ខេត្តរតនគិរី ៖ លោកតា មឿន និងលោកតាធី រស់នៅក្នុងភូមិជ័យជំនៈសង្កាត់ឡាបានសៀក ក្រុងបានលុងខេត្តរតនគិរី អ្នកទាំង២បាននាំកម្លាំងរបស់ខ្លួនមួយចំនួនមកធ្វើរបងនៅលើដងផ្លូវចាស់គឺផ្លូវលេខ២៣ស្ថិតក្នុងភូមិ៧មករា សង្កាត់ឡាបានសៀក ក្រុងបានលុង ខេត្តរតនគិរី កាលពីថ្ងៃទី២៥ ខែវិច្ឆិកា ឆ្នាំ២០១៤ កន្លងទៅនេះ។
លោកសុខ ទ្រី ដែលជាម្ចាស់ដីជាប់ផ្លូវចាស់នោះបានប្រាប់អ្នកសារពត៌មានអោយដឹងថាចំពោះការធ្វើរបងនេះ លោកបានប្រាប់អាជ្ញាធរមូលដ្ឋានម្តងរួចទៅហើយ ហើយអាជ្ញាធរមូលដ្ឋាក៏យល់ស្របមិនអោយអ្នកទាំង២ខាងលើធ្វើរបងតទៅទៀតទេ។ លុះដល់ពីថ្ងៃទី២៥ ខែវិច្ឆិកា ឆ្នាំ២០១៤កម្លាំងរបស់លោកទាំង២ (តាមឿន និងតាធី)ក៏នាំគ្នាធ្វើរបងលើផ្លូវចាស់នេះបន្តទៅទៀតហើយការធ្វើរបងនេះ នៅចំពាក់កណ្តាលផ្លូវចាស់តែម្តង។
លោកសុខ ទ្រី បានបញ្ជាក់ថា លោកបានអន្តរាគមន៍ទៅអាជ្ញាធរដែរប៉ុន្តែអាជ្ញាធរហាក់បីដូចជាធ្វើមិនដឹងមិនឮសោះ។
ប្រភពពត៌មានមួយចំនួនបានលើកឡើងថាអាជ្ញាធរបានបង្ខំអោយប្រជាពលរដ្ឋមួយចំនួនដែលរស់នៅភូមិ7មករានេះអោយទិញដីផ្លូវចាស់នេះទៅ ប្រសិនបើមិនចង់អោយគេធ្វើរបង។ ចំណែកលោកអុក សំអុលអភិបាលក្រុងបានលុង បានបញ្ជាក់ថាចំពោះការធ្វើរបងនេះគឺជាសិទ្ធិរបស់ម្ចាស់ដី មិនអាចហាមឃាត់ការធ្វើរបងនៅលើដីរបស់គេបានទេ៕