នេះជា តំបន់ដែលស្ថាប័ននានាកំពុងយកចិត្តទុកដាក់ក្នុងការការពារ។
ថ្មីៗនេះ កាសែតក្នុងស្រុកជាច្រើនបានចុះផ្សាយពីបទល្មើសព្រៃឈើនិង ការកាប់ទន្ទ្រានដីរដ្ឋធ្វើជាកម្មសិទិ្ធបុគ្គល នៅក្នុងស្រុកសណ្តាន់ខេត្តកំពង់ធំនេះ ជាបន្តបន្ទាប់ដោយដាក់ការសង្ស័យទៅលើលោក អួង ម៉ាលី អធិការស្រុកសណ្តាន់ថាជាអ្នកដែលកាប់ទន្ទ្រានដីរដ្ឋធ្វើជា កម្មសិទិ្ធផ្ទាល់ខ្លួននិងជាអ្នកដែលនៅពីក្រោយឈ្មួញធំៗ ដែលរកស៊ីកាប់បំផ្លាញព្រៃឈើ។
លោក ឈៀង វុទ្ធី សកម្មជនបណ្តាញសហគមន៍ព្រៃឡង់ហើយក៏ជាបុគ្គលដែលការពារព្រៃឡង់ ក្នុងស្រុកសណ្តាន់នេះអស់ជាច្រើនឆ្នាំ បានប្រាប់ ថា៖ រូបវន្ត បុគ្គលដែលប្រព្រឹត្តបទល្មើសព្រៃឈើច្រើនជាងគេដែលគ្រប់គ្នានៅ ស្រុកសណ្តាន់នោះមានឈ្មោះថា យាយ រឺម ហើយនីតិបុគ្គលដែលបង្កអោយមានបទល្មើសព្រៃឈើច្រើនជាងគេនោះគឺ ក្រុមហ៊ុន ៩៥។ លោក ឈៀង វុទ្ធីបានបញ្ជាក់ថា ក្រុមហ៊ុន៩៥នេះជាក្រុមហ៊ុនមានដីសម្បទានសង្គមកិច្ចនៅកែងព្រះ អាទិត្យ។ ក្រុមហ៊ុននេះបានធ្វើសកម្មភាពទិញច្បោះពីប្រជាពលរដ្ឋក្នុងតំបន់ ព្រៃឡង់ ដែលជាហេតុបណ្តាលអោយមានកំនើននៃវិនាសកម្មព្រៃឈើក្នុងស្រុក សណ្តាន់នេះគួរអោយព្រួយបារម្ភ។
ប្រជាពលរដ្ឋដែលជាសមាជិកនៅក្នុងបណ្តាញសហគមន៍ព្រៃឡង់ជាច្រើន នាក់បានផ្តល់ពត៌មានស្រដៀងគ្នាអោយបានដឹងថា បច្ចុប្បន្នការកាប់រុករានទន្ទ្រានដីព្រៃរបស់រដ្ឋមកធ្វើជា កម្មសិទិ្ធបុគ្គលគឺជាវិនាសកម្មធំជាងគេនៅស្រុកសណ្តាន់នេះ។ ពួកគាត់បានចោទប្រកាន់ទៅលើលោកអធិការស្រុកសណ្តាន់ អួង ម៉ាលី ថាជាអ្នកប្រព្រឹត្តនូវទង្វើនេះ ។ ហើយចាត់ទុកលោកអធិការ អួង ម៉ាលី គឺជាបុគ្គលដែលមានអំណាចខ្លាំងនិងជាបុគ្គលដែលបញ្ជាកូនចៅរបស់ ខ្លួនទៅឈរជើងការពារដី និងកម្មករដែលទៅកាប់ទន្ទ្រានព្រៃឈើនោះតែម្តង ។
លោក សៅ វណ្ណី នាយផ្នែករដ្ឋបាលព្រៃឈើស្រុកសណ្តាន់បានឆ្លើយតបជាមួយអ្នក សារព័ត៌មាន ចំពោះបញ្ហានេះថា៖ លោកមិនទាន់បានចុះទៅត្រួតពិនិត្យនៅតំបន់ដែលទទួលរងនូវការកាប់ ទន្ទ្រានដីព្រៃពីសំណាក់លោកអួងម៉ាលី ដូចការចោទប្រកាន់ពីបណ្តាញសហគមន៍ព្រៃឡង់នៅឡើយទេ។ ប្រសិនបើលោកពិនិត្យឃើញថា ការចោទប្រកាន់នេះជាការពិត លោកនឹងធ្វើរបាយការណ៍បញ្ជូនទៅថ្នាក់លើ ដើម្បីចាត់វិធានការទៅលើលោក អួង ម៉ាលីនេះតាមនីតិវិធី។
ឆ្លើយតបទៅនឹងការចោទប្រកាន់ខាងលើ លោក អួង ម៉ាលី អធិការស្រុកសណ្តាន់ បានបំភ្លឺតាមទូរស័ព្ទមកកាន់ភ្នាក់ងារសារព័ត៌មាន យើងថា៖ លោកពុំបានប្រព្រឹត្តដូចការចោទប្រកាន់នោះទេ ហើយលោកនឹងចាត់សហការី របស់លោកអោយចុះទៅតាមដានក្នុងរឿងនេះ ថាតើគេចោទប្រកាន់លោក សំអាងទៅលើអ្វី?
គួរបញ្ជាក់ផងដែរថា ទាំងបណ្តាញសហគមន៍ព្រៃឡង់ ទាំងអង្គការក្រៅរដ្ឋាភិបាល ដែលមានកម្មវត្ថុការពារសម្បត្តិធនធានធម្មជាតិ និងសារពត៌មានក្នុងស្រុកមួយចំនួនដែលយកចិត្តទុកដាក់ទៅលើព្រៃឈើ បាននិយាយស្រដៀងៗគ្នាថា អធិការស្រុកសណ្តាន់ដែលដឹកនាំដោយលោក អួង ម៉ាលី បង្ក្រាបបានតែអ្នកសារព័ត៌មាននិងអង្គការដែលការពារព្រៃឈើយកទៅ ដាក់គុកតែប៉ុណ្ណោះ ព្រោះពួកទាំងនេះជាឆ្អឹងទទឹង ក ជាមួយអ្នកប្រព្រឹត្តបទល្មើសព្រៃឈើ នៅស្រុកសណ្តាន់។ អង្គការក្រៅរដា្ឋភិបាលដែលការពារព្រៃឈើនិងអ្នកសារព័ត៌មានក្នុង ស្រុកធ្លាប់បានទទូចសុំ និងនៅតែទទូចសុំទៅដល់ ប្រមុខរាជរដ្ឋាភិបាល លោក ហ៊ុន សែន មេត្តាជួយចាត់វិធានការទៅដល់ មន្ត្រីខិលខូចដែលកំពុងបំផ្លាញសម្បត្តិធម្មជាតិ ។
ម្យ៉ាងវិញទៀត លោក ហ៊ុន សែន ធ្លាប់ចេញអនុសាសន៍ថា បើស្រលាញ់ បើអាណិត បើពេញចិត្ត បើជឿទុកចិត្តលើ ហ៊ុន សែន មន្ត្រីរាជការទាំងអស់ត្រូវធ្វើល្អជាមួយប្រជាពលរដ្ឋ ប៉ុន្តែ បច្ចុប្បន្នមានមន្ត្រីខិលខូចមួយចំនួននៅក្នុងស្រុកសណ្តាន់បាននឹង កំពុងជាន់ឈ្លីនូវអនុសាសន៍របស់លោក ដោយធ្វើទុក្ខបុកម្នេញចំពោះប្រជាជនស្លូតត្រង់ ហើយធ្វើជាខ្នងបង្អែកអោយអ្នកដែលបំផ្លាញព្រៃឈើ និងធ្វើជាអ្នកដែលកាប់បំផ្លាញព្រៃរបស់រដ្ឋយកមកធ្វើជា កម្មសិទិ្ធទៅវិញ។ពលរដ្ឋលើកឡើងថា គេកាប់ព្រៃរាប់រយហិកតាយកមកធ្វើជាកម្មសិទិ្ធផ្ទាល់ខ្លួនបាន តែបើប្រជាពលរដ្ឋកាប់ព្រៃតែមួយកាំបិត ច្បាស់ជាជាប់គុកមិនខាន។
បញ្ហានេះ សូមរដ្ឋមន្ត្រី ក្រសួងកសិកម្ម រុក្ខាប្រមាញ់និងនេសាទ ប្រើប្រាស់ពេលវេលាដ៏មានតម្លៃចុះទៅពិនិត្យបទល្មើសជាក់ស្តែង និងមានវិធានការជាបន្ទាន់ផង ព្រោះបើនៅតែពន្យាពេលទៀត ព្រៃឈើស្រុកសណ្តាន់នឹងក្លាយជាកម្មសិទ្ធិពួកអ្នកមានអំណាចមួយក្តាប់តូចនោះជាក់ជាមិនខាន ៕