ភ្នំពេញ៖ ប្រតិកម្មតៅនិងគោលបំណងរបស់លោក កឹម សុខា អនុប្រធានទី១នៃរដ្ឋសភា និងជាអនុប្រធានគណបក្ស សង្គ្រោះ ជាតិ ដែលឲ្យគណៈកម្មការទីមួយរបស់រដ្ឋសភា ដែលដឹកនាំដោយគណបក្សសង្គ្រោះជាតិហៅលោកប៉ាសុជាតិវង្សអភិបាលរាជធានីភ្នំពេញមកបំភ្លឺពាក់ព័ន្ធ និងការរៀបចំអភិវឌ្ឍន៍តំបន់បឹងកក់នោះប្រភពពីសាលារាជធានីភ្នំពេញឆ្លើយតបវិញថាការឆ្លើយបំភ្លឺធ្វើទៅបានល្គឹកណាមានការអនុញ្ញាតពីក្រសួងមហាផ្ទៃជាមុនសិន។
លោក ឃួង ស្រេង អភិបាលរងរាជធានីភ្នំពេញបានឲ្យកាសែតដឹងថា “សភាមិនអាចកោះហៅតាមតែចិត្តបានទេគឺត្រូវធ្វើលិខិតទៅក្រសួងមហាផ្ទៃដើម្បីឲ្យក្រសួងមហាផ្ទៃសម្រេចថា គួរតែអញ្ជើញ ឯកឧត្តម ប៉ា សុជាតិវង្ស ទៅបំភ្លឺនៅសភាឬអត់? ។ ព្រោះនេះជាឋានុក្រមនៃការងារ មិនមែននឹកឃើញហៅហៅបានឯណា? ។ លោក ឃួង ស្រេង បញ្ជាក់ថា ក្រសួងមហាផ្ទៃ ជាអាណាព្យាបាល របស់ សាលារាជធានី ភ្នំពេញ”។
ឯលោក ខៀវ សុភ័គ អ្នកនាំពាក្យ ក្រសួង មហាផ្ទៃក៏បានចាត់ទុកការកោះហៅ អភិបាលរាជធានីភ្នំពេញ ទៅស្រាយបំភ្លឺនៅរដ្ឋសភា មិនទាន់មានច្បាប់ចែងនោះទេ ។ លោក និយាយថា “បើពិនិត្យតាមផ្លូវច្បាប់ យើងឃើញថា អភិបាលខេត្តក្រុងទទួល ខុសត្រូវជាមួយនឹងរាជរដ្ឋាភិបាល។ ប៉ុន្តែមិនទទួលខុសត្រូវ នៅចំពោះមុខរដ្ឋសភានោះទេ ។ នេះបើផ្អែកតាមផ្លូវច្បាប់ ។ ហើយបើយើងមើលរដ្ឋធម្មនុញ្ញសភាអាច កោះប្រជុំបានតែរដ្ឋមន្ត្រីទេ ។
លោក ខៀវ សុភ័គបញ្ជាក់ថា ខ្ញុំគិតថាកោះហៅ អភិបាលរាជធានីឬ អភិបាលខេត្តមកស្រាយបំភ្លឺនៅ មុខគណៈ កម្មការសភាដូចជាមិនទាន់មានច្បាប់ចែងក្នុងរដ្ឋធម្មនុញ្ញនៅឡើយ” ។
ដោយឡែក សម្រាប់កម្មវិធីកោះហៅលោក ប៉ា សុជាតិវង្ស នេះ លោក អេង ឆៃអ៊ាង ប្រធានគណៈកម្មការទី១ របស់រដ្ឋសភា បានប្រាប់អ្នកកាសែតនៅរសៀលថ្ងៃទី ១៧ វិច្ឆិកានេះថា នៅព្រឹកមិញ លោកបានបញ្ជូនលិខិតមួយច្បាប់ តាមរយៈសម្តេចប្រធានរដ្ឋសភា ជូនទៅលោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដើម្បីកោះអញ្ជើញលោក ប៉ា សុជាតិវង្ស អភិបាលរាជភ្នំពេញ ចូលឆ្លើយបំភ្លឺចំពោះមុខគណៈកម្មការរដ្ឋសភា នាថ្ងៃទី២៧ វិច្ឆិកា អំពីជម្លោះដីធ្លីដ៏រ៉ាំរ៉ៃ នៅរាជធានីភ្នំពេញករណីបឹងកក់ និងបុរីកីឡា ៕
