រតនគិរីៈ នគរបាលបានចាប់បញ្ជូនជនម៉ុងតាញ៉ា បួននាក់ទៅប្រទេសវៀតណាម វិញដោយសំអាងថា ពួកគេជាជនអន្តោប្រវេសន៍ឆ្លងដែនចូលដីខ្មែរខុសច្បាប់ ប៉ុន្តែក៏មានអ្នកមកបន្ថែមថ្មី ៩ នាក់ទៀត ដែលធ្វើឲ្យអ្នកកំពុងលាក់ខ្លួនក្នុងព្រៃកើនឡើងដល់ទៅ ៥០ នាក់។
អ្នកដែលត្រូវបញ្ជូនទៅទាំងបួននាក់គឺជាសមាជិកនៃក្រុម ៩ នាក់ដែលបានឆ្លងដែនចូលមកលាក់ខ្លួនក្នុងព្រៃ ស្រុកលំផាត់ កាលពីថ្ងៃ ទី១០ ខែកុម្ភៈ នេះ។ នគរបាលស្រុកបានរកឃើញកន្លែងលាក់ខ្លួនពួកគេកាលពីព្រឹកថ្ងៃអង្គារ ហើយក៏ដេញចាប់បាន ៤នាក់ រួមមានស្ត្រីម្នាក់រត់បែកពីប្តី។ ឯ ៥នាក់ ទៀតបានរត់គេចរួច។ នេះបើយោងតាមអ្នកភូមិជនជាតិដើមដែលជួយទំនុកបម្រុងម៉ុងតាញ៉ា។
អ្នកភូមិចារ៉ាយសុំមិនបញ្ចេញឈ្មោះប្រាប់ថា៖ «យើងមិនហ៊ានធ្វើតង់ឲ្យនៅទេ ខ្លាចគេឃើញ។ គេនៅក្រោមដើមឈើ។ តែនៅតែគេឃើញប្រាប់ប៉ូលិសឲ្យចាប់ទៀត»។ គាត់ថា អ្នកដែលរត់រួចត្រូវបានសហគមន៍រកឃើញវិញនិងកំពុងតែរកកន្លែងឲ្យលាក់ខ្លួនផ្សេងទៀត។
លោក ម៉ឹង ស៊ីនាថ មន្ត្រីទទួលបន្ទុកព័ត៌មានសាលា ខេត្តរតនគិរី ទទួលស្គាល់ថា មានការចាប់ខ្លួនបញ្ជូនទៅវៀតណាមមែន តែពួកគេជាជនជាតិវៀតណាមឆ្លងដែនខុសច្បាប់ទេ។
លោក ស៊ីនាថ បញ្ជាក់ថា៖ «សូមជម្រាបឲ្យច្បាស់ មិនមែនជាមុខសញ្ញាម៉ុងតាញ៉ាទេ។ ជាជនជាតិវៀតណាមឆ្លងដែនមកប្រកបមុខរបរ ឬធ្វើស្រែចម្ការតាមព្រំដែនខុសច្បាប់»។ លោកបន្ថែមថា អ្នកត្រូវចាប់ខ្លួនទាំងនោះមិនមែនជាអ្នកដែលកំពុងលាក់ខ្លួនក្នុងព្រៃ ដើម្បីសុំសិទ្ធិជ្រកកោនដូចសហគមន៍និងអង្គការសង្គមស៊ីវិលអះអាងទេ។
មកដល់ពេលនេះនៅមានម៉ុងតាញ៉ា ៥០ នាក់កំពុងលាក់ខ្លួនក្នុងព្រៃ គិតចាប់ពីចុង ខែវិច្ឆិកា ឆ្នាំ២០១៤ គិតទាំងអ្នកមកដល់ថ្មី ៩នាក់ កាលពីល្ងាចថ្ងៃអង្គារ។ ក្រៅពី ៥០ នាក់នោះ ក៏មានគ្រួសារមួយ មានគ្នា ៥ នាក់ត្រូវនគរបាលចាប់បញ្ជូនទៅវៀតណាមកាលពីដើម ខែកុម្ភៈ នេះដែរ និង ១០ នាក់បានទៅជួបតំណាងអង្គការសហប្រជាជាតិខ្លួនឯង ហើយ ១៣ នាក់ទៀត ត្រូវក្រសួងមហាផ្ទៃនិងមន្ត្រីអង្គការសហប្រជាជាតិទៅទទួលយកពី ខេត្តរតនគិរី កាលពី ខែធ្នូ កន្លងមក ដើម្បីដំណើរការនីតិវិធីច្បាប់សុំសិទ្ធិជ្រកកោន។
អង្គការអាដហុកខេត្តរតនគិរី បានចាត់ទុកការបញ្ជូនជនម៉ុងតាញ៉ា ទៅវិញ ថាជាការរំលោភសិទ្ធិមនុស្សធ្ងន់ធ្ងរនិងមិនគោរពអនុសញ្ញាជនភៀសខ្លួនអន្តរជាតិ ឆ្នាំ១៩៥១ ដែលកម្ពុជាបានចុះហត្ថលេខា។
សកម្មជនសមាគមអាដហុក លោក ឆាយ ធី លើកឡើងថា៖ «ពួកគេឆ្លងចូលមកដីខ្មែរ ខេត្តរតនគិរី គឺពុំមែនដើម្បីសេដ្ឋកិច្ចឬស្នាក់នៅតាមភូមិស្រុកឬក៏ធ្វើចម្ការស្រែទេ គឺមកលាក់ខ្លួនក្នុងព្រៃរង់ចាំផ្តល់ព័ត៌មានទៅ UN សុំឲ្យជួយពួកគេក្នុងនាមជាអ្នកជ្រកកោនផ្នែកនយោបាយ»។
នេះជាការចាប់បញ្ជូនទៅវៀតណាមវិញលើកទីពីរ បន្ទាប់ពីលើក ទី១ បញ្ជូនគ្រួសារម៉ុងតាញ៉ា មានគ្នា ៥ នាក់កាលពីថ្ងៃ ទី១ ខែកុម្ភៈ។ បន្ទាប់ពីទៅដល់ប្រទេសវៀតណាម លោក ខ្លាន ពេន ជាមេគ្រួសារនោះនិងប្រពន្ធ ត្រូវអាជ្ញាធរវៀតណាមហៅទៅសួរនិងឃុំប្តី វ៉ៃដំសួរចម្លើយអស់ ១២ថ្ងៃ។ ខ្លាន ពេន ត្រូវដោះលែងនៅថ្ងៃ ទី១២ ខែកុម្ភៈ ប៉ុន្តែត្រូវនៅក្រោមការឃ្លាំមើលរបស់អាជ្ញាធរវៀតណាម។
ជនជាតិដើមចារ៉ាយរស់នៅក្នុង ស្រុកអណ្តូងមាស លោក ខ្លាន រ៉េន អាយុ ៣១ឆ្នាំ ជាបងប្រុសលោក ខ្លាន ពេន អះអាងពីម្សិលមិញថា ប្អូនគាត់ដូចមានសតិមិនប្រក្រតី ក្រោយពីដោះលែងមកវិញ។
លោកបញ្ជាក់ថា៖ «ប្រពន្ធវាតេមកខ្ញុំថា វាដូចជាចង់ឆ្កួតម៉េចមិនដឹងទេ។ បាត់ការចងចាំ មិនចង់ស្គាល់កូនប្រពន្ធ។ មិនដឹងយ៉ាងម៉េចបន្ទាប់ពីគេដោះលែង» ហើយថា លោកកំពុងដាក់ពាក្យសុំទៅនគរបាលប៉ុស្តិ៍ញ៉ាង សុំទៅមើលប្អូនប្រុសនៅឯ ប្រទេសវៀតណាម។
អ្នកស្រី វ៉ាន់ ហ៊ាលី តំណាងការិយាល័យសិទ្ធិមនុស្សអង្គការសហប្រជាជាតិ ថ្លែងតាមសារ អេឡិចត្រូនិកថា អ្នកស្វះស្វែងរកសិទ្ធិជ្រកកោនមានសិទ្ធិទទួលបានការដាក់ពាក្យស្នើសុំដោយមិនគិតពីជាតិសាសន៍ឬមធ្យោបាយដែលគេឆ្លងចូលមកទេ។
អ្នកស្រីថ្លែងថា៖ «ខ្ញុំប្រាកដថា រដ្ឋាភិបាលកម្ពុជាព្រមទាំងពលរដ្ឋមិនចង់ឃើញអ្នកទាំងនោះរងទុក្ខនោះទេ។ អាជ្ញាធរមានសមត្ថកិច្ចត្រូវតែធ្វើការងារបន្ត ដើម្បីធានាសិទ្ធិពួកគេ ជាអ្នកស្វែងរកសិទ្ធិជ្រកកោន»។
លោក ងួន គឿន ស្នងការនគរបាល ខេត្តរតនគិរី ជាប់រវល់ប្រជុំមិនអាចអធិប្បាយបានទេកាលពីម្សិលមិញ៕
