អ្នកយកព័ត៌មាន CNC ហង្សមាស គេហទំព័រ CEN និង TV3 ចំនួន ៦ នាក់ បានត្រូវបក្ខពួកមនុស្សទំនើងមួយក្រុម ព្រួតគ្នាវាយ និងប្រើអំពើហិង្សា ទាំងកំរោល ដូចជា បាញ់គំរាមសម្លាប់ និងបោកកាមេរ៉ា របស់អ្នកកាសែតទាំងនោះ បន្ទាប់ពីពួកគេខឹងអ្នកកាសែត យកកាមេរ៉ាទៅថតពីគ្រោះថ្នាក់ចរាចរណ៍ បើករថយន្ដ បុករថយន្ត នៅ តាមផ្លូវសាធារណៈ ។
ព្រឹត្ដិការណ៍ ដែលបង្កឱ្យមានការភ្ញាក់ផ្អើល ដែលផ្ដើមចេញពីគ្រោះថ្នាក់ចរាចរណ៍ ហើយក្លាយជាបទល្មើសព្រហ្មទណ្ឌ ដោយសារតែការវាយតប់ និងដកកាំភ្លើងបាញ់ ៣ គ្រាប់ទៅលើអ្នកកាសែត ពេលចុះទៅយកព័ត៌មាន និងថតរូបស្ដីពី គ្រោះថ្នាក់ចរាចរណ៍ខាងលើនេះ បានកើតឡើង កាលពីវេលាម៉ោង១២ និង៥០នាទី រំលង អធ្រាត្រ ឈានចូលថ្ងៃទី២២ ខែធ្នូ ឆ្នាំ២០១៤ នេះ ស្ថិតនៅខាងជើងរង្វង់មូលវត្តភ្នំ ក្នុងសង្កាត់ស្រះចក ខណ្ឌដូនពេញ ។
យោងតាមប្រភពព័ត៌មាន ពីសមត្ថកិច្ចមូលដ្ឋាន បានឱ្យដឹងថា មុនដំបូងឡើយ ដែល នាំឱ្យមានករណីបង្កអំពើហិង្សា មកលើអ្នកកាសែត ខាងលើនេះ បានកើតឡើង ក្រោយពីរថយន្ដ ចំនួន ២ គ្រឿង បានបុកគ្នា ក្នុងនោះរថយន្ដម៉ាក ហុងដាហ្វេត ពណ៌ក្រហម ពាក់ស្លាកលេខ ភ្នំពេញ 2S-5105 បានជ្រុលទៅបុកគ្នាជាមួយរថយន្តមួយ គ្រឿងទៀត ដែលកំពុងចតចោលនៅមុខហាង ម៉ាស្សា រថយន្ដទាំង២ រងការខូចខាត ។ សមត្ថកិច្ចបានឱ្យដឹងទៀតថា បន្ទាប់ពីមានករណីគ្រោះថ្នាក់ចរាចរណ៍ខាងលើនេះ អ្នកយកព័ត៌មាន មកពីតាមអង្គភាពផ្សេងៗ រួមមាន ទូរទស្សន៍ និងកាសែត បាននាំគ្នា ចុះទៅផ្ដិតយករូបភាព និងព័ត៌មាន នៅកន្លែងកើតហេតុ ដូចសព្វមួយដង ។
ប៉ុន្ដែ នៅពេលដែលយកកាមេរ៉ា ទៅថតគ្រោះថ្នាក់ចរាចរណ៍នេះ ស្រាប់តែអ្នកបើក ឡាន ត្រូវបានគេដឹងថា មានតួនាទីជាអនុរដ្ឋលេខាធិការក្រសួងយុត្ដិធម៌ ឈ្មោះ យាន ស៊ីណា បានមកវាយកាមេរ៉ា និងដាល់អ្នកកាសែត បណ្ដាលឱ្យរងរបួស ។ ស្ថានភាពនេះ បានធ្វើឱ្យធ្ងន់ធ្ងរទៅៗ ខណៈដែលបក្ខពួកអ្នកបើករថយន្ដ ជាច្រើននាក់ បានមកជួយអន្ដរាគមន៍ និងវាយទៅលើអ្នកកាសែតជាច្រើននាក់ ក្នុងនោះបានបណ្ដាលឱ្យ អ្នកយកព័ត៌មានទូរទស្សន៍ CNC ទូរទស្សន៍ហង្សមាស គេហទំព័រ CEN និង TV3 ត្រូវបានបក្ខពួកខាងលើ ព្រួតមកវាយ មិនត្រឹមតែប៉ុណ្ណោះ ថែមទាំងដកកាំភ្លើងបាញ់សំដៅមកក្រុមអ្នកការសែត ចំនួនបីគ្រាប់ និងចាប់កាច់កាមេរ៉ា របស់អ្នកយកព័ត៌មាន ទូរទស្សន៍ហង្សមាស ហើយពួកគេប្រហែលជាជិត ១០ នាក់ បានទាញយកទូរស័ព្ទ របស់អ្នកយកព័ត៌មានគេហទំព័រ CEN ដែលកំពុងថតយករូបភាពដែលពួកគេវាយមកលើក្រុមអ្នកយកព័ត៌មាននេះ រួចពួកគេក៏ទៅបាត់។
សេចក្ដីរាយការណ៍ពីកន្លែងកើតហេតុ បានឱ្យដឹងថា បន្ទាប់ពីមានការប្រតាយប្រតប់ និងប្រើអំពើហិង្សា ធ្វើឱ្យមានការភ្ញាក់ផ្អើលយ៉ាងដូច្នេះ កម្លាំងនគរបាលមូលដ្ឋាន និងសមត្ថកិច្ចពាក់ព័ន្ធ បានទៅជួយអន្ដរាគមន៍ តាមរយៈការឃាត់ខ្លួនជនបង្កម្នាក់ និងរថយន្តពីរគ្រឿង មួយគ្រឿងម៉ាក កាមរីបាឡែន ពណ៌ស្ករ ពាក់ស្លាកលេខ នគរបាល 2-8271 និងមួយគ្រឿងទៀត ម៉ាកនីសាន់ HOMY ពណ៌ទឹកប្រាក់ ពាក់ស្លាកលេខ ភ្នំពេញ 2I-2588 យកមកប៉ុស្តិ៍នគរបាលស្រះចក ដើម្បីចាត់ការ ទៅតាមផ្លូវច្បាប់ ហើយចំពោះក្រុមអ្នកកាសែតដែលរងគ្រោះ ក៏បានទៅដាក់ពាក្យបណ្ដឹង និងចូលបំភ្លឺ នៅកន្លែងសមត្ថកិច្ច ឲ្យធ្វើកាដោះស្រាយទៅតាមផ្លូវច្បាប់ផងដែរ ៕