ភ្នំពេញ ៖ ដើម្បីជំរុញឲ្យការស្ថាបនាស្ពានអាកាស និងផ្លូវក្រោមដីតិចណូ បានរលូន និងលឿនទៅមុខ ទៅតាមគម្រោង ដែលបានគ្រោងទុក លោក ប៉ា សុជាតិវង្ស អភិបាលនៃគណៈអភិបាលរាជធានីភ្នំពេញ បានធ្វើការកោះអញ្ជើញមន្ត្រីពាក់ព័ន្ធអាជ្ញាធរដែនដី និងម្ចាស់ទីតាំងដែលមានផលប៉ះពាល់មកប្រជុំពិភាក្សាដើម្បីរកដំណោះស្រាយស្តីពី ផលប៉ះពាល់ ក្នុងការរួមគ្នាដោះស្រាយធ្វើយ៉ាងណាកុំឲ្យរាំងស្ទះដល់ការស្ថាបនា កាលពីព្រឹកថ្ងៃទី១២ ខែមករា ឆ្នាំ២០១៥ ។
ក្នុងកិច្ចប្រជុំនោះ ទាំងអាជ្ញាធរខណ្ឌទួលគោក និងមន្ទីរសាធារណការ និងដឹកជញ្ជូន រាជធានីភ្នំពេញ បានលើកឡើងពីផលប៉ះពាល់មួយចំនួន នៃការស្ថាបនាស្ពានអាកាសទី៤នេះ ដែលរួមមាន ផលប៉ះពាល់ទៅលើលំនៅដ្ឋានប្រជាពលរដ្ឋជាង ៣០ គ្រួសារ ក្នុងនោះមាន ៦ ខ្នង ផ្ទះប៉ះពាល់ដល់ប្លង់កម្មសិទ្ធិ និង៦ខ្នងផ្ទះប៉ះពាល់ផ្លូវក្រោមដី ក្រៅពីនេះ ប៉ះពាល់តិចតួចត្រឹមតែ ២ តឹកទៅកន្លះម៉ែត្រប៉ុណ្ណោះ ប៉ះពាល់សាលាតិចណូ ដីរបស់ក្រុមហ៊ុនឧស្មាន ហាហ្សាន់ ១ពាន់ម៉ែត្រការ៉េ ប៉ះពាល់បំពង់ទឹកស្អាត ខ្សែភ្លើង ខ្សែកាបក្រោមដី ជាដើម។
ជុំវិញកិច្ចប្រជុំនេះ ដោយសារតែការលើកឡើងពីរបាយការណ៍របស់អាជ្ញាធរ ខណ្ឌទួលគោក មន្ទីររៀបចំដែនដីនគររូបនីយកម្ម និងសំណង់ រាជធានី និងមន្ទីរសាធារការ និងដឹកជញ្ជូន រាជធានីភ្នំពេញ ស្តីពីផលប៉ះពាល់នេះ មានលក្ខណៈខុសគ្នានោះ លោក ប៉ា សុជាតិវង្ស ក៏បានធ្វើការណែនាំឲ្យលោក អៀង អូននី អភិបាលរងរាជធានីភ្នំពេញ ត្រូវដឹកនាំមន្ទីរ និងជំនាញពាក់ព័ន្ធទាំងអស់ ចុះសិក្សាអោយបានច្បាស់លាស់លើបញ្ហានេះ ដើម្បីជំរុញការដោះស្រាយផលប៉ះពាល់ អោយបានលឿន ជៀសវាងការថ្នាំងថ្នាក់ពីប្រជាពលរដ្ឋ។
សូមបញ្ជាក់ថា តាមគម្រោង ស្ពានអាកាសទី៤ នៅស្តុបតិចណូ មានប្រវែង៣៨២ ម៉ែត្រទទឹង១៥ម៉ែត្រ កម្ពស់សុវត្ថិភាព៥,២ម៉ែត្រ ដោយត្រូវសាងសង់ឡើងនៅតាមបណ្តោយមហាវិថីសហព័ន្ធរុស្សី រួមនិងផ្លូវក្រោមដីមួយខ្សែ មានប្រវែង៣៥៦ម៉ែត្រ, ទទឹងពី ៦ម៉ែត្រ ទៅ៨ម៉ែត្រ ដោយសាងសង់នៅក្រោមមហាវិថីសហព័ន្ធរុស្សី ដោយភ្ជាប់មហាវិថីម៉ៅសេទុង ទៅមហាវិថីគីមអ៊ីលស៊ុង ទៅរង្វង់មូលទួលគោក។ ស្ពានអាកាសទី៤ តាមគម្រោង នឹងប្រើប្រាស់ពេលវេលាក្នុងការស្ថាបនាចំនួន១៦ ខែ និងប្រើប្រាស់អស់ថវិកាអស់ប្រមាណ ១៤ លានដុល្លារអាមេរិក ដោយអនុវត្តន៍ការសាងសង់ ដោយក្រុមហ៊ុន OCIC ដែលជាក្រុមហ៊ុនរបស់លោកឧកញ៉ា ពុង ខៀវសែ ថៅកែកោះពេជ្រ ទទួលការសាងសង់ស្ពានអាកាស ៣ កន្លងមក ទទួលបានជោគជ័យ។
ការសាងសង់ស្ពានអាកាសទី៤នេះ គឺអនុវត្តន៍តាមការប្រកាសរបស់សម្តេចតេជោ ហ៊ុន សែន នៅក្នុងពិធីសម្ពោធស្ពានអាកាសស្ទឹងមានជ័យ កាលពីព្រឹកថ្ងៃទី៣១ ខែកក្កដា ឆ្នាំ២០១៤ ហើយក្នុងពិធីកន្លងមកនោះ គឺសម្តេចបានមានប្រសាសន៍ថា ស្ពានអាកាសទី៤នេះ នឹងចាប់ផ្តើមដំណើរការសាងសង់ក្រោមទំហំទឹកប្រាក់១៤លានដុល្លារ ដែលសាងសង់ដោយក្រុមហ៊ុន OCIC ហើយស្ពាននេះ ក៏មានផ្លូវក្រោមដី ផងដែរ។
តាមគម្រោងរបស់សាលារាជធានីភ្នំពេញ បន្ទាប់ពីការសាងសង់ស្ពានអាកាសទី៤ ដោះស្រាយ ការកកស្ទះត្រង់ចំណុច ប្រសព្វនេះរួចរាល់ហើយនោះ ជាគោលដៅបន្តគឺសាលារាជធានីនឹងសាងសង់ស្ពានអាកាសនៅចំណុចភ្លើងស្តុប BKC (កាណាឌីយ៉ា) និងភ្លើងស្តុបទឹកថ្លាបន្តទៀត សំដៅធ្វើយ៉ាងណា ដោះស្រាយការកកស្ទះចរាចរអោយបាន។
ស្ពានអាកាសទី១ ក្បាលថ្នល់ បានចាប់ផ្តើមសាងសង់ឡើង នៅថៃ្ងទី២៧ ខែឧសភា ឆ្នាំ២០០៩ ដោយសាងសង់រយៈពេល១២ខែ និងបានបញ្ចប់នៅថៃ្ងទី២៧ ខែឧសភា ឆ្នាំ២០១០ និងដាក់ឲ្យប្រើប្រាស់ជាផ្លូវការ កាលពីថ្ងៃទី២៤ ខែមិថុនា ឆ្នាំ២០១១ ដោយចំណាយថវិកាចំនួន៦.០៤៨.៤២៤ ដុល្លារ។ ទី២គឺ ស្ពានអាកាស៧មករា បើកការដ្ឋានសាងសង់ នៅថ្ងៃទី២៩ ខែធ្នូ ឆ្នាំ២០១០ និងបើកសម្ពោធឲ្យប្រើប្រាស់ជាផ្លូវការកាលពីថ្ងៃទី៦ ខែមករា ឆ្នាំ២០១២ ចំណាយទឹកប្រាក់ចំនួន ៨.៧០៥.៨០៨ ដុល្លារ។ ទី៣ ស្ពានអាកាសស្ទឹងមានជ័យ បើកការដ្ឋានសាងសង់ កាលពីចុងខែវិច្ឆិកា ឆ្នាំ២០១២ និងសម្ពោធឲ្យប្រើប្រាស់ជាផ្លូវការកាលពីថ្ងៃទី៣១ ខែកក្កដា ឆ្នាំ២០១៤ ចំណាយថវិកា ១៩ លានដុល្លារ ហើយស្ពានអាកាសទី៤នេះ ចាប់ផ្តើមបើកកាដ្ឋាន កាលព្រឹកថ្ងៃទី៩ ខែកញ្ញា ឆ្នាំ២០១៤ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ៕
