ភ្នំពេញ ៖ មានការភ្ញាក់ផ្អើលដល់ ប្រជាពុទ្ធបរិស័ទ និងព្រះសង្ឃជាច្រើន អង្គបានទៅចោមរោមមើលការប្រយុទ្ធ គ្នារវាងលោកនេននឹងគ្រូសូត្រឆ្វេង កាលពីវេលាម៉ោង៨និង២០នាទីព្រឹក ថ្ងៃទី១២ ខែមករា ឆ្នាំ២០១៥ នៅក្នុង បរិវេណវត្ដសាមគ្គីរង្សីក្នុងសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ដែលធ្វើឱ្យគ្រូសូត្រឆ្វេងត្រូវទទួលអនិច្ច ធម្មនៅពេលបញ្ជូនទៅដល់មន្ទីរពេទ្យតែបន្ដិច រីឯលោកនេនជាសង្ឃដៃដល់ត្រូវ សមត្ថកិច្ចឃាត់ខ្លួនបានភ្លាមៗផងដែរ ។
ប្រភព ពីកន្លែងកើតហេតុបានឱ្យដឹងថា ព្រះសង្ឃដែលរងគ្រោះរហូតទទួលអនិច្ចធម្មព្រះនាមថាច់ ខាន់ ព្រះជន្ម៣៧ឆ្នាំ ជនជាតិខ្មែរកម្ពុជាក្រោមមានតួនាទីជាគ្រូសូត្រឆ្វេងនៅក្នុងវត្ដ សាមគ្គីរង្សី ចំណែក សង្ឃដែលបង្កហិង្សាព្រះនាមលី តុញ ជា សាមណេរមានព្រះជន្ម១៩ឆ្នាំ និងមាន ស្រុកកំណើតនៅកម្ពុជាក្រោមបានមក គង់នៅក្នុងវត្ដសាមគ្គីរង្សីជាមួយគ្នាជិត២ឆ្នាំហើយ ។
តាម ប្រភពពីសង្ឃមួយអង្គដែលដឹងរឿងហេតុតែមិនបានប្រាប់ព្រះនាមថា សង្ឃពីរអង្គនេះសង្ស័យមានគំនុំជាមួយគ្នាជាយូរខែថ្ងៃមកហើយ ដោយសារ តែគ្រូសូត្រឆ្វេងឧស្សាហ៍ស្ដីបន្ទោស និង ដាក់ពិន័យលោកនេនជាសង្ឃដៃដល់ច្រើនដងពេក ហើយទើបតែបានបញ្ចេញហិង្សា នៅថ្ងៃនេះដោយសង្ឃដែលប្រព្រឹត្ដហិង្សាជានេនធម្មតា និងសង្ឃដែលរងគ្រោះ ជាព្រះភិក្ខុ និងជាគ្រូសូត្រឆ្វេងប្រចាំវត្ដនេះផង ។
ព្រះសង្ឃដដែលបានមានថេរដីកា បន្ដថា ទំនងជាសង្ឃនាម លី តុញ ដែល ត្រូវគ្រូសូត្រឆ្វេងថាច់ ខាន់ ធ្លាប់ដាក់ វិន័យពីបទប្រព្រឹត្ដរឿងផ្ដេសផ្ដាសនៅ ក្នុងវត្ដដោយបានទំនាក់ទំនងជាមួយនារី ភេទក្បែរវត្ដខុសនឹងវិន័យសង្ឃមិនតែ ប៉ុណ្ណោះជារៀងរាល់ល្ងាចៗសង្ឃ លី តុញ នេះតែងចេញទៅឆាន់ភេសជ្ជៈនៅតាមតូបកាហ្វេធ្វើដូចគ្រហស្ថហេតុនេះ បាន ជាគ្រូសូត្រឆ្វេងហៅមកណែនាំ និងដាក់ ពិន័យមួយលើកជាពីរលើក តែលើក ចុងក្រោយនេះលោកគ្រូសូត្រឆ្វេងបាន គំរាមថា បើសិននេន លី តុញ នៅតែ ប្រព្រឹត្ដនិងសេពគប់ជាមួយក្មេងស្ទាវនិងចេញទៅឆាន់ភេសជ្ជៈនៅតាម ហាង កាហ្វេទៀតលោកនឹងបណ្ដេញគេចពីវត្ដ ហើយ ។ ដោយការប្រដៅអប់រំពីគ្រូសូត្រ ឆ្វេងខាងលើមានលក្ខណៈធ្ងន់ធ្ងរពេក ទើបធ្វើឱ្យនេនខាងលើមានគំនុំនិងបាន បញ្ចេញកំហឹងនៅព្រឹកថ្ងៃទី១២ ខែមករា ឆ្នាំ២០១៥ ដោយយកកាំបិតចុងស្រួច ចាក់ត្រូវបំពង់កលោកគ្រូសូត្រឆ្វេងរង របួសយ៉ាងធ្ងន់ ហើយសង្ឃនាមលី តុញ ពេលបង្កហេតុរួចបានទៅពួននៅតូបកាហ្វេមួយកន្លែងដែលនៅជិតវត្ដនោះ ។ ប៉ុន្ដែ ក្រោយមកត្រូវសមត្ថកិច្ចរកឃើញហើយឃាត់ខ្លួនបានចាប់ផ្សឹកយកទៅ សាកសួរនៅអធិការដ្ឋាននគរបាលខណ្ឌ ។ ចំណែក លោកគ្រូសូត្រឆ្វេងថាច់ ខាន់ត្រូវបញ្ជូន ទៅសង្គ្រោះនៅគ្លីនិកឯកជនមួយកន្លែង ក្បែរនោះ តែដោយរបួសធ្ងន់ធ្ងររពេកគ្រូ ពេទ្យសង្គ្រោះមិនបានធ្វើឱ្យលោកគ្រូសូត្រឆ្វេងអង្គនេះទទួល អនិច្ចធម្ម នៅក្នុងមន្ទីរ ពេទ្យតែម្ដង ។ ព្រះសពលោកគ្រូសូត្រ ឆ្វេងថាច់ ខាន់ត្រូវបានព្រះចៅអធិការ វត្ដសាមគ្គីរង្សីដឹកតាមរថយន្ដមកតម្កល់ទុកនៅវត្ដដើម្បីរង់ចាំ សាច់ញាតិរបស់ ព្រះអង្គមកធ្វើបុណ្យតាមប្រពៃណី ។
អ្នកឃើញហេតុការណ៍និយាយថានៅព្រឹកកើតហេតុក្រោយពីព្រះសង្ឃគង់នៅវត្ដ សាមគ្គីរង្សីទាំងអស់ឆាន់អាហារ ពេល ព្រឹករួចបាននិមន្ដទៅគង់នៅក្នុងកុដិរៀងៗខ្លួន ។ នៅពេលនោះសង្ឃដៃដល់លី តុញ បានទៅឈរនៅមុខកុដិលោកគ្រូសូត្រឆ្វេង ហើយបានហៅគ្រូសូត្រឆ្វេងឱ្យចេញមក ក្រៅកុដិ ។ ពេលនោះនេន លី តុញបាន សួរគ្រូសូត្រឆ្វេងថា “លោកគ្រូ ហេតុអី លោកគ្រូដាក់ពិន័យនិងស្ដីបន្ទោសអាត្មាមុខគេឯងអ៊ីាចឹង? ពេលនោះលោកគ្រូ ថាច់ ខាន់ឆ្លើយថា មកពីនេនឯងប្រព្រឹត្ដ ខុសវិន័យសង្ឃ ទើបអាត្មាតម្រែតម្រង់ ដឹងទេ?
គ្រាន់តែគ្រូសូត្រឆ្វេងមានថេរដីកា សឹងមិនទាន់ចប់ ស្រាប់តែនេន លី តុញ មិនដឹងលាក់កាំបិតចុងស្រួចក្នុងថង់យាម ពីពេលណាបានដកកាំបិតរួចស្ទុះទៅចាក់លោកគ្រូសូត្រឆ្វេងជាច្រើន កាំបិតបណ្ដាលឱ្យត្រូវត្រង់កចំនួន៣កាំបិត និងលើព្រះកាយជាច្រើនកាំបិតទៀត ៕
