ក្នុងគម្រប់ខួប ៣០ ឆ្នាំនៃការកាន់អំណាចជានាយករដ្ឋមន្ត្រីកម្ពុជា កាលពីម្សិលមិញ លោក ហ៊ុន សែន បានឆ្លៀតយកពិធីចាក់បេតុងតភ្ជាប់ស្ពានអ្នកលឿងឆ្លងកាត់ទន្លេ មេគង្គ ដើម្បីបញ្ជាក់ជាថ្មីម្តងទៀតពីសមិទ្ធផលសំខាន់ៗរបស់លោក ហើយទន្ទឹមនឹងនេះ បានទទួលស្គាល់ជាលើកទី២ ថា ការដឹកនាំកម្ពុជាមិនបានប្រព្រឹត្តទៅដោយគ្មានកំហុសនោះទេ។
ក្នុងថ្ងៃគម្រប់ខួប ៣០ ឆ្នាំកាលពីម្សិលមិញ បានធ្វើឲ្យមានការកោតសរសើរផង និងរិះគន់ផង ចំពោះលោក ហ៊ុន សែន ដែលបានធ្វើឲ្យកម្ពុជា មានសុខសន្តិភាព មានការអភិវឌ្ឍ រីកចម្រើនគួរឲ្យកត់សម្គាល់ ក៏ប៉ុន្តែ ក៏បានធ្វើឲ្យកម្ពុជា ប្រឈមនឹងបញ្ហាជាច្រើនផងដែរ ជាពិសេសបញ្ហាវិវាទដីធ្លី ការបំផ្លាញធនធានធម្មជាតិ អំពើពុករលួយ បក្ខពួកនិយមគម្លាតកាន់តែធំឡើងរវាងអ្នកមាននឹងអ្នកក្រ និងអំពើអយុត្តិធម៌ក្នុងសង្គមជាដើម ។ល។
លោកនាយករដ្ឋមន្ត្រីអាយុ ៦២ ឆ្នាំរូបនេះ ហាក់បីដូចជាដឹងច្បាស់ពីចំណុចនេះ ខណៈដែលលោកបានថ្លែងទៅកាន់មនុស្សជាច្រើន នៅក្នុងពិធីតភ្ជាប់ស្ពានអ្នកលឿងដែលសាងសង់ដោយជំនួយជប៉ុនមាន ប្រវែង ២២០០ ម៉ែត្រ ដែលជាស្ពានវែងបំផុតនៅកម្ពុជា។
លោកបន្តថា៖ «ទាំងល្អ និងអាក្រក់តែងតែបានកើតឡើង ប៉ុន្តែ គេត្រូវសម្លឹងទៅក្រោយ ពេលហ៊ុន សែន ក្លាយជានាយករដ្ឋមន្ត្រី [ក្នុងឆ្នាំ ១៩៨៥] នៅពេលសង្គ្រាមស៊ីវិលកំពុងមាននៅឡើយក្នុងប្រទេសនេះ» ។ លោកបញ្ជាក់ថា៖«បើគ្មាន ហ៊ុន សែន» នឹងគ្មានទេ កិច្ចព្រមព្រៀងសន្តិភាពទីក្រុងប៉ារីស និងគ្មានការបញ្ចប់សង្គ្រាមស៊ីវិលរវាងកងទ័ពរដ្ឋាភិបាល និងខ្មែរក្រហមទេ ដោយលោកបានសំដៅលើគោលនយោបាយឈ្នះ ឈ្នះរបស់រដ្ឋាភិបាល ដែលធ្វើឲ្យមានពួកកុម្មុយនីស្តជាច្រើនផ្តាច់ខ្លួនក្នុងទសវត្សរ៍ ទី៩០។
លោកបន្តថា៖ «អ៊ុនតាក់ចំណាយប្រាក់ ២ ពាន់លានដុល្លារ ប៉ុន្តែ គេមិនអាចបញ្ចប់សង្គ្រាមស៊ីវិលបានទេ។ លោក Yasushi Akashi ប្រធានអ៊ុនតាក់ មិនអាចចូលទៅប៉ៃលិន ប៉ុន្តែ ខ្ញុំកាន់កាប់ប៉ៃលិន ហើយខ្មែររួមដៃគ្នាកសាងប្រទេសឡើងវិញ»។ «ប្រសិនបើ ហ៊ុន សែន មិនចូលក្នុងរូងខ្លា តើចាប់ខ្លាម៉េចបាន»។
បើទោះបីជាការបណ្តេញចេញ និងការផ្តល់ដីទំហំធំធេងទៅឲ្យក្រុមហ៊ុនឯកជនក្នុងទម្រង់ជា ដីសម្បទានសេដ្ឋកិច្ច បានធ្វើឲ្យប៉ះពាល់ដល់កេរ្តិ៍ឈ្មោះរបស់រដ្ឋាភិបាល នាប៉ុន្មានឆ្នាំថ្មីៗនេះក៏ដោយ ក៏ប៉ុន្តែ លោកនាយករដ្ឋមន្ត្រីក៏បានអួតពីជោគជ័យរបស់លោកក្នុងវិស័យនេះផង ដែរ។
ដោយឡែក លោក ញែម ប៉ុញរិទ្ទ អ្នកនាំពាក្សអោយគណះបក្សសង្គ្រោះជាតិបានរិះគន់លោកហ៊ុន សែនចំៗដែរថាកាលដែលលោកកាន់តំណែងយូរនោះបង្គប់នូវអំពើពុករលួយ អយុតិ្តធម៍ក្នុងសង្គម រំលោភសិទិ្ទមនុស្ស បើកដៃអោយមន្ត្រីរបស់លោកកាប់បំផ្លាញព្រៃឈើការបំផ្លាញធនធានធម្មជាតិ ការរឹបអូសដីប្រជាពលរដ្ឋទៅអោយក្រុមហ៊ុនអភិវឌ្ឍជាដើម ៕
