ព្រៃវែង ៖ ប្រភពពីក្រុមឈ្មួញ ដឹកទំនិញឆ្លងកាត់ស្ថានីយ៍ជញ្ជីងថ្លឹងរថយន្តព្រែកព្នៅ លើកំណាត់ផ្លូវជាតិលេខ៨ បញ្ជាក់ថា សព្វថ្ងៃនេះប្រធានជញ្ជីងថ្លឹងរថយន្ត កំពុងសប្បាយចិត្តប្រមូលលុយចែកគ្នាធ្វើមានធ្វើបាន យ៉ាងសុខស្រួលបើទោះបីរថយន្តធំៗផ្ទុកមិនលើសទម្ងន់ក៍ត្រូវតែបង់លុយតាមការ កំណត់របស់ប្រធានស្ថានីយជញ្ជីងថ្លឹងអោយខានតែបានមិនអាចតវ៉ាបានហើយនៅតែអាចធ្វើសកម្ម ភាពទាំងយប់ទាំងថ្ងៃមិនញញើតអ្វីទាំងអស់ ។ ចំណែកលោក ស៊ុន ចាន់ថុល រដ្ឋមន្ត្រីក្រសួងសាធារណៈការនិងដឹកជញ្ជូននិងលោក សេង ឈួន ប្រធានជញ្ជីងថ្លឹងរថយន្តទូទាំងប្រទេសបែរជាធ្វើមិនដឹង មិនឮ រក្សាភាពស្ងៀមស្ងាត់ ទុកអោយមេស្ថានីយជញ្ជីងថ្លឹងរថយន្តផ្លូវជាតិលេខ៨ធ្វើអ្វីៗតាមអំពើចិត្ត ។ឈ្មួញនិងអាជីវករដែលដឹក ជញ្ជូនទំនិញចេញពីស្រុកយួនតាមច្រកទ្វារព្រំដែនអន្តរជាតិមុឺនជ័យ និងច្រកទ្វារព្រំដែនអន្តរជាតិត្រពាំងផ្លុង ឆ្លងកាត់ផ្លូវ ជាតិលេខ៨ ក្នុងស្រុកពារាំង បានឲ្យដឹងថា បើទោះបីពួកគេផ្ទុកលើសទម្ងន់ ឬមិនលើសទម្ងន់យ៉ាងណាក៏ដោយ ក៏ត្រូវតែបង់លុយតាមការ កំណត់ របស់ក្រុមមន្ត្រីប្រចាំស្ថានីយ៍ជញ្ជីងថ្លឹងរថយន្តផ្លូវជាតិលេខ ៨ ក្នុងភូមិព្រែកព្នៅ ឃុំព្រែកព្នៅ ស្រុកពារាំងខេត្តព្រៃវែង មិនអាចអាក់ខានបានឡើយ។
ប្រភពដដែលបានបន្ថែមថា ពួកគាត់ដឹកជញ្ជូនទំនិញឬកសិផលផ្សេងៗមកពីខេត្ត នានាឆ្លងកាត់ស្ថានីយ៍ជញ្ជីងថ្លឹងរថយន្តព្រែកព្នៅ ស្រុកពារាំង ដោយគោរពតាមច្បាប់កំណត់ក៏នៅតែចៀសមិនផុតពីបង់លុយ ឲ្យក្រុមមន្ត្រីពុករលួយនិងបក្សពួកប្រចាំស្ថានីយ៍ជញ្ជីងថ្លឹងរថយន្តចំណុចនោះដែរ ។
ដូច្នេះហើយទើបមានការអំពាវនាវឲ្យលោក ជា សុមេធី អភិបាលខេត្តព្រៃវែងក៏ដូចជាលោក ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូនចាត់វិធានការទប់ស្កាត់អំពើពុករលួយរបស់លោកប្រធានមន្ទីរសាធារណការនិងដឹកជញ្ជូនខេត្តព្រៃវែងនិងលោកប្រធានស្ថានីយជញ្ជីងថ្លឹងរថយន្តផ្លូវជាតិ លេខ៨ភូមិព្រែកព្នៅនេះផង!ជាពិសេសលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ដែលធ្លាប់ប្តេជ្ញាលុបបំបាត់អំពើពុករលួយតាមដងផ្លូវចាត់វិធានការទប់ស្កាត់អំពើពុករលួយរបស់ក្រុមមន្រ្តីប្រចាំស្ថានីយជញ្ជីងថ្លឹងរថយន្តផ្លូវជាតិលេខ ៨ ភូមិព្រែកព្នៅកំពុងប្រែក្លាយទៅជាជញ្ជីងថ្លឹងលុយ ហើយទាន។
ប្រភពពីមន្ត្រីក្នុងមន្ទីរសាធារណការនិងដឹកជញ្ជូនខេត្តព្រៃវែងបានឲ្យដឹងថា ការដែលក្រុមមន្ត្រីប្រចាំស្ថានីយ៍ជញ្ជីងថ្លឹងរថយន្តព្រែកព្នៅ តាមបណ្តោយផ្លូវជាតិលេខ៨ ចំណុចស្រុកពារាំង គាបយកលុយពីឈ្មួញនិងអាជីវករតាមអំពើចិត្តគឺមានការឃុបឃិតបើកដៃពីមន្ត្រីធំៗនៅខាងលើផងដែរ។ជាការពិតឈ្មួញមួយចំនួនបានប្រើប្រាស់រថយន្ត វ៉េអងធំៗ រថយន្តសណ្ដោងកន្ទុយសណ្ដោងរ៉ឺម៉កផ្ទុកទំនិញលើសទម្ងន់ បើកបរឆ្លងកាត់មុខមន្ត្រីប្រចាំស្ថានីយ៍ជញ្ជីងថ្លឹងរថយន្តព្រែកព្នៅ ដោយគ្មានការព្រួយបារម្ភ ផ្ទុយទៅវិញមន្ត្រីទាំងនោះ គ្រាន់តែតម្រូវឲ្យម្ចាស់រថយន្ត ខ្នាចធំដឹកជញ្ជូនទំនិញលើសទម្ងន់ចូលបង់ លុយតាមការកំណត់ គឺជាការស្រេចដោយមិនខ្វល់ពីរឿងរថយន្តទាំងនោះ ធ្វើឲ្យខូចផ្លូវខូចស្ពានឡេីយ ។
ប្រភពពីប្រជាពលរដ្ឋរស់នៅ ភូមិព្រែកព្នៅ ឃុំព្រែកព្នៅ្រ ស្រុកពារាំង បានឲ្យដឹងថា ពេលរថយន្តធំៗ ដឹកទំនិញលើសទម្ងន់បើកបរឆ្លងកាត់មុខស្ថានីយ៍គឺតែងតែឃើញព្រូឡានតៃ កុងឡានរត់យ៉ាងប្រសេចប្រសាចទៅបង់ លុយឲ្យប្រធានជញ្ជីងនឹងក្រុមមន្ត្រីប្រចាំស្ថានីយ៍ជញ្ជីងថ្លឹងព្រែកព្នៅ តាមការកំណត់ដោយមិនអាចតវ៉ាបាន។ ប្រសិនបើឈ្មួញឬអាជីវករណាម្នាក់ហ៊ានតវ៉ាប្រាកដជាត្រូវក្រុមមន្ត្រីប្រចាំស្ថានីយ៍ជញ្ជីងថ្លឹងរថយន្តលើផ្លូវជាតិលេខ ៨ ក្នុងភូមិព្រែកព្នៅ ឃុំព្រែកព្នៅ ស្រុកពារាំង ខេត្តព្រៃវែង រករឿងឲ្យរើទំនិញចុះឡើងតាមទំនេីងចិត្ត របស់ពួកគេជាមិនខាន់ ។
ហេតុនេះហើយទើបរថយន្តធំៗដឹកជញ្ជូនទំនិញលើសទម្ងន់រាប់តោនហូរហៀរខុសលក្ខណៈបច្ចេកទេសនៅតែអាចបើកបរលើផ្លូវជាតិលេខ៨យ៉ាងគគ្រឹកគគ្រេងបណ្ដោលឲ្យខូចផ្លូវខូចស្ពាន ជាបន្តបន្ទាប់ ។
បញ្ហានេះដែលលោកស៊ុន ចាន់ ថុលរដ្ឋមន្ត្រីក្រសួងសាធារណការនិងដឹកជញ្ជូននិងលោកសេង ឈួន ប្រធានជញ្ជីងថ្លឹងរថយន្តទូទាំងប្រទេស មិនគួរមើលរំលងតទៅទៀតនោះទេ!ព្រោះក្រុមមន្ត្រីស្ថានីយជញ្ជីងថ្លឹងរថយន្តលើ ផ្លូវជាតិលេខ៨ ស្រុកពារាំង ខេត្តព្រៃវែង កំពុងប្រែក្លាយទៅជាស្ថានីយជញ្ជីងថ្លឹងលុយហើយ៕មានត
