ពលករខ្មែរចំនួន៣នាក់ បានស្លាប់នៅក្នុងប្រទេសថៃ ដោយសារពលករដូចគ្នា ចាក់សម្លាប់.រអិលជើងធ្លាក់ពីលើអគារ និងដោយសារគ្រោះថ្នាក់ចរាចរណ៍។ ហើយសាកសពពលករខ្មែរ ទាំង៣នាក់នេះ ត្រូវបានបញ្ជូនមកកម្ពុជា ដើម្បីប្រគល់ឲ្យក្រុមគ្រួសារ យកទៅធ្វើបុណ្យតាមប្រពៃណី។
លោក កុយ គួង អ្នកនាំពាក្យក្រសួងការបរទេសកម្ពុជា បានឲ្យដឹងនៅព្រឹកថ្ងៃទី១២ ខែធ្នូ នេះ ថា ស្ថានអគ្គកុងស៊ុលកម្ពុជា ប្រចាំខេត្ដស្រះកែវ ប្រទេសថៃ បានឱ្យដឹងថា នៅសបា្ដហ៍មុននេះ (៦-៩ ធ្នូ ២០១៤) មានពលករខ្មែរចំនួន៣ នាក់ បានបាត់បង់ជីវិត ដោយមូលហេតុដូចតទៅៈ
១-ជនរងគ្រោះ ឈ្មោះ បេ សាន អាយុ២២ឆ្នាំ ស្រុកកំណើត នៅស្រុកកំពង់ស្វាយ ខេត្ដកំពង់ធំ ជាពលករ ខុសច្បាប់ សាងសង់សំណង់ ត្រូវពលករខ្មែរដូចគ្នា ចាក់ស្លាប់ នៅខេត្ដភិតបុរី ប្រទេសថៃ កាលពីថ្ងៃទី៦ ខែធ្នូ ឆ្នាំ២០១៤ ។ នគរបាលថៃ បានចាប់ជន ដៃដល់បានហើយ ។ អគ្គកុងស៊ុលកម្ពុជា បានសហការ ជាមួយគ្រួសារសព បញ្ជូនសពមកកម្ពុជា តាមច្រកប៉ោយប៉ែត នៅថ្ងៃទី១០ ខែធ្នូ ឆ្នាំ ២០១៤ ។
២-ជនរងគ្រោះ ឈ្មោះ វិត លៀម អាយុ១៩ ឆ្នាំ ស្រុកកំណើត នៅស្រុកព្រះនេត្រព្រះ ខេត្ដបន្ទាយមានជ័យ ជាពលករខុសច្បាប់ សាងសង់សំណង់ បានស្លាប់ដោយរអិលជើង ធ្លាក់ពីអគារកំពុងសាងសង់ នៅ ខេត្ដនុនថាបុរី ប្រទេសថៃ កាលពីថ្ងៃទី៧ ខែធ្នូ ឆ្នាំ២០១៤ ។ ថៅកែសំណង់ បានឧបត្ថមថវិកា ចំនួន ៤០.០០០ បាត ដើម្បីធ្វើបុណ្យសព ។ ក្រោយធ្វើបុណ្យរួច គ្រួសារសព នឹងត្រឡប់ទៅជួប អគ្គកុងស៊ុលកម្ពុជាវិញ ដើម្បីរៀបចំឯកសារ ទាមទារប្រាក់ធានារ៉ាប់រងជីវិត ។ អគ្គកុងស៊ុលកម្ពុជា បានសហការជាមួយគ្រួសារសព បញ្ជូនសពមកកម្ពុជា តាមច្រកប៉ោយប៉ែត នៅថ្ងៃទី១០ ខែធ្នូ ឆ្នាំ២០១៤។
៣-ជនរងគ្រោះ ឈ្មោះ ពួក ម៉ាប់ អាយុ២០ ឆ្នាំ ស្រុកកំណើត នៅស្រុកកំពង់ស្វាយ ខេត្ដកំពង់ធំ ជាពលករខុសច្បាប់ សាងសង់សំណង់ បានស្លាប់ដោយគ្រោះថ្នាក់ចរាចរណ៍ នៅខេត្ដប្រាធំថានី ប្រទេសថៃ កាលពីថ្ងៃទី៩ ខែធ្នូ ឆ្នាំ២០១៤ ។ ថៅកែសំណង់បានឧបត្ថមថវិកា ចំនួន ៦៥.០០០ បាត ដើម្បីធ្វើបុណ្យសព ។ ក្រោយធ្វើបុណ្យរួច គ្រួសារសព នឹងត្រឡប់ទៅជួបអគ្គកុងស៊ុលកម្ពុជាវិញ ដើម្បី រៀបចំឯកសារ ទាមទារប្រាក់ធានារ៉ាប់រងជីវិត ។ អគ្គកុងស៊ុលកម្ពុជា បានសហការជាមួយ គ្រួសារសព បញ្ជូនសពមកកម្ពុជា តាមច្រកប៉ោយប៉ែត នៅថ្ងៃទី១០ ខែធ្នូ ឆ្នាំ២០១៤ ៕
