ភ្នំពេញ ៖ សមាជិកក្រុមប្រឹក្សាខណ្ឌទួលគោកមកពីគណបក្សប្រឆាំង ក្នុងកិច្ចប្រជុំសាមញ្ញរបស់ក្រុមប្រឹក្សាលើកទី៨របស់ក្រុមប្រឹក្សាខណ្ឌទួលគោក កាលពីព្រឹកថ្ងៃទី២៨មករា បានសួរដេញដោលយ៉ាងច្រើនជុំវិញរឿងលក់អគាររដ្ឋបាលរបស់រដ្ឋនៅក្នុងអាណាចក្រខណ្ឌទួលគោក ពិសេសការលក់សាលាខណ្ឌទួលគោកតែម្តង។
លោក ចេប គឹមអានសមាជិកក្រុមប្រឹក្សាខណ្ឌទួលគោកមកពីគណបក្សប្រឆាំង ក្នុងកិច្ចប្រជុំនោះបានលើកឡើងថា អ្វីដែលលោកទទួលព័ត៌មានបានពីប្រជាពលរដ្ឋនោះ នៅក្នុងអាណាចក្រខណ្ឌទួលគោក មានអគាររដ្ឋមួយចំនួនត្រូវបានគេលក់ទៅឲ្យក្រុមហ៊ុនឯកជនទៅហើយ ដូចជាមន្ទីរពេទ្យបង្អែករបស់ខណ្ឌ ការិយាល័យប៉ូលិសសេដ្ឋកិច្ច និងសាលាខណ្ឌទួលគោកជាដើម។ លោកបញ្ជាក់ថា ការលក់ទ្រព្យសម្បត្តិរបស់រដ្ឋទាំងនេះ គឺលោកមិនគាំទ្រជាដាច់ខាត ហើយជុំវិញបញ្ហាទាំងនេះក្នុងនាមលោកជាសមាជិកក្រុមប្រឹក្សាលោកចង់ឲ្យគណៈអភិបាលខណ្ឌទួលគោកធ្វើការបកស្រាយឲ្យបានច្បាស់លាស់។
លោកឯក ឃុនដឿនអភិបាលខណ្ឌទួលគោកបានលើកឡើងថា ការលើកឡើងជុំវិញបញ្ហាខាងលើនេះ លោកចង់ឲ្យសមាជិកក្រុមប្រឹក្សាមុននឹងចោទប្រកាន់អ្វីមួយ ត្រូវតែមានភស្តុតាងជាក់លាក់ មិនត្រូវយកពាក្យចចាមអារ៉ាមមកធ្វើជាប្រធានបទនោះទេ។ លោកបន្តថា ពាក់ព័ន្ធនឹងពាក្យចចាមអារ៉ាមខាងលើកនេះ លោកក៏ធ្លាប់បានឮច្រើនមកហើយដែរ តែបើតាមប្រសាសន៍របស់
សម្តេចតេជោហ៊ុន សែន សាលារៀន មន្ទីរពេទ្យគឺដាច់ខាតមិនឲ្យមានការលក់ដូរនោះទេ តែបើដោះដូរប្រជាពលរដ្ឋដែលនៅក្នុងសាលាឲ្យចាកចេញគឺមាន។ លោកបញ្ជាក់ថា សមាជិកក្រុមប្រឹក្សាត្រូវចែកឲ្យបានច្បាស់ពីអ្វីដែលជាដែនសមត្ថកិច្ចរបស់រដ្ឋបាលខណ្ឌ យើងមិនមែនជាអ្នកគ្រប់គ្រងទាំងអស់នោះទេ ទ្រព្យសម្បត្តិរបស់ក្រសួងនិងស្ថាប័នផ្សេងៗគឺស្ថិតនៅដែនដីគ្រប់គ្រងរបស់គេ មិនមែនជាសិទ្ធិរបស់ក្រុមប្រឹក្សាខណ្ឌនោះទេ។
ពាក់ព័ន្ធនឹងការដោះដូរសាលាខណ្ឌទួលគោកលោកលោកឯក ឃុនដឿន បានបញ្ជាក់យ៉ាងច្បាស់ថា លោកបានប្រកាសរួចហើយ តាំងពីកិច្ចប្រជុំសាមញ្ញរបស់ក្រុមប្រឹក្សាអាណត្តិទី១មកម្ល៉េះ ការដោះដូរសាលាខណ្ឌនេះមានស ជ ណ ច្បាស់លាស់ក្នុងឆ្នាំ២០១២ មុនលោកមកកាន់តំណែងជាអភិបាលខណ្ឌទៅទៀត ហើយលោកក៏បានប្រកាសក្នុងកិច្ចប្រជុំជាផ្លូវការហើយដែរ។ ប៉ុន្តែនីតិវិធីនៃការដោះចាប់តាំងពីពេលនោះមកដល់ពេលនេះ ហាក់ដូចជាមិនបានរំកិលទៅមុខមួយជំហាននោះទេ។
លោក ឯក ឃុនដឿនក៏បានបញ្ជាក់ផងដែរថា ការដោះដូរសាលាខណ្ឌទួលគោកនេះវាមិនមានអ្វីត្រូវលាក់លៀមនោះទេ សាលាខណ្ឌទួលគោកថ្មីនោះ ត្រូវបានគេគូរប្លង់រួចរាល់ហើយ ដែលមានកំពស់៧ជាន់ និងមានចំណតរថយន្តក្រោមដីមួយទៀត តែលោកមិនទាន់ដឹងថា ទីតាំងនោះពិតប្រាកដនៅត្រង់ណានោះទេ ហើយក៏មិនមានអ្វីត្រូវលាក់លៀមដែរ ៕