ភ្នំពេញ ៖ ក្រុមកម្មករ-ការិនី នៃរោងចក្រកាត់ដេរសំលៀកបំពាក់យីហោខេបបូខូថប ដែលបាននាំគ្នាធ្វើកូដកម្មអស់រយៈពេលជិត១០ថ្ងៃមកហើយនោះ បន្ទាប់ពីនាំគ្នាទៅឈរបិទផ្លូវជាតិលេខ៤ និងដុតសំបកកង់ឡាននៅមុខរោងចក្រជាបន្ដបន្ទាប់រហូតមកដល់ព្រឹកថ្ងៃទី២៦ ខែធ្នូ ឆ្នាំ២០១៤ នេះ កម្មករបាននាំគ្នាអញ្ជើញអាចារ្យខ្មោចឲ្យមកជួយរៀបចំពិធីសូត្រសែនព្រេនបន្ទន់ចិត្តថៅកែ ដើម្បីឲ្យការធ្វើកូដកម្មរបស់ពួកគេទទួលបានជោគជ័យ។
បន្ទាប់មកទៀតទើបពួកគេហែក្បួនប្រមាណជិត៤០០នាក់ មកកាន់ក្រសួងការងារជាបន្ដទៀត ដើម្បីទាមទារឲ្យតំណាងរបស់ពួកគេចំនួន៥នាក់ ដែលថៅកែព្យួរពីការងារឲ្យបានចូលធ្វើការវិញ។
រោងចក្រខេបបូខូថបនេះមានទីតាំងនៅតាមបណ្ដោយផ្លូវជាតិលេខ៤ ស្ថិតក្នុងភូមិកន្ទោកខាងជើង សង្កាត់កន្ទោក ខណ្ឌពោធិ៍សែនជ័យ ដែលរោងចក្រនេះបានផ្ទុះកូដកម្មអស់រយៈពេលជិត១០ថ្ងៃមកហើយ នៅមិនទាន់មានដំណោះស្រាយសមរម្យណាមួយជូនកម្មករនោះទេ។
ដោយសារការទាមទារនៅមិនទាន់មានដំណោះស្រាយនោះក្រុមកម្មករក៏ដូចតំណាងសហជីពបានរិះរកគ្រប់មធ្យោបាយដែលអាចធ្វើទៅបានដូចជារៀបចំតាមពិធីសាសនាដោយបានអញ្ជើញលោកអាចារ្យ និងមានផ្លែឈើផង ដើម្បីឲ្យថៅកែទន់ចិត្តនិងដោះស្រាយតាមសំណូមពរឲ្យបានឆាប់។
បើតាមនគរបាលមូលដ្ឋានបានឲ្យដឹងថា រោងចក្រនេះមានកម្មករសរុបប្រមាណ២.៧០០នាក់ ហើយក្នុងនោះមានកម្មករជិត១ពាន់នាក់ បាននាំគ្នាធ្វើកូដកម្ម តែរហូតមកដល់នឹងពេលនេះមានកម្មករជិត៤០០នាក់ប៉ុណ្ណោះ កំពុងក្រាញននៀលតវ៉ាមុខរោងចក្រនោះ។ ចំណែកកម្មករចំនួន១.៤៣៨នាក់ផ្សេងទៀត បាននាំគ្នាចូលធ្វើការជាធម្មតាហើយក៏មានកម្មករមួយចំនួនទៀតមិនចូលធ្វើការ និងក៏មិនចូលរួមកូដកម្មដែរ។ នៅពេលនេះដែរក្រុមកម្មករជិត៤០០នាក់នោះបានបន្ដហែក្បួនទៅកាន់ក្រសួងការងារជាបន្ដទៀត ដើម្បីស្វែងរកការជួយអន្ដរាគមន៍ពីស្ថាប័នពាក់ព័ន្ធទាំងនោះឲ្យជួយរកដំណោះស្រាយ។
ប្រភពព័ត៌មានបន្ដថា ការផ្ទុះកូដកម្មនេះធ្វើឡើងអស់រយៈពេលជិត១០ថ្ងៃមកហើយបន្ទាប់ពីថៅកែបានសម្រេចព្យួរការងារដល់តំណាងសហជីពចំនួន៥នាក់ពីការងារមកនោះ ។ក្រោយមកក៏ផ្ទុះកូដកម្មតែម្ដង ពោលគឺខាងកម្មករបានទាមទារឲ្យថៅកែទទួលយកតំណាងរបស់ពួកគេចំនួន៥នាក់នោះឲ្យចូលធ្វើការវិញ មិនតែប៉ុណ្ណោះខាងសហជីពគាំទ្រកម្មករបានសំណូមពរឲ្យកម្មករបង់វិភាគទានសំរាប់សហជីពខ្លួនម្នាក់ចំនួន២ពាន់រៀលក្នុងមួយខែ ស្របពេលសហជីពគាំទ្រថៅកែបានតំរូវឲ្យកម្មករបង់វិភាគទានតែមួយពាន់រៀលប៉ុណ្ណោះ ដូច្នេះភាពមិនស៊ីចង្វាក់គ្នាមួយនេះក៏ជាបញ្ហាដែរ។
ការធ្វើកូដកម្មនេះអាជ្ញាធរមូលដ្ឋានក៏ដូចជាអាជ្ញាក្រុងក៏ធ្លាប់ចុះទៅធ្វើការពន្យល់ណែនាំនិងសម្របសម្រួលដល់កម្មករដែរ តែនៅមិនអាចត្រូវរ៉ូវគ្នាឡើយពោលគឺកម្មករនៅតែនាំគ្នាធ្វើកូដកម្មជាដដែល ហើយខាងថៅកែក៏មិនទាន់បន្ទន់ឥរិយាបទជាមួយកម្មករដែរ។
នៅព្រឹកថ្ងៃទី២៦ ខែធ្នូ នេះគេសង្កេតឃើញក្រុមកម្មករបានអញ្ជើញអាចារ្យមករៀបចំសូត្រមន្តនិងសែនព្រេនបន់ស្រន់ដើម្បីឲ្យការទាមទាររបស់ពួកគេទទួលបានលទ្ធផលជាវិជ្ជមាន៕
