សៀមរាប ៖ សណ្ឋាគារមួយឈ្មោះថាTHE SAMAR VILLA & SPA RESORE FOU-NAN (ដឹសាម៉ារហ្វូណន) នៅក្នុង ក្រុងសៀមរាប បាននឹងកំពុងរងនូវការរិះគន់ពីប្រជាពលរដ្ឋដែលរស់នៅក្បែរនោះថាបានរំលោភ យកផ្លូវ សាធារណៈធ្វើជាប្រយោជន៍ផ្ទាល់ខ្លួន។ សណ្ឋគារនោះមានទីតាំងស្ថិតនៅក្នុងភូមិត្រពាំងសេះ សង្កាត់គោក ចកក្រុងខេត្តសៀមរាប ដែលមានម្ចាស់កម្មសិទ្ធិជាជនជាតិបារាំងពីរនាក់ឪពុកនិងកូនដោយឳពុកមានឈ្មោះ CHRISTIAN JACQUES (គ្រិស្ទែន ជេកខ្វីស) កាន់ប៉ាស្ព័រលេខ 13CV 35576 ចំណែកកូនជាអ្នកមើលការខុសត្រូវនៅក្នុងសណ្ឋាគារឈ្មោះ BERTRIAND CHRISTIAN JEAN (បឺទ្រែន ច្រិស្ទែន ជេន) កាន់ប៉ាស្ព័រលេខ 13FV32340។
ប្រជាពលរដ្ឋបាននិយាយចោទប្រកាន់ថា ពីនាក់ឳពុកនិងកូនជាជនជាតិបារាំងនោះបានយកសំណាញ់ពណ៌ ខៀវមកបិទផ្លូវសាធារណៈទុកតែប្រឡោះតូចមួយសម្រាប់ឲ្យប្រជាពលរដ្ឋធ្វើដំណើរឆ្លងកាត់។ ប្រជាពលរដ្ឋ បានថ្លែងទៀតថា ពីមុនផ្លូវនោះគឺមានទំហំធំងាយស្រួលធ្វើដំណើរតែឥឡូវមិនដឹងជាយ៉ាងម៉េចបានជាជន ជាតិបារាំងនោះយកសំណាញ់ខៀវមកបាំងទុកតែមួយប្រឡោះតូចអោយប្រជាជនធ្វើដំណើរទៅវិញថែមទាំងមានការគំរាមកំហែងមកលើប្រជាពលរដ្ឋ ព្រមទាំងមើលងាយមើលថោកមកលើប្រជាពលរដ្ឋដែលមានទីលំ នៅក្បែរសណ្ឋាគារខាងលើនោះផងដែរ។
ដើម្បីកុំអោយស្តាប់តែម្ខាងៗ អ្នកយកព័ត៌មានយើងបានចុះទៅដល់ ទីតាំងសណ្ឋាគារដែលរងនូវការរិះគន់នោះដើម្បីស៊ើបសួរព័ត៌មានអោយបានជាក់លាក់ ដឹងអីគ្រាន់តែពេល អ្នកយកព័ត៌មានយើងបានចុះទៅដល់ ហើយនឹងថតរូបផ្តិតយករូបភាពនៃការបិទផ្លូវសាធារណៈនោះរួចមិន ទាន់បានប៉ុន្មាននាទីផង ស្រាប់តែម្ចាស់សណ្ឋាគារជនជាតិបារាំងពីរនាក់ឪពុកនិងកូននោះបានស្ទុះចេញពី ក្នុងសណ្ឋាគារមកចាប់ដកយកម៉ាស៊ីនថតរូបរបស់អ្នកសារព័ត៌មានបោះចោល ហើយថែមទាំងដេញវ៉ៃអ្នក សារព័ត៌មានទៀតផង។ ក្រោយមកអ្នកសារព័ត៌មានបានរាយការណ៍ទៅប៉ុស្ដិ៍នគរបាលសង្កាត់គោកចកឲ្យ ជួយអន្ដរាយគមន៍ ពេលដែលសមត្ថកិច្ចចុះមកដល់កន្លែងកើតហេតុស្រាប់តែជនជាតិបារាំងធ្វើឬកហាក់ដូច ជាគ្មានរឿងអ្វីទាំងអស់ បន្ទាប់មកនាំសមត្ថកិច្ចទៅមើលកន្លែងបិទផ្លូវពេលនោះប្រជាពលរដ្ឋមានទីលំនៅនៅ ក្បែរនោះបានស្រែកថា ជនជាតិបារាំងនេះរំលោភយកដីសាធារណៈមិនឲ្យប្រជាពលរដ្ឋធ្វើដំណើរបានស្រួល បន្ទាប់មកសមត្ថកិច្ចប៉ុស្ដិ៍បានរាយការណ៍ទៅប៉ូលិសអន្តោប្រវេសន៍ដើម្បីនាំខ្លួនជនជាតិបារាំងពីរនាក់ឪពុក និងកូនទៅបំភ្លឺនៅជុំវិញនៃរឿងរ៉ាវបោកកាមេរ៉ារបស់អ្នកសារពត៌មាន។ ពេលទៅដល់ប៉ុស្ដិ៍ប៉ូលិសគោកចក ជនជាតិបារាំងបានឲ្យដឹងតាមរយៈបុគ្គលិកបកប្រែរបស់ខ្លួនថា រឿងនេះពួកគេមិនទទួលខុសត្រូវអ្វីទាំងអស់ ថែមទាំងគម្រាមអ្នកសារព័ត៌មានថាបើហ៊ានចុះផ្សាយរឿងនេះពួកគេនឹងប្តឹង។
ប្រភពពីប្រជាពលរដ្ឋនៅក្បែរកន្លែងនោះបានបញ្ជាក់ប្រាប់អ្នកយកព័ត៌មានទៀតថា ម្ចាស់សណ្ឋាគារជនជាតិ បារាំងពីរនាក់ឪពុកនិងកូននេះតែងតែមានការឈ្លោះ ទាស់ទែងគ្នាជាមួយប្រជាពលរដ្ឋនៅក្បែរនោះជារឿយៗ ដោយគ្មានកោតក្រែងអ្នកណាទាំងអស់ ព្រោះលឺល្ហៀងៗថា ជនជាតិបារាំងនោះ មានខ្សែអ្នកមានអំណាច ម្នាក់នៅកាងពីក្រោយខ្នង ទើបជនជាតិបារាំងនោះ ហ៊ានធ្វើអ្វីតាមតែអំពើចិត្តរបស់គាត់ សូម្បីតែសមត្ថកិច្ចក៏និយាយថា ជនជាតិបារាំងនេះមានអត្តចរិតអាក្រក់ណាស់ ។
ប្រជាពលរដ្ឋដែលមានទីលំនៅនៅក្បែរសណ្ឋាគារខាងលើនោះបានសំណូមពរដល់ប្រមុខរាជរដ្ឋាភិបាលនិងលោកអភិបាលខេត្តឃឹមប៊ុនសុងមេត្តាជួយដោះស្រាយបញ្ហាដែលជនជាតិបារាំងម្ចាស់សណ្ឋាគារ THE SAMAR VILLA & SPA RESORE FOUNAN រំលោភយកផ្លូវសាធារណៈធ្វើជាប្រយោជន៍ផ្ទាល់ខ្លួនមិនគិត ពីផលប៉ះពាល់ដល់ប្រជាពលរដ្ឋជាអ្នកក្រីក្រដែលមានទីលំនៅនៅក្បែរសណ្ឋាគារនោះផង៕
ច័ន្ទសុភាព
