សៀមរាប ៖ សមត្ថកិច្ចប៉ូលិសខេត្តសៀមរាប កាលពីថ្ងៃទី២៨ ខែតុលា ឆ្នាំ២០១៤ បានចាប់ឃាត់ខ្លួនជនសង្ស័យជាចោរលួចម្នាក់ពេលកំពុងធ្វើសកម្មភាពលក់ម៉ូតូស្មាស់កញ្ជាស់មួយគ្រឿងដែលជននោះបានលួចយកមកពីខេត្តឧត្តរមានជ័យ។
យោងតាមរបាយការណ៍របស់ប៉ូលិសអោយដឹងថាជនសង្ស័យដែលត្រូវបានចាប់ឃាត់ខ្លួននោះមានឈ្មោះ សាន់ អូន អាយុ៣៩ឆ្នាំរស់នៅក្នុងភូមិអូរទឹកថ្លាឃុំទំនប់ដាច់ស្រុកត្រពាំងប្រាសាទ ខេត្តឧត្តរមានជ័យ ។ ជនសង្ស័យរូបនេះ បានធ្វើសកម្មភាពលួចយកម៉ូតូម៉ាកស្មាសកូនកាត់មួយគ្រឿង ពណ៌ក្រហមលាយខ្មៅ ពាក់ស្លាកលេខភ្នំពេញ១AK-៣៩១១ កាលពីថ្ងៃទី២៧ ខែតុលា ឆ្នាំ២០១៤ អំឡុងពេលដែលម្ចាស់របស់វាទុកនៅក្រោមផ្ទះក្នុងភូមិឃុំខាងលើ ។
លោកវរៈសេនីយត្រី ហុង ប៊ុនហាវ នាយរងការិយាល័យព្រហ្មទណ្ឌកំរិតស្រាល នៃស្នងការដ្នាននគបាលខេត្តសៀមរាបបានអោយដឹងថា ជនសង្ស័យត្រូវបានចាប់ខ្លួននៅក្នុងស្រុកសូទ្រនិគម ខេត្តសៀមរាប វេលាម៉ោង១២.០០ថ្ងៃត្រង់ បន្ទាប់ពីលក់ម៉ូតូនោះបាន ១០ ម៉ឺនរៀល ។
លោកវរៈសេនីយត្រី ហុង ប៊ុនហាវ បានអោយដឹងទៀតថា បច្ចុប្បន្នជនសង្ស័យត្រូវបានកសាងសំណុំរឿងរួចហើយ ដើម្បីចាត់ការទៅតាមនិតិវិធីនៃច្បាប់ ៕