ភ្នំពេញ: ថ្ងៃទី៣វិច្ឆិកានេះ លើសង្វៀន TV3 ឡុង សុភី មកពីក្លឹបសាលវន្ដកីឡា ត្រូវបានផ្គូរផ្គងឲ្យប្រកួតជាមួយអ្នក ប្រដាល់ ជនជាតិអ៊ីរ៉ង់ Bahzad Mohammad Karim ។
អ្នកប្រដាល់ជនជាតិអ៊ីរ៉ង់រូបនេះក៏ពុំធ្លាប់មកប្រកួតស្រុកខ្មែរ ដែរ តែបើតាមការឲ្យដឹងពីលោក ទី រ៉ាណាត នោះថា អ្នកប្រដាល់ រូបនេះ គេប្រាប់មកលោកថាមិនអន់ទេអាចតស៊ូជាមួយ សុភីបានយ៉ាងតឹងតែង ។ សមត្ថភាពរបស់ពួកគេ សុទ្ធតែមានឱកាស ដើម្បីឈ្នះ ដូចគ្នា ។
សុភីពូកែជង្គង់ និង ពូកែចាប់មិនឲ្យគូប្រកួតរើខ្លួនរួច ចំពោះ Bahzad កណ្ដាប់ដៃ និង ជើងដែលគេទាត់ និង ដាល់ចេញនោះ ធ្ងន់ណាស់។ ចាំមើលរវាងឡុង សុភី និង អ្នកប្រដាល់អ៊ីរ៉ង់ Bahzad Mohammad Karim នរណាជួបសំណាងល្អ ?
ដោយឡែក អ្នកប្រដាល់ជើងខ្លាំង រឿង សោភ័ណ្ឌ មកពីក្លឹបម្កុដរាជសីហ៍ ត្រូវ ប្រកួតជាមួយអ្នកប្រដាល់ថៃ Narongwut Kaeongam ។
អ្នកប្រដាល់ថៃរូបនេះពុំធ្លាប់មកប្រកួតនៅស្រុកខ្មែរទេហើយ ប្រវត្តិគេវ៉ៃប៉ុន្មានដងៗនោះក៏មិនមាននរណាដឹង នោះដែរតែ លោកទី រ៉ាណាតដែលជាអ្នកគ្រប់គ្រងកម្មវិធីប្រដាល់ TV3 នោះបាននិយាយថាអ្នកប្រដាល់ថៃថៃរូបនេះ មានឈ្មោះបោះ សម្លេង ណាស់មិនតែប៉ុណ្ណោះគេមានស្នៀតវ៉ៃល្អ រហ័សទាំងការពារទាំងវាយលុក ។ គេក៏ជាអ្នកប្រ ដាល់មួយរូបដែលហ៊ានវ៉ៃ ប្ដូរដោយ គ្មានញញើតដែរ ។
ចំពោះសោភ័ណ្ឌវិញនៅស្រុកខ្មែរគេលំបាករកគូប្រកួតណាស់ ។ គេទើបតែផ្ដួលអ្នកប្រដាល់បារាំងនៅទឹកទី ២ កាលពី សប្ដាហ៍ មុននេះ ។ គេជាអ្នកប្រដាល់ដែលមានកណ្ដាប់ដៃធ្ងន់ និង រហ័សហើយនៅពេលគេបញ្ចេញកណ្ដាប់ ដៃបើគូប្រកួត មិន ប្រយ័ត្ន ទេនោះ គេបញ្ចេញជើងភ្លាមៗជាហេតុធ្វើឲ្យ គូប្រកួតជួបការលំបាក និង ងាយសន្លប់ណាស់ ដោយសារការវ៉ៃផ្ទួនៗរបស់រឿង សោភ័ណ្ឌ ។
រឿង សោភ័ណ្ឌ និង Narongwut Kaeongam នរណាមានសមត្ថភាពបង្កើតជ័យជំនះសម្រាប់ខ្លួននៅក្នុងការប្រកួតនេះ ?
ចំពោះការជួបគ្នារវាងអ្នកប្រដាល់រួមជាតិនោះ រឿម វណ្ណៈ មកពីក្លឹបក្រសួងការពារជាតិដែលបាត់មុខមួយរយៈ បន្ទាប់ពីសន្លប់ ក្រោម កណ្ដាប់ដៃរឿង សោភ័ណ្ឌនោះបានវិលមកកាន់ការប្រកួតវិញដោយជួបជាមួយវ៉ាន់ ចាន់វ៉េត មកពីក្លឹបសឹង្ហកីឡា ។
អ្នកប្រដាល់ទាំង ២ រូបនេះធ្លាប់ជួបគ្នា ២-៣លើកហើយដោយមានឈ្នះ-ចាញ់ទៅវិញទៅមក តែសម្រាប់ លើកនេះមិនដឹងថា នរណា ជួបសំណាងល្អនោះទេ ។
នួន សិក្ខុ មកពីក្លឹបក្រសួងការពារជាតិប្រកួតជាមួយ អាំង សំអាត មកពីក្លឹបតាព្រហ្មមានជ័យក្នុងខណៈដែលទូច សក្តិ មកពីក្លឹប រស្មីកុមារកំព្រា ប្រកួតជាមួយ អាន មុន្នី មកពីក្លឹបយុវជនកម្ពុជាមានជ័យ ៕