ខេត្តពោធិ៍សាត់៖ តាមប្រភពពីមន្រ្តីរាជការក្នុងខេត្តបានអោយដឹងថា លោក កាង ប៉េងហាក់ ប្រធានមន្ទីរសាធារណៈការនិងដឹកជញ្ជូនខេត្តពោធិ៍សាត់ឡើងកាន់តំណែងដុះស្លែ ល្បីល្បាញខ្លាំងខាងពុករលួយដោយសារមានខ្នងបង្អែកក្រាស់នៅក្រសួងសាធារណ ការ និងដឹក ជញ្ជូនទើបលោក កាង ប៉េងហាក់ អាចកាន់តំណែងជាប្រធានមន្ទីរសាធារណការ និងដឹកជញ្ជូនខេត្តពោធិ៍សាត់ដុះ ស្លែដោយពុំមានការផ្លាស់ប្ដូរអ្វីសោះ។ ដូច្នេះលោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូនមិនគួររក្សាភាពស្ងៀមស្ងាត់ បែបនេះនោះទេព្រោះថា ភាពមិនប្រក្រតីពុករលួយរបស់លោក កាង ប៉េងហាក់ ត្រូវបានលាតត្រដាងជាបន្តបន្ទាប់។បច្ចុប្បន្នអង្គភាពមន្ទីរសាធារណការ និងដឹក ជញ្ជូនខេត្តពោធិ៍សាត់ ស្ទើរតែក្លាយទៅជាក្រុមហ៊ុនរកស៊ីផ្ដាច់ មុខរបស់លោក កាង ប៉េងហាក់ និងមន្រ្តីជំនិតៗរបស់ខ្លួនអស់ទៅហើយនោះ។
ប្រភពពីមន្រ្តីនៅក្នុងមន្ទីរសាធារណការ និង ដឹកជញ្ជូនខេត្តពោធិ៍សាត់ម្នាក់សូមមិនបញ្ចេញឈ្មោះបានប្រាប់អោយដឹងថា ច្រើនឆ្នាំកន្លងទៅគម្រោងស្ថាបនាផ្លូវ ជួសជុលផ្លូវជាតិ ផ្លូវលំ ក្នុងខេត្តពោធិ៍សាត់ បានក្លាយទៅជាប្រភពចំណូលដ៏សំខាន់របស់លោក កាង ប៉េងហាក់ និងមន្រ្តីជំនិត ៗ។ ទន្ទឹមនឹងនេះលោក កាង ប៉េងហាក់ បើកដៃអោយលោក ឆាំ ហាវ ប្រធានស្ថានីយជញ្ជីងថ្លឹងរថយន្តផ្លូវជាតិលេខ៥ ស្រុកបាកាន ឃ្លាំង មឿង អោយប្រែក្លាយទៅជាជញ្ជីងថ្លឹងលុយតាមអំពើចិត្ត ក៏ជាប្រភពចំណូលដ៏សំខាន់របស់លោក កាង ប៉េងហាក់ ផងដែរ។ ប្រសិនបើគ្មានការបើកដៃពី សំណាក់លោក កាង ប៉េងហាក់ នោះទេ គឺលោក ឆាំ ហាវ ប្រធានស្ថានីយជញ្ជីងថ្លឹងរថយន្តឃ្លាំងមឿង ផ្លូវជាតិលេខ៥ ស្រុកបាកានខេត្តពោធិ៍សាត់មិនអាចប្រែក្លាយជញ្ជីងថ្លឹងរថយន្តទៅជាជញ្ជីងថ្លឹងលុយតាមអំពើចិត្តបានឡើយ។
ប្រភពពីក្រុមឈ្មួញនិងអាជីវករដឹកទំនិញបានឲ្យដឹងថា ទោះបីពួកគេដឹកជញ្ជូនទំនិញផ្ទុកមិនលើសទម្ងន់ ក៏ត្រូវបង់លុយតាមការកំណត់របស់លោក ឆាំ ហាវ ប្រធានស្ថានីយជញ្ជីងថ្លឹងរថយន្តឃ្លាំងមឿង មិនអាចតវ៉ាបានឡើយ។ រីឯរថយន្តធំៗដឹកជញ្ជូនទំនិញ ដឹកជញ្ជូនខ្សាច់ ក្រួស ថ្ម លើសទម្ងន់ អាច បើក បរឆ្លងកាត់មុខស្ថានីយជញ្ជីងថ្លឹងរថយន្តឃ្លាំងមឿងយ៉ាងរលូន មិនបាច់ចូលថ្លឹងឲ្យតែម្ចាស់រថយន្តទាំងនោះបាន បង់ លុយតាមការកំណត់របស់លោក ឆាំ ហាវ និងបក្ខពួកជាការស្រេច។ ហេតុនេះលោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូនព្រមទាំងលោក សេង ឈួន មេជញ្ជីងថ្លឹងរថយន្តទូទាំងប្រទេសមិនគួរមើលរំលងតទៅទៀតទេ ព្រោះអំពើពុករលួយរបស់លោក កាង ប៉េងហាក់ និងលោក ឆាំ ហាវ មិនអាចបិទបាំងបាននោះទេ។ ដូច្នេះហើយសូមលោក ឱម យ៉ិនទៀង ប្រធានអង្គភាពប្រឆាំងអំពើពុករលួយដាក់ការសេុីអង្កេតអោយស៊ីជម្រៅទៅលើក្រុមមន្រ្តីស្ថានីយជញ្ជីងថ្លឹងរថយន្តផ្លូវជាតិលេខ៥ឃ្លាំងមឿង ស្រុកបាកានខេត្តពោធិ៍សាត់ដែលប្រព្រឹត្តអំពើពុករលួយនេះផង។ពាក់ព័ន្ធព័ត៌មានខាងលើគេហទំព័រ(www.enn-tv.com) យើងខ្ញុំរងចាំនូវការពន្យល់បកស្រាយពីលោក កាង ប៉េងហាក់ ប្រធានមន្ទីរសាធារណការនិងដឹកជញ្ជូននិងលោក ឆាំ ហាវ ប្រធានស្ថានីយ៍ជញ្ជីងថ្លឹងរថយន្តឃ្លាំងមឿង រាល់ម៉ោងធ្វើការ៕
