ភ្នំពេញ ៖ ប្រជាពលរដ្ឋរស់នៅក្នុងបុរីវាលស្បូវស្ថិតនៅភូមិវាលស្បូវ ឃុំវាលស្បូវ ខណ្ឌច្បារអំពៅ ដែលជាផ្ទះទិញពីក្រុមហ៊ុនមានជ័យអ៊ិនធើណេសិនណល់អ៊ិនវេសមេនរបស់ឈ្មើថោង សារ៉ាត់ និងប្រពន្ធឈ្មោះទាវ ធីតា បានផ្ទុះការតវ៉ាកាលពីថ្ងៃទី២៩ ខែតុលា ឆ្នាំ២០១៤កន្លងមកនេះដោយសារតែក្រុមហ៊ុនគ្រោងនឹងលក់ដីសួននិងផ្លូវចេញចូលទៅក្នុងបុរីដែលក្រុមហ៊ុនបានធ្វើកិច្ចសន្យាមិនប៉ះពាល់នាពេលកន្លងមក។
ការតវ៉ារបស់ប្រជាពលរដ្ឋដែលរស់នៅក្នុងបុរីវាលស្បូវទាំងអស់ត្រូវបានអាជ្ញាធរសង្កាត់វាលស្បូវបើកកិច្ចប្រជុំផ្សះផ្សាជាបន្ទាន់មួយរវាងប្រជាពលរដ្ឋនិងតំណាងក្រុមហ៊ុនរបស់ឈ្មោះថោង សារ៉ាត់ ក្រោមអធិបតីភាពលោកស្រីយឹម ស៊ីមន ចៅសង្កាត់វាលស្បូវ។
ការផ្សះផ្សាទំនាស់នេះគឺមិនមានលទ្ធផលបន្តិចឡើយដោយសារតែក្រុមហ៊ុនមានជំហយកដីសួនសាងសង់អគារផ្ទះល្វែងថែមទៀត ប៉ុន្តែប្រជាពលរដ្ឋបានស្នើឲ្យមានការរក្សាទុកសួននិងផ្លូវឲ្យស្ថិតក្នុងស្ថានភាពដើមដដែលដើម្បីមានសោភណភាពផងនិងផ្លូវធំទូលាយផងតាមកិច្ចសន្យាដែលក្រុមហ៊ុនពិសេសលោកស្រីទាវ ធីតា ដែលជាប្រពន្ធរបស់លោកថោង សារ៉ាត់ បានធ្វើលិខិតបញ្ជាក់ធានាជាមួយអតិថិជនដែលទិញផ្ទះល្វែងក្នុងបុរីវាលស្បូវរក្សាទុកសួននិងផ្លូវមិនអាចឲ្យមានភាគីណាមួយមកកាត់យកបានទេ។ បើថ្ងៃក្រោយមានគេមកកាត់ផ្លូវនេះក្រុមហ៊ុនធានាសងប្រាក់ទាំងអស់ទៅអតិថិជនវិញ ឥឡូវនេះស្រាប់តែក្រុមហ៊ុនចង់កាត់យកសួនលក់ទៅឲ្យអ្នកដទៃរំលោភលើកិច្ចសន្យាជាមួយអតិថិជនទៅវិញ។
នេះជាលើកទី២ហើយដែលអតិថិជនទិញផ្ទះល្វែងពីក្រុមហ៊ុនមានជ័យអ៊ិនធើណេសិនណល់របស់លោកថោង សារ៉ាត់ ផ្ទុះការតវ៉ានិងមានបញ្ហាជាមួយនឹងម្ចាស់បុរី។ កន្លងមកការទិញលក់នេះ លោកប្រធានតុលាការក្រុងភ្នំពេញអាំង មាលតី បានធ្លាប់ប្ដឹងលោកថោង សារ៉ាត់ ចោទពីបទឆបោកប្រាក់ក្នុងរឿងទិញលក់ផ្ទះប្រគល់ប្រាក់គ្រប់ហើយស្រាប់តែមិនទទួលបានប័ណ្ណកម្មសិទ្ធិ ហើយរឿងក្ដីនេះកំពុងស្ថិតនៅក្នុងតុលាការក្រុងភ្នំពេញនៅឡើយ។
ដូច្នេះប្រជាពលរដ្ឋដែលមានបំណងចង់ទិញ ផ្ទះល្វែងពីបុរីរបស់ថោង សារ៉ាត់ គួរពិចារណាមុននឹងសម្រេចចិត្ដដើម្បីកុំឲ្យអស់ប្រាក់ហើយទទួលបាននូវការឈឺចាប់៕