ភ្នំពេញ ៖ ថ្នាំញៀនជិត៣គីឡូក្រាម និង លុយជិត១០ម៉ឺនដុល្លារ ត្រូវបានប៉ូលិសការិយាល័យប្រយុទ្ធប្រឆាំងគ្រឿងញៀនរាជធានីភ្នំពេញធ្វើការដកហូតជាវត្ថុតាងក្នុងការបង្ក្រាបបទល្មើសជួញដូរថ្នាំញៀន និងបនល្បែងស៊ីសងមួយកន្លែងនៅចំណុចផ្ទះល្វែងសង់ថ្មី សង្កាត់បឹងសាឡាង ខណ្ឌទួលគោក ដែលប្រតិបត្តិការនេះ ត្រូវបានបញ្ចប់ការងាររបស់ខ្លួនកាលម៉ោង៥និង១៥នាទីល្ងាចថ្ងៃទី២៦ ខែវិច្ឆិកា ឆ្នាំ២០១៤។
ក្នុងប្រតិបត្តិការនេះសមត្ថកិច្ចប៉ូលិសឃាត់ខ្លួនមនុស្សប្រុសម្នាក់ និងស្រីម្នាក់ ក្នុងនោះដកហូតបានថ្នាំញៀនប្រភេទម៉ាទឹកកជិត៣គីឡូក្រាម ថ្នាំយ៉ាម៉ាមួយចំនួនទៀត លុយដុល្លារ៥៤.៥០០ដុល្លារ និង លុយខ្មែរ១៧០លានរៀល រថយន្តចំនួន០៣គ្រឿង (កាមរីបាឡែន រថយន្តម៉ាកស៊ីរូស និងឡិចស៊ីស៣៣០ ) និងដកហូតកាំភ្លើងខ្លីស៊េរីទំនើបមួយដើមផងដែរ។
ជនសង្ស័យទាំងពីរនាក់នេះមានទី០១-ឈ្មោះ នៅ កញ្ញា ភេទស្រី និង ទី០២-ឈ្មោះ ឈុំ ជឿន ភេទប្រុស អាយុប្រហែល៣០ឆ្នាំ (ជាអង្គរក្ស)។ ប្រតិបត្តិការនេះបានចាប់ផ្តើមឡើងកាលពីវេលាម៉ោង២រសៀល ថ្ងៃទី២៦ ខែវិច្ឆិកា ដោយនគរបាលការិយាល័យប្រឆាំងគ្រឿងញៀនដឹកនាំដោយលោកព្រះរាជអាជ្ញារង មាស ច័ន្ទពិសិដ្ឋ និង លោក ប៊ន សំអាត ប្រធានការិយាល័យប្រឆាំងគ្រឿងញៀននៃស្នងការដ្ឋាននគរបាលរាជធានីភ្នំពេញ ហើយនិងលោក ជួន សុវណ្ណ អគ្គស្នងការរងនគរបាលជាតិបានចុះមកដល់កន្លែងកើតហេតុផងដែរ។
បច្ចុប្បន្ន សមត្ថកិច្ចបានបញ្ជូនទាំងសម្ភារ វត្ថុតាងនានាខាងលើ និង ជនសង្ស័យទាំងពីរនាក់ យកទៅរក្សាទុក និងឃុំខ្លួននៅការិយាល័យប្រយុទ្ធប្រឆាំងគ្រឿងញៀន ចំណុះស្នងការដ្ឋាននគរបាលរាជធានីភ្នំពេញ ដើម្បីកសាងសំណុំរឿងចាត់ការតាមនីតិវិធីច្បាប់៕
