ភ្នំពេញ ៖ សកម្មជនដីធ្លីនៃសហគមន៍បឹងកក់ ៧នាក់ ត្រូវសមត្ថកិច្ចចាប់ខ្លួនបញ្ជូនទៅស្នងការដ្ឋាននគរបាលរាជធានី នៅព្រឹកថ្ងៃចន្ទ បន្ទាប់ពីលើកគ្នាជាង ៥០ នាក់មកបិទផ្លូវនៅមុខសាលារាជធានី តវ៉ាទាមទារឲ្យមន្ត្រីអន្តរាគមន៍បូមទឹកភ្លៀងដែលជន់លិចសហគមន៍រហូត មកដល់ពេលល្ងាចនៅមិនទាន់ដោះលែងនៅឡើយ។
សកម្មជនស្ត្រីបឹងកក់ ដែលត្រូវសមត្ថកិច្ចចាប់ខ្លួនមានអ្នកស្រី ទេព វន្នី, លោកយាយ ង៉ែ ឃុន, អ្នកស្រី គង់ ចាន់ថា, អ្នកស្រី បូ ឆវី, អ្នកស្រី ផាន់ ឈុនរ៉េត, អ្នកស្រី នង ស្រេង និងកញ្ញា សុង ស្រីលាភ។
ដោយពីមិនឃើញមានមន្ត្រីចេញមកជួបឬអនុញ្ញាតឲ្យតំណាងចូលជួប ពិភាក្សារកដំណោះស្រាយក្រុមអ្នកភូមិបានព្យាយាមនាំគ្នាមកអង្គុយ បិទទ្រូងផ្លូវព្រះមុនីវង្ស ម្តងជាពីរដង បើទោះជាកម្លាំងសន្តិសុខ ខណ្ឌដូនពេញ មកចាប់សែងពួកគាត់ទៅចិញ្ចើមផ្លូវវិញក៏ដោយ ដែលបង្កឲ្យមានការកកស្ទះចរាចរណ៍នៅចំណុចនោះ ហើយនៅម៉ោងប្រមាណជា ១១ ព្រឹកក្រុមសមត្ថកិច្ចចម្រុះ ខណ្ឌដូនពេញ សម្រេចចាប់តំណាងទាំង ៧ នាក់នោះបញ្ជូនទៅស្នងការដ្ឋាននគរបាល។
ចំណែកក្រុមអ្នកតវ៉ាដែលមានការគាំទ្រពីបណ្ដាញសង្ឃឯករាជ្យផង បានរំសាយជាបណ្ដោះអាសន្ន ប៉ុន្តែនៅម៉ោង ១ រសៀលក៏ប្រមូលផ្ដុំគ្នាជាថ្មីនៅមុខសាលារាជធានីនិងមួយក្រុមនៅ មុខស្នងការដ្ឋាននគរបាលរាជធានី ដើម្បីទាមទារឲ្យមានការដោះលែងតំណាងពួកគេមកវិញ។
លោក ចាន់ ពុទ្ធិស័ក្តិ សកម្មជនសិទ្ធិមនុស្សនៃសហគមន៍បឹងកក់ ដែលឃ្លាំមើលព្រឹត្តិការណ៍នេះនិយាយថា៖ «ខ្ញុំយល់ថា អាជ្ញាធរទំនងជាកំពុងចាត់ទុកពលរដ្ឋក្នុងសហគមន៍បឹងកក់យើងខ្ញុំជា ខ្មាំងសត្រូវ»។
លោកថា រាល់បញ្ហាប្រឈមរបស់អ្នកនៅក្នុងសហគមន៍បឹងកក់ អាជ្ញាធរមិនអើពើដោះស្រាយឲ្យទាន់ពេលវេលាទេ ថែមទាំងចាប់ខ្លួនតំណាងដែលមកធ្វើការតវ៉ារកដំណោះស្រាយទៀត។
លោក ឡុង ឌីម៉ង់ អ្នកនាំពាក្យសាលារាជធានី ថ្លែងថា អាជ្ញាធរបានអត់ធ្មត់ដល់កម្រិតហើយ មុនបង្ខំចិត្តប្រើកម្លាំងរៀបរយសណ្ដាប់ធ្នាប់ឡើងវិញ។ លោកថា ពេលក្រុមអ្នកតវ៉ានាំគ្នាមកស្រែកតវ៉ាបិទផ្លូវនិងច្រកចេញចូល សាលារាជធានីក្រុមសមត្ថកិច្ចក៏បានប្រើគ្រឿងចក្រចុះទៅជីកកកាយបើក ប្រព័ន្ធលូរំដោះទឹកនៅក្នុងតំបន់ពួកគាត់រស់នៅផងដែរ។
លោកថ្លែងថា៖ «មិនចំពោះតែអ្នកបឹងកក់នោះទេ ក្រុមណាក៏ដោយឲ្យតែធ្វើសកម្មភាពតវ៉ាល្មើសច្បាប់ បិទផ្លូវ និងបិទច្រកចេញចូលសាលារាជធានីសមត្ថកិច្ចត្រូវតែធ្វើការចាប់ឃាត់ ខ្លួន បញ្ជូនឲ្យនគរបាលចាត់ការតាមនីតិវិធីច្បាប់» ៕
