ភ្នំពេញ : នៅថ្ងៃទី១៣ ខែវិច្ឆិកានេះ លោក សោម អូន ប្រធានក្រុមប្រឹក្សាភិបាល សហជីពជាតិ កម្ពុជា បានធ្វើសន្និសីទកាសែត នៅភោជនីយដ្ឋាន ទន្លេបាសាក់២ បានប្រកាសស្វាគមន៍ និងគាំទ្រ ចំពោះការតម្លើងប្រាក់ឈ្នួល ចំនួន ១២៨ ដុល្លារ ដែលជាប្រាក់ខែគោល សម្រាប់ កម្មករ កម្មការិនី នៅក្នុងវិស័យកាត់ដេរ និងវិស័យស្បែកជើងកម្ពុជា ។
លោក សោម អូន បានបន្តថា សហជីពដែលមិនយល់ព្រម និងការតម្លើងប្រាក់ឈ្នួល អប្បបរមា ១២៨ ដុល្លារនោះ គឺជាសិទ្ធិរបស់គេ ប៉ុន្តែកម្មករ កម្មការិនី ភាគច្រើន បានគាំទ្រដល់ការតម្លើង ប្រាក់ឈ្នួលនេះ ដែលធានាបាននូវ ស្ថេរភាព និងការប្រកួតប្រជែង។ ចំពោះការមិនសប្បាយចិត្ត ពីសំណាក់សមាគម រោងចក្រកាត់ដេរ នៅកម្ពុជា ទាក់ទងនឹងការតម្លើង ប្រាក់ឈ្នួលអប្បបរមា ចំនួន ១២៨ ដុល្លានោះក្តី តែភាគីរាជរដ្ឋាភិបាល និងមានកិច្ចប្រជុំ ជាមួយក្រុមវិស័យឯកជន ដែលជាក្រុមទី៨ ដើម្បីពិភាក្សាពីការលើកទឹកចិត្ត អ្នកវិនិយោគទុន នៅកម្ពុជា។
លោក សោម អូន បានមានប្រសាសន៍បន្តថា៖ កម្មករ កម្មការិនី នឹងទទួលបានប្រាក់ខែ ជាមធ្យមចំនួន ១៥០ ដុល្លារ ដោយពុំទាន់គិតបញ្ចូល ការងារបន្ថែមម៉ោង។ ហើយការតម្លើង ប្រាក់ឈ្នួល នៅឆ្នាំ២០១៥នេះ មិនបានធ្វើឲ្យមាន ការប៉ះពាល់ការវិនិយោគទុន នៅកម្ពុជាឡើយ ចំពោះភាគីបញ្ជាទិញ ក៍ពុំបានធ្វើការរិះគន់អ្វីដែរ ។
សូមបញ្ជាក់ថា ចំពោះការបន្ថែមប្រាក់ចំនួន ៥ ដុល្លារ ដល់កម្មករ កម្មការិនី នៅក្នុងវិស័យកាត់ដេរ ឆ្នាំ២០១៥ បានដល់ ១២៨ ដុល្លារនោះ ជាការសម្រេចចុងក្រោយ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃរាជរដ្ឋាភិបាលកម្ពុជា ៕