ភ្នំពេញ ៖ អគ្គិភ័យបានឆាបឆេះយ៉ាងសន្ធោសន្ធៅក្នុងបរិវេណផ្សារចាស់ បណ្ដាលឱ្យខូចខាតស្ទើរទាំងស្រុងបើទោះ ជាមានការអន្ដរាគមន៍ពន្លត់អគ្គិភ័យ ដោយយកចិត្ដទុកដាក់ពីសមត្ថកិច្ចក៏ ដោយ ។
ហេតុការណ៍អគ្គិភ័យឆាបឆេះខាង លើនេះបានកើតឡើងកាលពីវេលាម៉ោង ៧ព្រឹកថ្ងៃទី២៤ ខែវិច្ឆិកា ឆ្នាំ២០១៤ ស្ថិតក្នុងសង្កាត់ផ្សារចាស់ ខណ្ឌដូនពេញ។
លោក ព្រហ្ម យ៉ន ប្រធានអង្គភាព ពន្លត់អគ្គិភ័យនៃស្នងការដ្ឋាននគរបាល រាជធានីភ្នំពេញបានឱ្យដឹងថា សមត្ថកិច្ច បានប្រើប្រាស់ពេលវេលាជាង២ម៉ោង ដើម្បីអន្ដរាគមន៍ពន្លត់ ក្នុងនោះបានប្រើ ប្រាស់រថយន្ដពន្លត់អគ្គិភ័យចំនួន១៥០ គ្រឿង ក្នុង១គ្រឿងៗដឹកជញ្ជូនទឹកមក បាញ់ពន្លត់ដល់៥ដងឯណោះ ទើបនៅ វេលាម៉ោង៩និង២០នាទីព្រឹកថ្ងៃដដែល ភ្លើងត្រូវបានរលត់ទាំងស្រុង ។
លោក ព្រហ្ម យ៉ន បញ្ជាក់ថា អគ្គិភ័យបានឆាបឆេះតូបរបស់អាជីវករអាច ខូចខាតដល់៩០ភាគរយ ដោយការពន្លត់ នេះមានផលលំបាកបន្ដិចត្រង់ថា បាញ់ ទឹកទៅពុំបានជ្រាបចូលទៅកាន់តូបដែល កំពុងឆេះ ខណៈដំបូលស័ង្កសីបានធ្វើបិទ ជិត ហើយនៅផ្នែកខាងក្រោមសម្បូរ ទៅដោយកំប៉ុងហ្គាស ជ័រ កៅស៊ូ ព្រម ទាំងតូបខ្លះធ្វើអំពីឈើងាយនឹងឆាបឆេះ។
លោក ព្រហ្ម យ៉ន បន្ដថា សមត្ថកិច្ច បានព្យាយាមគ្រប់មធ្យោបាយដើម្បីចូលទៅអន្ដរាគមន៍ពន្លត់ទើបរយៈពេលជាង ២ម៉ោងភ្លើងត្រូវបានរលត់ទាំងស្រុង ។
បើតាមការអះអាងពីក្រុមសន្ដិសុខ ក៏ដូចជាអាជីវករខ្លះនិយាយថា មុនកើត ហេតុខាងសន្ដិសុខបានទៅបើកុងតាក់ភ្លើង ស្រាប់តែមានករណីទុស្សេខ្សែភ្លើង ចេញជាផ្សែងហុយ ក្រោយមកក៏មាន អណ្ដាតភ្លើងឆាបឆេះដ៏សន្ធោសន្ធៅ កើតឡើង ។
អាជ្ញាធរបានសម្ដែងការសោកស្ដាយ ពីការបាត់បង់ទ្រព្យសម្បត្ដិដ៏ច្រើនរបស់អាជីវករ ហើយក៏កំពុងយកចិត្ដទុកដាក់ ស៊ើបអង្កេតជុំវិញបញ្ហានេះផងដែរ តើ បណ្ដាលមកពីការឆ្លងចរន្ដអគ្គិសនី ឬ មានរឿងអ្វីកើតឡើងផ្សេងពីនេះ ។
ពេលដែលភ្លើងកំពុងឆេះសន្ធោសន្ធៅ រួមនឹងផ្សេងខ្មួលខ្មាញ់ផងនោះទាំងអ្នកធ្វើដំណើរ អាជីវករបានភ្ញាក់ផ្អើល អ្នកខ្លះ ឈរ អ្នកខ្លះចតរថយន្ដបណ្ដាលឱ្យមាន ករណីកកស្ទះចរាចរណ៍ ទាំងរថយន្ដពន្លត់អគ្គិភ័យ ។ ដូច្នេះពេលមានគ្រោះអាសន្ន អគ្គិភ័យកើតឡើងប្រជាពលរដ្ឋដែលរស់ នៅកន្លែងកើតហេតុក៏ដូចជាអ្នកធ្វើ ដំណើរគួរតែផ្ដល់អាទិភាពសម្រាប់រថ យន្ដពន្លត់អគ្គិភ័យក៏ដូចជា ចូលរួមគោរព ចរាចរណ៍ រក្សាសណ្ដាប់ធ្នាប់សាធារណៈ ប្រយោជន៍ទុកឱកាសឱ្យអាជ្ញាធរ សមត្ថ កិច្ច ពិសេសក្រុមពន្លត់អគ្គិភ័យបំពេញ កិច្ចការនេះបានរហ័សទាន់ពេលវេលា ៕
