ខេត្តសៀមរាប៖ គេមិនដឹងថាថៅកែសណ្ឋាគារលំដាប់ផ្កាយប្រាំ ឈ្មោះ ANGKOR ERA ដែលមានទីតាំង នៅតាមបណ្តោយផ្លូវជាតិលេខ៦ ភូមិខ្នារ សង្កាត់ជ្រាវ ក្រុងសៀមរាប ខេត្តសៀមរាប រកស៊ីផ្នែកអូតែល ខាត លំដាប់ផ្កាយប្រាំ ឬ ចំណេញនោះទេបានជាគាត់ពង្រីកបន្ថែមមុខរបរខុសច្បាប់មួយទៀត គឺ រកស៊ីជួញដូរឈើប្រណិតយ៉ាងសម្បើមអស្ចារ្យ ដោយគ្មានអាជ្ញាធរមានសមត្ថកិច្ចណាហ៊ានទៅរំខាន ឬ រារាំងមុខរបរដ៏កាក់កបនេះឡើយ។ សព្វថ្ងៃឈើប្រណីតរាប់ពាន់ម៉ែត្រគូបមានប្រភេទ ធ្នង់ នាងនួន បេង ពិសេស ក្រញូង កំពុងត្រូវបានរក្សា និងស្តុកទុកផ្នែកខាងក្នុងបរិវេណអូតែលយ៉ាងច្រើនសន្ធឹកសន្ធាប់ ហើយមួយថ្ងៃៗគេឃើញ មានរថយន្តដឹកឈើប្រណិតគ្រប់ប្រភេទ សាំយ៉ុង នីសាន់ និងកូរ៉េមួយតោនកន្លះដឹកឈើចូលដូចហែរកឋិន។
តាមប្រភពព័ត៌មានពីឈ្នួញរកស៊ីប្រចាំខេត្តសៀមរាប ដែលនិយាយក្នុងលក្ខខណ្ឌមិនបញ្ចេញឈ្មោះ បានអោយដឹងថា សព្វថ្ងៃឈើរបស់គេបានលក់ទៅអោយថៅកែសណ្ឋាគារអេរ៉ា មានចំនួន រាប់សឹប ម៉ែត្រគូប ហើយជាក់ស្តែងឈើនៅសល់ជាច្រើន ម៉ែត្រគូបទៀត ដែលនៅជំពាក់គេ តែគេមិនខ្វល់ទេ ក្នុងការរកស៊ីឈើជាមួយលោកប្រធានលីស៊ីណាថៅកែ សណ្ឋាគារអង្គរអេរ៉ា ព្រោះថ្លៃថ្នូរណាស់ ហើយជួយលាក់ការបានខ្ពស់ទៀតផង ព្រោះនៅពេលណាមាន សមត្ថកិច្ចមកសួរនាំខាងសណ្ឋាគារគេថា ទិញឈើមានច្បាប់ ដើម្បី ផ្គត់ផ្គង់សំណង់សណ្ឋាគារ តែការពិតគឺទិញសុទ្ធតែឈើអត់ច្បាប់ដើម្បីទៅលក់យកចំណេញបន្ត ។ប្រភពបានបន្តទៀតថា ខាងសណ្ឋាគារដែលជាអ្នកកុម្មង់ទិញបានប្រាប់ថា បើលក់ឈើអោយគេកុំខ្លាចអី ព្រោះគេមានខ្សែស្រឡាយអ្នកធំ ថ្នាក់ឧបនាយកមន្ត្រីហើយសូម្បីតែគាត់ក៏មានងារជាឯកឧត្តមដែរ សូម្បីតែនៅភ្នំពេញ ក៏គេជាន់ផ្អៀងដែរ អ្នកណាមួយដែលគេមិនស្គាល់ថៅកែខារ៉ាអូខេ ស៊ូល នៅម្តុំ T85 នោះ ។
ការនិយាយបែបនោះ គឺស័ក្តសមដែរ ព្រោះគិតមើលទៅគេហ៊ានរកស៊ីបើកចំហរយ៉ាងនេះហើយមិនមានសមត្ថកិច្ចណាហ៊ានក្អកជាមួយគេផង នោះគឺមកពីខ្លាចឥទ្ធិពលខ្សែស្រឡាយអ្នកធំហ្នឹងឯងជាពិសេសទៅទៀតនោះគីមានប៉ូលិសថ្នាក់ឧត្តមសេនីយ៍ម្នាក់ជិះរថយន្តLexus RX300ព័ណ ស្លែប្រចាំខេត្តសៀមរាបចាំកាងឲ្យទៀតផង ។ បើយើងកត់សំគាល់មើលទៅមួយថ្ងៃៗ គេឧស្សាហ៍ឃើញសមត្ថកិច្ចគ្រប់ជាន់ថ្នាក់មានតាំងពីខាងមេព្រៃប៉ូលីសសេដ្ឋកិច្ចខេត្ត ប៉ូលីសេដ្ឋកិច្ចក្រសួង ប៉េអឹមខេត្ត ប៉េអឹមផ្ទៃប្រទេសដែលទាំងអស់នោះសុទ្ទសឹងជាអ្នកទទួលបន្ទុកបង្ក្រាបបទល្មើស ពិសេសមន្ត្រីសាលាខេត្តចូលទៅហាត់ប្រាណ ឬ ស្ទីមនៅក្នុងសណ្ឋាគារអេរ៉ា នោះ តើហេតុអ្វីបានជាមិនដឹងថានៅក្នុងសណ្ឋាគារមានការជួញដូរឈើប្រណីតបែបនេះទៅវិញ? គេសង្ស័យថាខាងជំនាញប្រហែលជាត្រូវថ្នាំសណ្តំរបស់លោកលីស៊ីណា ថៅកែសណ្ឋាគារ ហើយមើលទៅ?
ទាក់ទិននឹងករណីខាងលើនេះ អ្នកយកព័ត៌មានយើងមិនអាចសុំការពន្យល់ថាពីរលោក លី ស៊ីណា ម្ចាស់សណ្នាគារអង្គរអេរ៉ាបាននោះទេ ។ ហើយមហាជនកំពុងរង់ចាំមើលចំណាត់ការរបស់សមត្ថកិច្ចពាក់ព័ន្ធជាពិសេសអាជ្ញាធម៌ខេត្តសៀមរាបក្នុងរឿងនេះ ៕