រាជធានីភ្នំពេញ៖ វង់ល្បែងអាបោង និងបៀរមួយសំបុកធំដែលជ្រកនៅក្នុងការ៉ាសលក់រថយន្តយីហោ ការ៉េ៧ (៧៧៧៧) ត្រូវក្រុមអ្នកញៀនល្បែងស៊ីសងដែលមានទ្រព្យសម្បត្តិស្តុកស្តមជាច្រើនចូលទៅលែងយ៉ាងគគ្រឹកគគ្រេងជារៀងរាល់ថ្ងៃដោយពុំមានការរំខានពីអាជ្ញាធរមានសមត្ថកិច្ចមូលដ្ឋានឡើយ។ ទីតាំងល្បែងស៊ីសងខាងស្ថិតនៅផ្លូវ១០៦ ក្នុងសង្កាត់វត្តភ្នំ ខណ្ឌដូនពេញ ដែលមានចំណាយប្រមាណតែ១០០ម៉ែត្រតែប៉ុណ្ណោះពីសាលារាជធានីភ្នំពេញ។
លោក អ៊ុន សំអាត នាយប៉ុស្តិ៍រដ្ឋបាលសង្កាត់វត្តភ្នំបានប្រាប់សារព័ត៌មានយើងឲ្យដឹងថា ទីតាំងល្បែងស៊ីសងខាងលើគឺមានតាំងពីយូរហើយ ដែលមានឈ្មោះ រ័ត្ន មានតួនាទីជាមន្ត្រីកងរាជអាវុធហត្ថរាជធានីភ្នំពេញម្ចាស់ ហើយមានឈ្មោះរ៉ាជាប្អូនប្រុសអ្នកមើលការខុសត្រូវរៀងរាល់ថ្ងៃ។ លោកបន្តទៀតថា ក្រៅពីឈ្មោះរ័ត្ន និងឈ្មោះរ៉ាជាម្ចាស់នោះ ទីតាំងល្បែងស៊ីសងខាងលើនេះក៏មានអ្នកសារព័ត៌មានមួយចំនួនជាអ្នកទទួលខុសត្រូវចំពោះការបិទបាំង និងសម្រលសម្រួលជាមួយអ្នកសារព័ត៌មានណាដែលចង់ផ្សព្វផ្សាយអំពីសកម្មភាពល្បែងស៊ីសងខុសច្បាប់របស់ពួកគេផងដែរ។
ចំពោះបញ្ហាខាងលើនេះ លោក ហួត ចាន់យ៉ារ៉ាន់ អធិការខណ្ឌដូនពេញបានអះអាងថាលោកមិនបានដឹងឡើយ ហើយលោកនឹងឱ្យកូនចៅរបស់លោកទៅមើលទៅទីតាំងខាងលើនោះ ដោយលោកមិនបានអះអាងថាលោកនឹងបង្ក្រាបទីតាំងនោះ ឫក៏អត់ទេ ក្រោយពីលោកបានដឹងទីតាំងល្បែងស៊ីសងខុសច្បាប់ខាងនោះហើយ។
បើតាមប្រភពពីប្រជាពលរដ្ឋដែលមានមុខរបរលក់រថយន្តនៅម្តុំនោះបាននិយាយថា ទីតាំងល្បែងស៊ីសងខាងលើត្រូវបើកលេងយូរហើយ ហើយមិនមានអាជ្ញាធរមកបង្ក្រាបឡើយ គឺមានតែអាជ្ញាធរមកជួយសម្រសសម្រួលតែប៉ុណ្ណោះ។ គេមិនដឹងថា ការសម្របសម្រួលនោះមានន័យដូម្តេចនោះទេ។
គួរំឭកថានៅក្នុងចំណុចមួយនៃគោលនយោបាយភូមិឃុំមានសុវត្ថិភាពបានហាមដាច់ខាតមិនឱ្យមានល្បែងស៊ីសងគ្រប់ប្រភេទនោះទេ ប៉ុន្តែឥឡូវនេះល្បែងស៊ីសងត្រូវបានដំណើរការដោយសមត្ថកិច្ចដែលជាអ្នកយល់ច្បាប់ និងអនុវត្តច្បាប់ទៅវិញតើរឿងនេះអាជ្ញាធរមានសមត្ថកិច្ចនៅតែបន្តឈរមើលតទៅទៀតទេ បើទីតាំងល្បែង ស៊ីសងខុសច្បាប់នៅស្ទើរតែជាប់នឹងរបងសាលារាជធានីភ្នំពេញទៅហើយនោះ ៕
