សៀមរាប ៖ ហាងស៊ីផឹកនិងខារ៉ាអូខេយីហោ ទន្លេមាស មានទីតាំងស្ថិតនៅក្នុងភូមិតាភុល សង្កាត់ស្វាយដង្គុំ ក្រុង-ខេត្តសៀមរាប បាននឹងកំពុងរងនូវការចោទប្រកាន់ពីសំណាក់ភ្ញៀវ ដែលធ្លាប់ទៅហូបចុក ក៏ដូចជាប្រជាពលរដ្ឋរស់នៅជុំវិញនោះថាជាកន្លែងមួយ ដែលកំពុងមានភាពល្បីល្បាញខាងវ៉ៃតប់ភ្ញៀវ តែមិនដែលមានឃើញសមត្ថកិច្ចណាមួយហ៊ានទៅក្បែរ ដើម្បីធ្វើការសួរនាំទេ បើទោះបីជាធ្លាប់មានជនរងគ្រោះនៃអំពើហឹង្សានោះទៅដាក់ពាក្យបណ្តឹងក៏ដោយ ។
យោងតាមប្រភពព័ត៌មានពីអ្នកធ្លាប់ទៅហូបចុកនៅក្នុងហាង និងប្រជាពលរដ្ឋរស់នៅក្បែរនោះ ដែលធ្លាប់បានឃើញហេតុការណ៍ វ៉ៃតប់ភ្ញៀវ បានអោយដឹងថាម្ចាស់ហាងនោះ ដែលត្រូវគេដឹងថា ជាប្រភេទមនុស្សស្រីស្រឡាញ់ស្រីដូចគ្នា គឺមិនសូវមានគុណធម៌ នៅក្នុងខ្លួនទេក្នុងនាមជាម្ចាស់ហាង ។
លោក ណៃ ម៉េងហុង អាយុ៣៥ឆ្នាំ រស់នៅក្នុងភូមិកន្ត្រកសង្កាត់ស្វាយដង្គុំក្រុង-ខេត្តសៀមរាប គឺជាភ្ញៀវម្នាក់ដែលបានទៅហូបចុកនៅក្នុងហាងនោះ កាលពីយប់ថ្ងៃអាទិត្យ ទី១៩ ខែតុលា ឆ្នាំ២០១៤ ជាមួយនឹងមិត្តភ័ក្ត្រពីរនាក់ទៀត ។
លោក ណៃ ម៉េងហុង បានប្រាប់អ្នកយកព័ត៌មានយើងថា លោកត្រូវបានបុគ្គលិកនៅក្នុងហាងទន្លេមាស ក្រោមការបង្គាប់បញ្ជារ ពីម្ចាស់ហាង វាយតប់រូបលោករហូតសន្លប់ បន្ទាប់ពីគាត់បានធ្វើអោយបែកកែវ មួយនៅក្នុងហាងនោះ ។
លោកបាននិយាយថា បើទោះជាយ៉ាងណាក្តី លោកបានរ៉ាប់ចេញសងថ្លៃកែវ ដែលលោកបានធ្វើ បែកនោះ បើទោះបីម្ចាស់ហាងនោះយកតំលៃកែវមួយដល់២០ទៅ៤០ដុល្លារ ក៏ដោយ ប៉ុន្តែក្នុងអំឡុងពេលដែលមិត្តភ័ក្ត្ររបស់លោកកំពុងគិតលុយសង ស្រាប់តែបុគ្គលិកហាងនោះ បានយកកៅអីជ័រមកវាយលោកពីក្រោយ បណ្តាលអោយបែកក្បាល ហើយដួល បន្ទាប់មកបានព្រួតគ្នាទាត់ធាក់លោកយ៉ាងដំណំ ព្រមទាំងបានដកយកការបូបលុយរបស់លោកទៅបាត់ ។ ក្រោយមក លោកបានចូលទៅសុំយកការបូបមកវិញ ប៉ុន្តែម្ចាស់ហាងនោះមិនអោយ ។
លោក ណៃ ម៉េងហុង បានអោយដឹងទៀតថា គាត់បានដាក់ពាក្យបណ្តឹងរួចរាល់ ហើយទៅកាន់ស្នងការដ្ឋាននគរបាលខេត្តសៀមរាប តែរហូតមកដល់ពេលនេះ នៅមិនទាន់ឃើញមានចំណាត់ការណាមួយ ចំពោះរឿងរបស់លោកនោះទេ ។
ម្ចាស់ហាង ដែលត្រូវគេដឹងថា ជាស្រីស្រឡាញ់ស្រីដូចគ្នានោះ នៅពេលអ្នកយកព័ត៌មានយើងទូស័ព្ទទៅសាកសូរអំពីព័ត៌មាននេះ បានបដិសេធថា ហាងរបស់គាត់មិនដែលកើតមានរឿងដូច្នេះទេ តែបានគំរាមប្តឹងអ្នកសារព័ត៌មានណា ដែលហ៊ានចុះផ្សាយអំពីហាងរបស់គាត់ ។
លោក ស៊ូវណ្ណ ដេត មេប៉ុស្តិ៍រដ្ឋបាលសង្កាត់ស្វាយដង្គុំ បានប្រាប់អ្នកយកព័ត៌មានយើងថា លោកបានដឹងអំពីការវ៉ៃតប់គ្នានៅក្នុងហាងទន្លេមាស កាលពីយប់ថ្ងៃទី១៩ ខែតុលា ឆ្នាំ២០១៤នោះដែរ តែលោកបានបញ្ជូនសំណុំរឿងនោះ ទៅកាន់អធិការដ្ឋាននគរបាលក្រុងសៀមរាបហើយ ។
លោក ដេត បានបន្តថា លោកទទួលស្គាល់ថា ហាងនោះពិតជាមានភាពល្បីល្បាញខាងវ៉ៃភ្ញៀវដូចគេថាមែន តែលោកមិនហ៊ានប៉ះពាល់ហាងនោះទេ ខ្លាចធ្លាក់ស័ក្ត ព្រោះខ្សែរបស់គេធំនៅក្នុងស្នងការដ្ឋាននគរបាលខេត្តសៀមរាប ។ ចំណែកប្រជាពលរដ្ឋ ដែលនៅជុំវិញហាងកើតហេតុខាងលើនោះបានឲ្យដឹងថា ពិតជាមានកាវ៉ាយតប់ភ្ញៀវស្ទើរាល់ថ្ងៃមែន៕
ដោយ៖ ច័ន្ទ សុភាព
