ភ្នំពេញ៖ រឿងអាស្រូវមួយកំពុងតែបានផ្ទុះ ឡើងនៅនាយកដ្ឋានសវនកម្មផ្ទៃក្នុងក្រសួងការងារ និងបណ្ដុះបណ្ដាលវិជ្ជាជីវៈ និងបានធ្វើឲ្យមន្ត្រីជាច្រើនក្នុងនាយកដ្ឋានមួយនេះ សម្ដែងនូវប្រតិកម្មយ៉ាងខ្លាំង ដោយសារតែលោកប្រធាននាយកដ្ឋាន គង់ ច័ន្ទតារា បង្កើតបក្ខពួកនៅក្នុងនាយកដ្ឋាន និងព្យាយាមកម្ចាត់មន្ត្រីមួយចំនួនចេញពីតួនាទី ដោយដាក់បញ្ចូលមន្ត្រីជំនិតរបស់ខ្លួនដែលជាមន្ត្រីជាប់ពាក់ព័ន្ធ និងអំពើពុករលួយកិបកេងប្រាក់នាយកដ្ឋានជំនួសទៅវិញ ។
តាមសេចក្តីរាយការណ៍បានឲ្យដឹងថា ក្រោយពីលោក គង់ ច័ន្ទតារា បានបាត់បង់មុខតំណែងជានាយខុទ្ទកាល័យ ក្រសួងមកនោះ គឺរូបគាត់បានខិតខំពង្រឹងអំណាចនៅក្នុងនាយកដ្ឋានសវនកម្មផ្ទៃក្នុង និងបង្កើតក្រុមបក្ខពួកថែមទៀត ។ ហើយថ្មីៗនេះ លោកប្រធាននាយកដ្ឋានមានគម្រោងផ្លាស់មន្ត្រីចំនួន២រូប ដោយក្នុងនោះ គឺប្ដូរលោក សាយ កុមារដ្ឋ ចេញពីប្រធានការិយាល័យសវនកម្មទី៣ ដោយដាក់បញ្ជូល លោក សឿង សុខយន់ ជាមន្ត្រីនៅការិយាល័យសវនកម្មទី១ ឲ្យទៅកាន់ការិយាល័យសវនកម្មទី ៣ និងអនុប្រធានសវនកម្មទី២ ហើយមកដល់ពេលនេះ លោករដ្ឋមន្ត្រី អ៊ិត សំហេង ពុំទាន់ចេញសេចក្តីប្រកាសផង ស្រាប់តែលោកប្រធាននាយកដ្ឋាន គង់ ច័ន្ទតារា បានឲ្យលោក សឿង សុខយន់ ទៅគ្រប់គ្រងការងារក្នុងការិយាល័យទី៣ ទាំងខុសច្បាប់។
តាមប្រភពបានឲ្យដឹងថា កន្លងទៅលោក សឿង សុខយន់ គឺមន្ត្រីមានជាប់ពាក់ព័ន្ធក្នុងរឿងអំពើពុករលួយដោយបានស៊ីដាច់លុយនាយកដ្ឋានជាង១០លានរៀល ហើយត្រូវបានលោកប្រធាន គង់ ច័ន្ទតារា បញ្ជាឲ្យកាត់ប្រាក់ខែសង ក្រោយពីរឿងស្ងប់ស្ងាត់បានមិនដល់មួយឆ្នាំផង បែរជាលោកប្រធាននាយកដ្ឋានមួយនេះ រៀបចំតែងតាំងឲ្យធ្វើជាប្រធានសវនកម្មទី៣ ដោយពុំទាន់មានសេចក្តីប្រកាសរដ្ឋមន្ត្រីផង ។
បញ្ហាខាងលើនេះ ត្រូវបានមន្ត្រីជាច្រើននៅក្នុងនាយកដ្ឋានផ្ទៃក្នុងរិះគន់ថា ជាការបង្កើតបក្ខពួក និងការដឹកនាំពុំមានតម្លាភាព បើទោះបីមានការផ្លាស់ប្ដូរប្រធានការិយាល័យសវនកម្មទី៣ ក៏គួរតែយកមន្ត្រីដែលមានសមត្ថភាពដែលនៅក្នុងការិយាល័យនេះមកជំនួស មិនគួរយកមន្ត្រីដែលមានរឿងអាស្រូវពុករលួយកន្លងមក មកឲ្យកាន់ការងារនោះទេ ។
តាមប្រភពបានឲ្យដឹងទៀតថា មូលដែលលោកប្រធាននាយកដ្ឋាន គង់ ច័ន្ទតារា មានគម្រោងផ្លាស់ប្ដូរប្រធានការិយាល័យសវនកម្មទី៣ និងអនុប្រធានសវនកម្មទី២ គឺដើម្បីពង្រឹងអំណាចងាយស្រួលក្នុងការប្រព្រឹត្តអំពើពុករលួយ ។ ព្រោះកន្លងមកប្រធានការិយាល័យសវនកម្មទី៣ លោក សាយ កុមារដ្ឋ និងលោកអនុប្រធានការិយាល័យសវនកម្មទី២ ពុំសូវស៊ីខ្សែជាមួយលោកប្រធាននាយកដ្ឋាន និងមន្ត្រីទាំងពីរនេះ តែងតែធ្វើការប្រឆាំងទៅនឹងអ្វីដែលប្រធាននាយកដ្ឋានប្រព្រឹត្តមិនត្រូវត្រឹម ។
ដូច្នេះទើបលោកប្រធាននាយកដ្ឋាន គង់ ច័ន្ទតារា កម្ចាត់មន្ត្រីទាំង២ខាងលើចេញ ក្នុងគោលបំណងក្ដោបអំណាច និងធ្វើការងារអ្វីៗបានស្រេចតែចិត្តគ្មានអ្នកប្រឆាំង។ ហើយបើនិយាយពីរឿងអាស្រូវរបស់លោកប្រធាន គង់ ច័ន្ទតារា កន្លងមក គឺមានរាប់មិនអស់ ដូចជាការចុះទៅធ្វើសវនកម្មរបស់គាត់នៅតាមមន្ទីរការងារ និងបណ្ដុះបណ្ដាលវិជ្ជាជីវៈតាមខេត្តនានា គឺដូចជាទៅប្រមូលលុយ និងប្រថាប់ត្រាឲ្យមន្ទីរទាំងនោះ ដែលចាយប្រាក់មិនត្រឹមត្រូវ ទៅជាត្រឹមត្រូវ ជាក់ស្ដែងដូចជាការចុះធ្វើសវនកម្មនៅមន្ទីរការងារ និងបណ្ដុះបណ្ដាលវិជ្ជាជីវៈខេត្តកោះកុង ដែលសម្បូរទៅដោយរឿងអាស្រូវពុករលួយដ៏ធ្ងន់ធ្ងរ បែរជាក្រុមសវនកម្មផ្ទៃក្នុង ដែលនឹកនាំដោយលោក គង់ ច័ន្ទតារា រកមិនឃើញ ហើយបែរជាក្លាយទៅជាបងប្អូនធម៌និងលោកប្រធានមន្ទីរ យក់ សង្វាត ដែលជាប្រធានមន្ទីរដ៏ពុករលួយទៅវិញ។
មិនត្រឹមតែប៉ុណ្ណោះ ក្រុមសវនកម្មប្រធាននាយកដ្ឋាន គង់ ច័ន្ទតារា បែររកឃើញកំហុសតូចតាចរបស់មន្ត្រីដែលមិនស៊ីខ្សែជាមួយលោកប្រធានមន្ទីរ យក់ សង្វាត ទៅវិញ។ ដោយឡែករឿងអំពើពុករលួយស៊ីប្រាក់រដ្ឋអស់ខ្ទង់ពាន់លានរៀល របស់លោក យក់ សង្វាត បែរជាក្រុមសវនកម្មរបស់លោក គង់ ច័ន្ទតារា រកមិនឃើញ។
មន្ត្រីជាច្រើនក្នុងនាយកដ្ឋានសវនកម្មផ្ទៃក្នុងបានអំពាវនាវសុំឲ្យរដ្ឋមន្ត្រី អ៊ិត សំហេង និងអង្គភាពប្រឆាំងអំពើពុករលួយរបស់ លោកទេសរដ្ឋមន្ត្រី ឱម យ៉ិនទៀង គួរពិនិត្យស្រាវជ្រាវលើរឿងអាស្រូវប្រធាននាយកដ្ឋានមួយនេះ និងបក្ខពួក ដើម្បីផ្ដល់យុត្តិធម៌ដល់មន្ត្រីរងគ្រោះ ។ ពាក់ពន្ឋ័ករណីពត័មានខាងលើ សារព័តមានយើងមិនអាចសូមការបំភ្លឺពីលោក គង់ ចន័តារា បាននោះទេ ៕
