ភ្នំពេញ ៖ អាជីវករលក់ដូរ ក៏ដូចជាអ្នករស់នៅជុំវិញផ្សារ បឹងត្របែកផ្លាហ្សា ស្ថិតក្នុងសង្កាត់បឹងត្របែក ខណ្ឌចំការមន បាននិយាយថា មានល្បែងលក្ខណៈ( ហ្គេម , ស្លុតម៉ាស៊ីន ) កំពុងធ្វើអាជីវកម្មស៊ីសងយ៉ាងចំហរ មិនខ្វល់ពីគោលនយោបាយភូមិសង្កាត់មានសុវត្ថិភាពរបស់រាជរដ្ឋាភិបាលឡើយ ហើយក្នុងនោះដែរ អាជ្ញាធរមូលដ្ឋាន និងសមត្ថកិច្ចមូលដ្ឋានក៏គ្មានវិធានការបង្ក្រាបទីតាំងល្បែងលក្ខណៈ ស្លុតម៉ាស៊ីន ដែលរាជរដ្ឋាភិបាលបានហាមឃាត់នោះទេ ។
ប្រភពព័ត៌មានជុំវិញបាតុភាពនៃការបើកល្បែងស៊ីសងខាងលើនេះ បានអោយដឹងថា ម្ចាស់អាជីវកម្មទាំង២កន្លែងនោះ ម្នាក់ឈ្មោះចែ គង់ និងម្នាក់ទៀតឈ្មោះវេហា ជានគរបាលផ្នែកសន្តិសុខផ្ទៃក្នុងក្រសួងមហាផ្ទៃ ដែលមានថៅកែចិននៅពីក្រោយខ្នងទាំង២នាក់ ។
ប្រភេទល្បែងស៊ីសងទាំង២កន្លែងខាងលើនេះ គឺបើកលេងស៊ីសងយ៉ាងចំហរ មានទាំងពលរដ្ឋខ្មែរ ដែលកំពុងស្ថិតក្នុងភាពក្រីក្រចូលលេងល្បែងភ្នាល់ចាញ់អស់រាប់រយ រាប់ពាន់ដុល្លារក៏មានដែរ ដូច្នេះបញ្ហានេះក្រសួងមហាផ្ទៃ ក៏ដូចជាសាលារាជធានីភ្នំពេញ បើបណ្តោយទុកអោយមានល្បែងលក្ខណៈស្លុតម៉ាស៊ីន គ្មានច្បាប់អនុញ្ញាតិកើតមានព្រោងព្រាត ពិសេសលើទីតាំងខាងលើនឹងក្នុងភូមិសាស្ត្រខណ្ឌដូនពេញ មានឈ្មោះមេល្បែងធំមួយទៀតឈ្មោះ បារាំង និង មេល្បែងទាំង២ឈ្មោះខាងលើ ក៏ កំពុងសំងំធ្វើអាជីវកម្មយ៉ាងត្រជាក់ល្ហិម នៅក្នុងភូមិសាស្ត្រខណ្ឌដូនពេញដែរ គ្មានសមត្ថកិច្ចណាបង្ក្រាបឡើយ។ភ
ចំពោះការលើកឡើងខាងលើនេះ ម្ចាស់អាជីវកម្មទាំង២ឈ្មោះ មិនអាចទំនាក់ទំនងសួរនាំបានឡើយ ដោយសារទូរស័ព្ទចូលគ្មានអ្នកលើក ។ គួរបញ្ជាក់ថាទីតាំងល្បែងភ្នាល់នៅក្នុងផ្សារបឹងត្របែកផ្លាហ្សា គឺធ្លាប់ត្រូវនគរបាលព្រហ្មទណ្ឌនៃស្នងការដ្ឋាននគរបាលរាជធានីភ្នំពេញ បង្ក្រាបម្តងហើយតែបានដង្ហើមចង្រឹត ក៏ដោះលែងវិញអស់ទុកអោយអាជីវកម្មល្បែងស៊ីសងកាន់តែរីកធំឡើង ពីមួយកន្លែងទៅដល់ ២កន្លែង ។
ការបង្កអោយមានល្បែងស៊ីសង ព្រោងព្រាតក្នុងរាជធានីភ្នំពេញដូចជាល្បែងភ្នាល់បាល់ ចាក់កន្ទុយលេខ និងប្រភេទល្បែង ទូរហ្គេម ឬក៏ស្លុតម៉ាស៊ីនដោយមិនមានអ្នកបង្ក្រាបគឺជាការបង្កើននូវអំពើលួច ឆក់ ប្លន់ ជាហេតុធ្វើអោយប៉ះពាល់ដល់សន្តិសុខសណ្តាប់ធ្នាប់សង្គម ។
ហើយគួរបញ្ជាក់ផងដែរថា ហ្គេម ក៏ដូចជាល្បែងលក្ខណៈស្លុតម៉ាស៊ីនខាងលើនេះ កំពុងបើកអាជីវកម្មទាំងថ្ងៃទាំងយប់ក្នុងភូមិ សាស្ត្រខណ្ឌដូនពេញ ជាច្រើនទីតាំង ដោយជ្រកក្រោមផ្លាកអាជីវកម្មមានច្បាប់ទម្លាប់ និងមានការ អនុញ្ញាតិពីសាលារាជធានីភ្នំពេញត្រឹមត្រូវក្នុងការបើកអាជីវកម្មអេឡិចត្រូនិច ប៉ុន្តែម្ចាស់ទីតាំងមិនត្រឹម តែបើកអាជីវកម្មអេឡិចត្រូវនិចនោះទេ បែរជា ឈ្លៀតឱកាសលួចបើកអាជីវកម្មហ្គេម និងល្បែង លក្ខណៈស្លុតម៉ាស៊ីន យ៉ាងត្រជាក់ល្ហិមបែបនេះទៅវិញ ដោយមិនមានអាជ្ញាធរ ក៏ដូចជាសមត្ថកិច្ចណា ម្នាក់ចុះមកធ្វើការបង្ក្រាបទាល់តែសោះ សុខចិត្តិទុកអោយអាជីវកម្មនេះនៅតែបន្តបែបអស់រហូតអស់ រ៉ាប់សិប ឆ្នាំមកហើយ៕
