រាជធានីភ្នំពេញ៖ ដោយរកឃើញថា ការជីករណ្ដៅដីខុសបច្ចេកទេស បានបង្កឲ្យមានហានិភ័យខ្ពស់ ដូចជាការធ្លាក់ឧទ្ធម្ភាគចក្រ យោធាមួយគ្រឿងចូលទៅក្នុងរណ្ដៅដី បណ្ដាលឲ្យមនុស្សស្លាប់ រហូតដល់៥នាក់ កាលពីអំឡុងខែកក្កដា កន្លងទៅនោះ។
សាលារាជធានីភ្នំពេញ បានចេញសេចក្ដីប្រកាសភ្លាមៗ ហាមដាច់ខាត មិនឲ្យមានការជីកយកអាចម៍ ដីនៅក្នុងភូមិសាស្ត្រ រាជធានីភ្នំពេញជាដាច់ខាត ។ប៉ុន្តែបំរាមនេះត្រូវបានគេមើលឃើញថា ហាក់ដូចជាពុំមានប្រសិទ្ធភាពឡើយ ខណៈដែលរណ្ដៅដីធំៗយ៉ាងហោចណាស់ចំនួន៣ កំពុងតែដំណើរការយ៉ាងក្ដៅគគុក នៅក្នុងខណ្ឌពោធិ៍សែនជ័យនោះ ។
ក្រុមប្រជាពលរដ្ឋបាននិយាយថា រណ្ដៅទាំងនោះ មានទំហំរាប់ ពាន់ម៉ែត្រ និង មានជម្រៅរាប់សិបម៉ែត្រឯហ្នុះ ។ ពួកគាត់បានពិព័ណនាថា បើសិនជាសំឡឹងមើលពីលើទៅ គេឃើញរថយន្ត និង អេស្កាវ៉ាទ័រ ដែលកំពុងកាយយកអាច់ដីនោះ មានទំហំតូចៗដូចក្ដាម ដែលការនេះ អាចបង្កឲ្យមានគ្រោះថ្នាក់ដល់សត្វពាហនៈ និង ការបាក់ស្រុតដី របស់ពួកគាត់ ហើយជាពិសេសនោះ គឺការឆក់ស្រូបយកជីវិតមនុស្សតែម្ដង ។
នៅចំពោះមុខសេចក្ដីភ័យព្រួយនេះ ខាងសាលាសង្កាត់ និង សាលារាជធានីភ្នំពេញ បែរជាបានត្រឹម តែជាការជះទឹកដាក់គ្នាដោយ ហាក់ដូចជាគ្មានការទទួលខុសត្រូវអ្វីទាំងអស់ ។ លោក ហែម ដារិទ្ធ អភិបាលខណ្ឌពោធិ៍សែនជ័យ បានថ្លែងថា ការដ្ឋានជីកយក ដីទាំងនោះមានច្បាប់ត្រឹមត្រូវ ពីសាលារាជធានីភ្នំពេញ ហើយបានរុញឲ្យទៅសួរលោក សេង គុណ អភិបាលរងខណ្ឌ ទទួលបន្ទុករឿង ដីធ្លីនេះ បន្ត ។ ចំណែកលោក សេង គុណ បានបញ្ជាក់ប្រាប់សារព័តមាន ថា រណ្ដៅដីទាំងនោះ មានច្បាប់ហើយក៍ ផ្ដាច់ទូរស័ព្ទតែម្ដង ។
ប៉ុន្តែបើទោះជាដូច្នេះក្ដី លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានថ្លែងថា សេចក្ដីប្រកាសរបស់សាលារាជធានីភ្នំពេញ ស្ដីពីការហាមប្រាមមិនឲ្យជីករណ្ដៅយកដីក្នុងភូមិសាស្ត្ររាជធានីភ្នំពេញនោះ នៅមិនទាន់មានការផ្លាស់ប្ដូរថ្មីនៅឡើយទេ ។ ពោលគឺនៅ តែមានប្រសិទ្ធភាពដដែល។ ការណ៍នេះបានផ្ដើមឲ្យមជ្ឈដ្ឋានប្រជាពលរដ្ឋមានការងឿងឆ្ងល់កាន់តែខ្លាំង ដោយខ្លះបាន លើកឡើងថា តើជាការឆ្លើយដោះសាររបស់លោក បាលខណ្ឌពោធិ៍សែនជ័យ ដើម្បីទម្លាក់កំហុសបន្ទុកទៅលើលោក អភិបាលរាជធានីភ្នំពេញ ឬ មួយក៍អភិបាលសាលារាជធានីភ្នំពេញ មានការឃុបឃិតគ្នាស្ងាត់ៗ ចំពោះសំណុំរឿងនេះ តាមរបៀប បូញមាត់បត់ដុំដៃ ៕
