សៀមរាប ៖ លោកប៉ា ប៉ូរ ជាមេឃុំកំពង់ឃ្លាំង ស្រុកសូទ្រនិគម ខេត្តសៀមរាបកំពុងរងនូវការរិះគន់យ៉ាង ខ្លាំងពីសំណាក់ប្រជាពលរដ្ឋ ដែលកំពុងមានទំនាស់ប្តឹងគ្នាដណ្តើមកាន់កាប់ដីចំការសណ្តែកទំហំប្រ មាណ០៧ហិកតានៅតំបន់ពពាចក្នុងឃុំនោះ ដោយសារតែលោកបាន បញ្ជារអោយគេយកបង្គោលទៅ បោះបែងចែកដីទំនាស់នោះទាំងដីការសម្រេចរបស់តុលាការមិនទាន់ចូលជាស្ថាពរផងនោះ ។
ដីចំការសណ្តែកទំហំប្រមាណ០៧ហិកតា ដែលកំពុងមានជម្លោះដណ្តើមគ្នានោះមានសហម្ចាស់បំ ណុលឈ្មោះ លី វិបុល ភេទប្រុស អាយុ២៦ឆ្នាំ និងឈ្មោះ ខូយ សំណាង ភេទប្រុស អាយុ៣៦ឆ្នាំ ទាំង ពីរនាក់រស់នៅភូមិផ្សារឃ្លាំង ឃុំកំពង់ឃ្លាំង រីឯសហកូនបំណុលទី០១ឈ្មោះ ម៉ឹង វង្ស ភេទប្រុសនៅភូមិ ជំនៀងទី០២ឈ្មោះ ព្រាប ជា ភេទប្រុសនៅភូមិរទាំង ឃុំកំពង់ឃ្លាំង ហើយបានប្តឹងគ្នាដណ្តើមធ្វើជា ម្ចាស់រៀងៗខ្លួនកាលពីចុងឆ្នាំ២០១៤។
នៅថ្ងៃទី១៩ ខែវិច្ឆិកា ឆ្នាំ២០១៤ លោក កូយ សៅ ចៅក្រមនៃសាលាដំបូងខេត្តសៀមរាបបានចេញដី កាសម្រេចចាត់ចែងជាបណ្តោះអាសន្នអោយទៅសហម្ចាស់បំណុល ខូយ សំណាង និង លី វិបុល ធ្វើ ការគ្រប់គ្រង និងធ្វើចំការជាបណ្តោះអាសន្ន ដោយហាមឃាត់សហកូនបំណុល ព្រាប ជា និង ម៉ឹង វង្ស មិនអោយធ្វើសកម្មភាពនានានៅលើដីទំនាស់នោះទេ រហូតដល់ពេលសម្រេចដល់អង្គសេចក្តីចប់ជា ស្ថាពរ។
សហកូនបំណុលបន្ទាប់មកនៅដើមខែធ្នូ ឆ្នាំ២០១៤ ក៏បានដាក់ពាក្យសុំតវ៉ាចំពោះដីកាសម្រេចចាត់ ចែងជាបណ្តោះអាសន្ននេះ។ រហូតមកដល់ថ្ងៃទី០៩ ខែមករា ឆ្នាំ២០១៥នេះលោកចៅក្រម កូយ សៅ នៃសាលាដំបូងខេត្តសៀមរាបបានចេញដីកាសម្រេចអំពីពាក្យសុំតវ៉ាចំពោះដីកាសម្រេចចាត់ចែងជា បណ្តោះអាសន្នដោយបានសម្រេចលុបចោលដីកាចាត់ចែងជាបណ្តោះអាសន្ន ចេញនៅថ្ងៃទី១៩ ខែ វិច្ឆិកា ឆ្នាំ២០១៤ នោះវិញ និងបានប្រគល់ដីប្រមាណ០៧ហិកតានោះអោយទៅសហកូនបំណុលគ្រប់ គ្រងកាន់កាប់វិញជាបណ្តោះអាសន្នសិនរង់ចាំដល់បណ្តឹងអង្គសេចក្តីចប់សព្វគ្រប់ជាស្ថាពរ។
ជាថ្មីម្តងទៀត សហម្ចាស់បំណុល ខូយ សំណាង និង លី វិបុល នៅថ្ងៃទី១៦ ខែមករា ឆ្នាំ២០១៥ នេះក៏ បានបន្តប្តឹងទៅសាលាឧទ្ធរណ៍ ដើម្បីជំទាស់ទៅនឹងដីកាសម្រេចអំពីពាក្យសុំតវ៉ាចំពោះដីកាសម្រេច ចាត់ចែងជាបណ្តោះអាសន្ននោះវិញដែលធ្វើអោយដីកានេះមិនទាន់ចូលជាស្ថាពរនៅឡើយទេ។
ប៉ុន្តែអ្វីដែលជាការគួរអោយងឿងឆ្ងល់នោះគឺថា កាលពីថ្ងៃទី១៤ ខែមករា ឆ្នាំ២០១៤លោក ប៉ា ប៉ូរ មេឃុំ កំពង់ឃ្លាំងបានដឹកនាំកំលាំងមន្ត្រីកងរាជអាវុធហត្ថម្នាក់និងប៉ូលិសម្នាក់ទៅបោះបង្គោលបែងចែកដីទំនាស់នោះ ទាំងដីកាសម្រេចរបស់ចៅក្រមសាលាដំបូងខេត្តសៀមរាបមិនទាន់ទាំងចូលជាស្ថាពរនៅ ឡើយ នេះបើតាមការអោយដឹងពីសហម្ចាស់បំណុលនិងមេធាវី ។
ហើយនៅក្នុងដីកាសម្រេចអំពីពាក្យសុំតវ៉ាចំពោះដីកាសម្រេចចាត់ចែងជាបណ្តោះអាសន្ននោះក៏មាន បញ្ជាក់ដែរថា នឹងពុំមានអានុភាពឡើយបើមិនទាន់ចូលជាស្ថាពរស្របតាមបញ្ញត្តិមាត្រា៥៥៦នៃក្រម នីតិវិធីរដ្ឋប្បវេណី។
លោក សួង សុភា មេធាវីរបស់សហម្ចាស់បំណុលបានប្រាប់អ្នកសារព័ត៌មានថាទង្វើរបស់លោកមេឃុំកំពង់ឃ្លាំង គឺបានបំពានទៅលើសេចក្តីសម្រេចរបស់តុលាការ។
លោកប៉ាប៉ូរមេឃុំកំពង់ឃ្លាំងមិនអាចទំនាក់ទំនងសុំការពន្យល់អំពីបញ្ហាខាងលើ នោះបានទេ ៕
