ភ្នំពេញ៖ នៅព្រឹកថ្ងៃទី០៦ខែធ្នូ ឆ្នាំ២០១៤នេះ មនុស្សចំនួន៤នាក់ ក្នុងនោះរួមមាន៖ ឪពុក,ម្តាយ,ប្រពន្ធ និងប្អូនប្រុសរបស់ លោកឧកញ៉ាថោង សារ៉ាត់ ត្រូវបានបញ្ជូនដល់អយ្យការអមសាលាដំបូងរាជធានីភ្នំពេញហើយ ដើម្បីបំភ្លឺជុំវិញសំណុំរឿងបាញ់សម្លាប់លោកឧកញ៉ាអ៊ឹង ម៉េងជឺ កាលពីពេលកន្លងទៅ។
តាមការបញ្ជាក់អះអាងថា មនុស្សចំនួន៤នាក់រួមមាន៖ លោថោង ចំរើន ជាឪពុក, លោកស្រីកែវ សាវី ជាម្តាយ, លោកស្រីសៀវ ធីតា ជាប្រពន្ធ និងលោកថោង បូរ៉ា ជាប្អូនលោកថោង សារ៉ាត់ និងមានភស្ថុតាងមួយចំនួនមានអាវុធ៦ដើម ត្រា១០គ្រាប់ និងឯកសារមិនប្រក្រតីមួយចំនួន។
មនុស្សទាំង៤នាក់ ត្រូវបានសមត្ថកិច្ចចម្រុះឃាត់ខ្លួនកាលពីយប់ ថ្ងៃទី០៣ ខែធ្នូ នៅចំណុចបុរី៩៩៩ ក្នុងសង្កាត់ចាក់អង្រេក្រោម ខណ្ឌមានជ័យ ។
សមត្ថកិច្ចបានបញ្ជាក់ថា ក្រុមជនសង្ស័យជាប់ចោទពីបទរារាំងសមត្ថកិច្ច និង បទរក្សាទុកអាវុធខុសច្បាប់ ។
ការចោទប្រកាន់នេះ បន្ទាប់ពីពួកគេ ចេញមុខមកធ្វើសន្និសីទកាសែត ដោយទុកឱកាសឱ្យឧកញ៉ា ថោង សារ៉ាត់ រត់គេចខ្លួន ដូច្នេះវាជាការរំខាន និងរារាំងពីដំណើរការប្រតិបត្ដិការរបស់សមត្ថកិច្ច និង ក្នុងប្រតិបត្តិការ ឆែរឆេរ សមត្ថកិច្ចបានរកឃើញអាវុធ៦ដើម និងត្រាមួយចំនួន .
ដោយឡែកលោកគៀតចាន់ ថារិទ្ឋអ្នកនាំពាក្យក្រសួងមហាផ្ទៃបានមានប្រសាសនថា
រហូតមកដល់ពេលនេះប៉ូលីសមិនទាន់បានចាប់ខ្លួនលោកថោង សារ៉ាតនោះទេ ការដែលលិចលឺថាបានចាប់លោកថោង សារ៉ាតពីប្រទេសវៀតណាមនាំតាមច្រកបាវិតនោះជាពាក្យចាមរាមតែប៉ុណ្ណោះមិនទាន់ជាផ្លូវការទេ៕